Joven Na’in-rua Lori Bala-Musan Ualu husi Arma PNTL Tama-Sai Indonézia Liu husi Fronteira Batugadé

Hatutan.com, (14 Janeiru 2025), Díli—Ekipa Servisu Nasionál Intelijénsia (SNI) ne’ebé destakadu iha  Fronteira Batugade, Munisípiu Bobonaro, servisu hamutuk ho Autoridade Aduaneira (Alfándega), Domingu (12/01/2025), asegura sidadaun timoroan na’in-rua ne’ebé tama husi Indonézia mai Timor -Leste lori bala-musan ka munisoins ualu  (8) ho telefone ida (1).

Lee Mós: Kazu Kilat-Musan Tama To’o Rezidénsia Lú-Olo Submete Ona bá Ministériu Públiku

Autoridade sira asegura joven timoroan na’in-rua ne’ebé lori bala-musan tama hosi Indonézia liu husi Fronteira Batugadé. Foto/supply

Informasaun ne’ebé Hatutan.com simu hosi fonte servisu sekreta katak  bala-musan ka munisoins ne’e detekta iha Makina X-Ray bainhira joven timoroan na’in-rua ne’e tama ba Indonézia iha Sesta-feira, 10 fulan-Janeiru  2025  no makina X Ray la deteta, hafoin tama fali mai mak deteta iha Makina X-Ray Fronteira Batugade.

Tuir informasaun katak sasán ka bala-musan ne’e pertense bà pesoál membru Polísia Nasionál Timor-Leste ida nian ho diviza Sarjentu Polísia  ho inisiál RM hanesan jovenida hosi  na’in-rua ne’e nia aman.

Evidensia sira ne’ebé autoridade sra asegura hosi suspeitu na’in-rua. Foto/supply

Joven na’in-rua ne’e ho inisiál GSM ho OSG, no hafoin identifikasaun iha Postu Integradu Fronteira Batugade nian, ekipa destakadu SNI hamutuk ho Autoridade Aduaneira ka Alfándega  entrega kedas ba Polísia Nasionál Servisu Investigasaun Kriminál ka Departamentu Investigasaun Kriminál Nasionál hodi remete autór sira ba prosesu investigasaun.

Daudaun ne’e joven na’in-rua hanesan suspeitu ne’e detein hela iha sela Polísia nian hodi submete ba prosesu investigasaun no submete ba primeiru interrogatóriu judisial iha Tribunál Judisiál Primeira Instánsia Díli (TJPID).

Jornalista: Vito Salvadór