Hatutan.com, (07 Janeiru 2025), Díli-Polísia Nasionál Timor-Leste (PNTL), Departamentu Investigasaun Kriminál Nasionál (DIKN), submete ka aprezenta ona bá Ministériu Públiku (MP), kona-bá kazu kilat-musan tiru hosi ema deskoñesidu tama to’o rezidénsia eis Prezidente Repúblika (PR), Francisco Guterres “Lú-Olo”.

Lee Mós: Atensaun! Ema Deskoñesidu Tiru Kilat Musan Tama To’o Rezidénsia Lú Olo

Konferénsia imprensa iha Kuartél Jerál PNTL, Caicoli-Díli, Tersa (07/01/2025). Foto/PNTL

Komandante Departamentu Investigasaun Kriminál Nasionál (DIKN), Superintendente Polísia João dos Reis Belo, informa, situasaun ne’ebé akontese iha Kuarta, 01 fulan-Janeiru 2025, hale’u tuku 01:30 madrugada, bainhira akompaña ritu fogete, ema deskoñesidu mós tiru bala bá leten, hodi rezulta bala-musan ne’e monu kona-bá eis Prezidente Repúblika nia uma.

Iha loron tuir mai, hale’u tuku 11:30, PNTL liuhosi Ekipa Investigasaun Kriminál Nasionál, hamutuk ho Ekipa Tékniku Forensik nian halo mós rekonstrusaun bá fatin akontesimentu nian, identifika katak, bala ne’e monu duni iha ne’ebá.

“Depois, ita hatene mós katak, ne’e rezulta tiru bá leten, kilat-musan ne’ebé mak monu, ne’e nove milímetru (projetil 9 milímetru). Ita seidauk hatene, ida ne’e mai hosi kilat tipu ida ne’ebé. Mais, ita hatene ona, ne’e hosi kilat-ki’ik, tanba nove milímetru,” Komandante João Belo, informa bá Jornalista sira liuhosi konferénsia imprensa iha Kuartél Jerál PNTL, Caicoli-Díli, Tersa (07/01/2025).

Maske kilat-musan ne’e pistola nian, maibé, polísia mós seidauk deskobre tipu pistola ida ne’ebé mak ema deskoñesidu sira uza hodi tiru. Karik, pistola revolver, ka pistola block, Polísia seidauk hatene.

“La-hanesan ho maluk sira nian publikasaun iha média sosiál katak, ida ne’e revolver. Ita seidauk hatene. Bá ida-ne’e, departamentu investigasaun kriminál mós aprezenta ona kazu ne’e bá Ministériu Públiku, ami halo tiha ona identifikasaun, halo tiha rekonstrusaun iha fatin akontesimentu nian, ami aprezenta ona bá Ministériu Públiku ho NUK 003/2025PNSIK,” João Belo informa.

PNTL liuhosi DIKN, husu mós apoiu bá parseiru sira, hodi halo ezame bá projetil, ka bala-musan ne’ebé Polísia hetan, tanba PNTL rasik nia aparellu seidauk sufisiente, nune’e, sira husu apoiu bá parseiru sira, hodi hala’o ezame balístiku, bá projetil ne’ebé mak polísia hetan.

Prosesu investigasaun bá kazu ne’e rasik seidauk konklui, nune’e, João Belo, husu apoiu bá komunidade ka ema ruma, ne’ebé mak karik haree ema ruma tiru iha tempu ne’ebá, atu informa bá Polísia atu nune’e fasilita sira bele halo prosesu investigasaun ne’ebé kle’an.

Hatán kona-bá kazu sira ne’e akontese nune’e, karik tanba Polísia deskonfia iha grupu organizadu ruma, Komandante João Belo, lakohi halo komentáriu naruk, tanba iha loron ne’ebé mak hanesan mós 01 fulan-Janeiru 2025 diferente oras, mosu mós kazu insidente ida iha área Munisípiu Dili nian, iha ne’ebé rezulta alin feto ida ho naran Agresiela Pie da Costa, idade tinan-ha’at (4), hetan mós tiru hosi ema deskoñesidu.

“Iha kazu insidente ida ne’e, la’ós tiru direita, maibé kilat-musan monu kona nia-ain, no oras ne’e halo hela tratamentu iha HNGV,” komandante João Belo, informa.

Jornalista: Rogério Pereira Cárceres