PM Xanana Delega Formalmente Podér SNI ba Ministru Agio Pereira

Hatutan.com, (23 Janeiru 2025), Díli- Primeiru-Ministru (PM), Kay Rala Xanana Gusmão delega formalmente podér Servisu Nasional Intelijénsia (SNI)  ba Ministru Prezidénsia Konsellu Ministru, Agio Pereira, liuhosi Despaxu Nú. 01/PM/1/2025, ne’ebé publika iha loron 20 fulan-Janeiru 2025.

Lee Mós: Xanana Enkoraza PCIC Servisu Onestu no Profisionál, Koopera ho PNTL-SNI

PM Xanana halo enkontru ho Ministru Agio Pereira no mós Diretór Jerál SNI, Longuinhos Monteiro. Foto/Espesiál

Bazeia ba Despaxu Númeru 01/PM/1/2025, ne’ebé Hatutan.com sita husi Jornál da República, Kuarta (22/01/2025), informa despaixu PM Xanana nian  ne’e fó importánsia ba desizaun ida-ne’e ho konsiderasaun “Importante atu asegura protesaun ne’ebé efetivu iha akompañamentu ba Servisu Nasional Intelijénsia (SNI) iha ninia misaun importante ba produsaun informasaun ne’ebé kontribui ba protesaun ba independénsia no interese nasionál, seguransa interna no esterna, no prevensaun ba terrorizmu, espiaun no krime organizadu.

Reforma no restaura imediatu SNI hodi asegura integridade no profisionalizmu iha instituisaun ida-ne’e, sai hanesan kompromisu ida-ne’ebé Primeiru-Ministru Kay Rala Xanana halo iha nia diskursu iha loron 01 fulan-Jullu 2023 iha tomada de posse membru IX Governu Konstitusional sia nian.

Hodi kumpre kompromisu ne’e, iha loron 5 fulan-Setembru tinan 2023, Ministru Agio Pereira, ne’ebé reprezenta Primeiru-Ministru, fó pose ba  Longuinhos Rabindranath Tagore Domingues de Castro Monteiro ho Egas de Araújo Moniz nu’udar Diretór Jerál no Vise-Diretor-Jeral, respetivamente, husi Servisu Nasional Intelijénsia.

Iha serimónia pose ba lideransa foun SNI nian, Ministru Agio Pereira hateten katak intelijénsia, hanesan servisu ida-ne’ebé sensitivu teb-tebes ba Estadu, la’ós siénsia ezata maibé nu’udár arte ida ne’ebé ninia evolusaun presiza liu iha disiplina, kriatividade no inovasaun barak.

Jornalista: Vito Salvadór