Ró Ilegal Tong Yang Fu Rui husi Vietnam Tula Simente

Hatutan.com, (10 Setembru 2025), Díli-Ekipa konjunta halo ona inspesaun  ba sasán sira iha Ró ilegal Tong Yang Fu Rui husi Vietnam  ne’ebé identifika simente  mak nakonu maibé laiha dokumentu  Bill of Lading (B/L).

Lee Mós: Ekipa Konjunta Halo Inspesaun ba Ró Ilegal Tong Yang Fu Rui husi Vietnam

Kapitaun Portu Díli, Tenente Raul Correia. Foto/Juvinal Cabral dos Santos

Kapitaun Portu Díli, Tenente Raul Correia ba jornalista sira iha Portu Díli, Kuarta (10/09/2025), informa, prosesu inspesaun konjunta nia kontinuasaun konsege lori crew kapitaun ró Tong Yang Fu Rui nian ho nia xefe enjenaria mai iha portu Díli para verifika informasaun ho ajénsia nune’e mós nain ba sasan.

Ekipa konjuta sira kompostu husi  FALINTIL-Forsa Defeza Timor-Leste (F-FDTL), liu husi komponente Naval, Polísia Nasional Timor-Leste (PNTL) Diresaun Servisu Investigasaun Kriminál (DSIK) ho Unidade Polísia Maritíma (UPM) no Alfándega ka Autoridade Aduaneira.

“Bill of Lading ne’e ita hatene katak, ne’e dokumentu sira ne’ebé mak importante katak ró ida tula sasán husi ne’ebá mai nia tenke haruka uluk ona Bill of Lading mai iha Ajénsia,” Tenente Raul Correia hateten.

Kona-bá sasán ne’e kompetensia Alfándega atu halo prosesu tanba ne’e, Alfándega rekolla hotu tiha informasaun sira ne’e depois sira mak haree prosesu bá oin halo oinsá.

Prosesu investigasaun lao hela husi Diresaun Servisu Investigasaun Kriminal (DSIK) sira haree ida ne’e ba oin sasán atu hatun ka la hatun.

Iha Ro Tong Yang Fu Rui husi Vietnam ne’e ema  hamutuk nain-10 mak iha laran, na’in-8 husi Indonézia no na’in-rua  husi Xina.

Jornalista: Juvinal Cabral dos Santos