Hatutan.com, (09 Setembru 2025), Díli– Ekipa konjunta kompostu husi FALINTIL-Forsa Defeza Timor-Leste (F-FDTL) husi Unidade Naval ho Polísia Nasionál Timor-Leste (PNTL) no Autoridade Aduaneira ka Alfándega, Tersa (09/09/2025), halo inspesaun ba ró Tong Yang Fu Rui husi Vietnam tanba Sistema deteta numeru identifikasaun International Maritime Organization (IOM) hatudu ró ne’e illegal.

Ró ne’e atraka iha Portu Tibar, maibé dokumentu laiha no laiha informasaun ba Portu Tibar. Ho nune’e, mak la atoriza tama iha Portu Tibar nia laran.

Ró Ilegal Tong Yang Fu Rui husi Vietnam para hela iha tasi-klaran besik Portu Dili. Foto/Juvinal Cabral dos Santos

“Husi Portu Tibar informa katak Ró Tong Yang Fu Rui husi Vietnam la iha Bill of Lading ho nune’e mak Alfándega la aturiza nia atu hatun sasan iha Portu Tibar, husi ami nia parte ami halo konfirmasaun iha Diresaun Nasional Transporte Maritima (DNTM) katak Ró iha dokumentu, nia iha problema mak sasan. Tanba ida ne’e mak ami solisita halo inspesaun konjunta ida entre autoridade maritima, Alfándega, DNTM, UPM, DSIK oinsá atu halo konfirmasaun ba informasaun ne’ebé mak ami simu,” Kapitaun Portu Díli, Tenente Raul Correia ba jornalista.

Deskonfia mak Bill of Lading ne’e la iha serteza, Alfándega labele aturiza hodi deskarga ninia sasan.

Bill of Lading (B/L) maka dokumentu legál ida ne’ebé serve hanesan resibu ba sasán sira, kontratu transporte nian, no prova propriedade nian ne’ebé fó sai hosi transportadór ba karregador. Dokumentu ida-ne’e fó detallu kona-bá tipu, kuantidade, no destinu sasán sira ne’ebé maka transporta, no sai hanesan prova katak sasán sira simu ona ba transporte no sei entrega ba destinatáriu ne’ebé maka dezignadu.

“Agora dadauk seidauk bele halo konfirmasaun ba nia aktu sira, maibé deskonfia katak nia dokumentu la iha, Ró agora ami diriji ona husi  Portu Tibar mai angkor iha Portu Díli, depois halo investigasaun atu bele halo konfirmasaun  sasan saida-saida mak iha laran,” Tenente Raul Correia hateten.

Depois investigasaun la’o mak  sasán sira ne’e kuandu sasán sira ne’e la tuir rekizitu ne’ebé atu tama iha Timor-Leste, maka Alfándega  sei  aplika sansaun.

Tuir observasaun Hatutan.com iha terenu  autoridade maritima liuhusi konversa Ró husi Portu Tibar halehu tuku 03:30 Otl resin mak mai  to’o iha besik Portu Díli, tuku  06:00  lorokraik maibé labele atraka iha Portu Díli tanba bazeia ba regra husi DNTM.

Ró refere para dook husi Portu Díli, ekipa konjunta loraik ne’e ba halo apreensaun uluk dokumentu kona-bá sasan iha Ró laran. Nune’e autoridade F-FDTL informa ba jornalista sira katak aban hale’u tuku 09:00 otl mak autoridade ho ekipa sei tama ba Ró laran hodi halo inspesaun konjunta, maibé tuir informasaun iha terenu deskonfia Ró tula sasan konstrusaun hanesan simenti inklui sasan seluk ne’ebé seidauk halo identifikasaun serteza.

Jornalista: Juvinal Cabral dos Santos