PNTL Submete Ona Kazu Dirijente SNI Hatama Fugetes Ba Ministeriu Públiku

Hatutan.com, (12 Novembru 2025), Díli– Polísia Nasional Timor-Leste (PNTL) submeter ona kazu importa sasan kontra bandu (fugetes) ne’ebé envolve husi dirijente Servisu Nasionál Intelijénsia (SNI) na’in-rua, foin lalais ne’e.  

Lee Mós: Injustisa Bainhira Husik Livre Dirijénte SNI Na’in-Rua Lori Sasán Kontra Bandu

Komandante PNTL Munisípiu Liquiça, Superintendente Polísia Calisto Gonzaga. Foto/Juvinal Cabral dos Santos

Komandante PNTL Munisípiu Liquiça, Superintendente  Polísia Calisto Gonzaga,  Kuarta (12/11/2025), informa  kazu  direjente SNI na’in-rua ne’ebé lori  sasan kontra bandu iha karreta Estadu submeter on aba MP no faze tuir mai kabe ba kompeténsia MP nian.

“Prosesu ne’e mak tenke ita apár. La kualker kazu ida tenke  flagante delitu, la kualker kazu ida prosesu normal, ita haree nia sirkuntánsia ne’e. Tanba ami hetan ona informasaun ne’e mak mai entrega ne’e, tanba ne’e mak ita prosesu normal,” Superintendente  Polísia Calisto Gonzaga, haktuir ba jornalista sira bianhira serimonia lansamentu projetu konstrusaun Kuartél Jerál PNTL iha Caicoli, Dili.

Komandante Polísia  Munisípiu Liquiça ne’e afirma, kazu kontra bandu ne’e ilisitu mésmu liu husi deskamiñu, liu husi dalan estadu nian, maibé la rjejistu, portantu liuhusi prosesu normal hatama ona kazu ne’e ba iha Ministériu Públiku (MP).

Nia hatuir, autoridade seguransa PNTL hasae ona kazu ne’e ba iha Ministériu Publiku nune’e hein nafatin parte MP atu foti medida saida tuir mai.

“Ha’u fiar katak prosesu ne’e la’o, importante prosesu ne’e la’o, ita la taka buat ruma ba públiku. Suspeitu na’in-rua nu’udár dirijente SNI ne’e sala ne’e sala sira tenke responsabilidade iha Leí nia oin,” Calisto Gonzaga hateten.

Fugetes sira ne’ebé dirijente SNI transporta ho karreta Estadu ne’e mak hanesan fugetes shoot 8 hamutuk 24, 8 shoot hotu maibé ida 0,85, ida seluk 1,96 ne’ebé hamutuk lolon 90 resin ne’e dirijente SNI na’in-rua ne’e sosa partikular iha Atambua-Indonézia.

Sasán kontra bandu ne’e, deskonfia dirijente nain-rua husi SNI ho naran inisial OCG no AJdRX, sosa iha Atambua-Indonézia, transporta iha karreta Estadu marka Baic ho Sapa Matrikula 05.424 G.

Dirijente SNI na’in-rua; feto ida no made ida ne’e, sosa fugetes sira-ne’e  bainhira sira fila husi Rejiaun Administrativa Espesial Oé-Cusse Ambenu (RAEOA) liu hosi Atambua-Indonézia.

Forsa konjunta PNTL ho FALINTIL-Forsa Defeza Timor-Leste (F-FDTL) halo operasaun iha Aldeia Ediri, Suku Vatuvou, Postu Administrativu Maubara, Munisípiu Liquiça, konsege halo apreensaun ba sasan kontra bandu sira-ne’e no halo identifikasaun ba dirijente SNI na’in-rua ne’e.

Bainhira forsa konjunta halo apreensaun ba evidensia sasán kontra bandu hanesan fugetes ho karreta ne’ebé dirijente SNI nain rua utiliza ne’e kontinua entrega ba parte Servisu Investigasaun Kriminál Munisípiu Liquiça hodi submete ba prosesu indentifikasaun tuir lei ne’ebé vigora iha Timor-Leste.

Dadaun ne’e Servisu Investigasaun Kriminál Munisípiu Liquiça halo prosesu bá sasán kontra bandu hirak ne’e rejista ona ho NUK. 0068/25.LIMBR, kontinua aprezenta bá Ministeriu Públiku (MP) hodi kontinua prosesu tuir lei ne’ebé vigora.

Jornalista: Juvinal Cabral dos Santos