Ramos-Horta Orgullu Lansa Múzika “Tebe Hamutuk” ho “O Ha’u Fuan” Hananu Husi Kris Dayanti-Amora Lemos Kolabora ho Artista Joven Timoroan

Hatutan.com, (27 Novembru 2025), Díli-Prezidente Republika Demokrátika Timor-Leste (PR-RDTL), José Ramos-Horta hamutuk ho Vise-Primeiru Ministru no Ministru ba Asuntu Sosiál, Ministru Dezenvolvimentu Rurál no Abitasaun Komunitária, Mariano ‘Assanami’ Sabino, Kinta (27/11/2025),  ofisialmente asiste lansamentu múzika “Tebe Hamutuk ” ho  “O Hau Fuan” ne’ebé hananu husi  Diva Pop Indonézia, Kris Dayanti  ka koñesidu ho naran sigla KD hamutuk ho nia oan doben Amora Lemos ne’ebé kolabora ho artista joven Timoroan, Zeferino Martins Soares ho Deonizio de Jesus Ataide.

Lee Mós: KD-Amora ho Ataide no Grupu Lé-Zeaval Hahú Foti Filmajen Múzika “Tebe-Tebe” iha Rabilau

Sesaun foto hamutuk ho Prezidente Repúblika, José Ramos-Horta ho Vise-Primeiru-Ministru Mariano ‘Assanami’ Sabino Lopez iha ámbitu lansamentu ofisiál múzika “Tebe Hamutuk” ho “O Hau Fuan” ihs Palásiu Prezidensiál, Kinta (27/11/2025). Foto/Juvinal Cabral dos Santos

Serimónia ofisiál lansamentu múzika album dahuluk KD-Amora Lemos ho Zeferino Martins Soares no Deonizio de Jesus Ataide iha lian ofisiál Timor-Leste ka Tetun ne’e, hahú ho dere tambor  husi Amora Lemos ho Kellen Lemos iha fatin serimonia iha Palàsiu Prezidensiál.

Raul dos Reis Lemos, nu’udár Produser Ezekutivu Raya Múzika no marido husi Kris Dayanti ka aman ba Amora Lemos ho Kellen Lemos iha nia deskursu  hateten,  orgullu boot, inisia no dezeña múzika  Tetun “Tebe Hamutuk” no  “O Ha’u Fuan” ne’ebé lansa ofisiál iha ambitu komemorasaun ba dala-50 Proklamasaun Independénsia Timor-Leste, 28 Novembru 1975-28 Novembru 2025.

Múzika “Tebe Hamutuk ho “O Ha’u Fuan” nu’udár obra ka kria rasik hasi artista joven Timoroan, Zeferino Martins Soares ho Deonizio de Jesus Ataide ho nia aranju ka arranjadór mūzika maka Popo Hanato.

Muzika “Tebe Hamutuk” ho “O Hau Fuan” nu’udár parte ki’ik ida ne’ebé família Raya Múzika, liuliu Raul Lemos hanesan na’in ba empreza Raya Múzika no Raua Média & Entertainment, hakarak kontribui dala ida tan ba promove lian Tetun no mós promove turizmu no kultura Timor-Leste nian iha mundu liu husi múzika.

Produser Ezekutivu Raya Múzika, Raul dos Reis Lemos haktuir, muzika “Tebe Hamutuk” ho “O Hau Fuan” ne’ebé nia filmajen foti iha sitiu turistiku kultural iha Rabilau, Postu Administrativu Maubisse, Munisípiu Ainaro ho mós filmajen balun foti iha Dili, hanesan múzika kontemporániu ne’ebé ik Raul Lemos mak sai hanesan produser ezekutivu no Raya Múzika hanesan gravadora hodi kolabora mos ho grupu dansa kulturál Le-Ziavál

Muzika “Tebe Hamutuk” ho “O Hau Fuan” ne’e hatudu espiritu no paixaun kulturál ne’ebé refleta iha vistuariu kolaboradór sira iha vídeo  kliip ba múzika ne’e utiliza  instrumentu kulturál sira, hanesan babadok, tais, belak, kaibauk, bibi-fulun no asesoria kulturál nian seluk tan.

“Hein katak Tumoroan sira no ita hotu sei simu ho di ak no kontinua kuda espiritu hamutuk no unidade iha kultura Timor-Leste nian,” Raul dos Reis Lemos hateten.

Raul Lemos nu’udár na’in ba média Hatutan.com ne’e   hatetne múzika rua ne’e bele fó satisfasaun ba publiku Timor-Leste no Timor-oan sira hotu iha rai-laran no iha diasporta.

“Ha’u ho ha’u nia kaben Kris Dayanti sigla KD ho mós ami nia oan doben Amora Lemos ho Kellen Lemos, kontenti no orgullu tebes oferese ba ita-boot sira kanananuk “Tebe Hamutuk” ho ritmu ksolok no dahur nu’udár kontirubisaun ida promove ita Timoroan nia kultura no ita Timoroan nia lian. Alem de ne’e, múzika ne’e mós nu’udár oferta simples ida husi ami família ba Timoroan hotu iha rai-laran no rai-li’ur ne’ebé komemora tinan-50 proklamasaun independénsia, 28 fulan-Novembru 2025 ho mós ita-nia adezaun Timor-Leste nu’udár membru estadu ASEAN ba dala-11,” Raul Lemos hateten.

Kaben-na’in selebridade sira, Raul Lemos ho Kris Dayanti nia oan doben Amora Lemos ho Kellen Lemos baku tambor hodi ofisializa lansamentu múzika Tetun “Tebe Hamutuk” ho “O Hau Fuan”. Foto/Juvinal Cabral dos Santos

Produsaun ba múzika “Tebe Hamutuk” ho “O Hau Fuan” ho lian-Tetun la’o lalais tebes, hahú hosi kriasaun lirika, múzika, gravasaun, no video kliip to’o nia lansamentu ne’e hetan apoiu másimu husi Prezidente Repúblika, José Ramos-Horta.

Iha biban ne’e Prezidente Repúblika José Ramos-Horta hateten, nia ho orgullu partisipa iha lansamentu múzika “Tebe Hamutuk” ho “O Ha’u Fuan” parte ida hametin relasaun amizade Indonézia ho Timor-Leste hodi inspira juventude Timoroan sira.

“Ami agradese tebes ba Raul Lemos, ba Kris Dayanti ho oan Amora, no ba ekipa tomak, ha’u hanoin iha grupu, bailarina, kantór, tanba lansa ida ne’e iha Timor-Leste. Ha’u foin haree ida-ne’e, furak, halo ho di’ak tebes iha aspetu hotu-hotu, aspetu tékniku, artístiku, no seluk tan,”Xefe Estadu Timor-Leste  hateten.

Prezidente Repúblika José Ramos-Horta agradese kle’an  tebes ba Kris Dayanti, ba tinan barak dedikasaun ba Timor-Leste, ba relasaun Indonézia ho Timor-Leste, hodi inspira juventude Timoroan sira no mós ba Amora Lemos.

“Joven Timoroan hateke aas ba Amora. Timoroan gosta tebes múzika. Kuaze timoroan hotu-hotu maka bailarina, maka kantór, no tanba ne’e furak tebes katak Kris Dayanti ho nia profisionalizmu ajuda promove ita-nia joven sira, promove kultura Timor nian, no aspetu sira seluk iha Timor-Leste hanesan turizmu, mergullu, mergullu ida ne’ebé di’ak liu iha mundu. Entaun ita presiza iha belun Indonézia barak liután mai vizita,” Ramos Horta esplika.

Iha fatin hanesan Vise-Primeiru-Ministru Mariano ‘Assanami’ Sabino Lopez hateten, múzika ne’ebé lansa “Tebe Hamutu” ho OP Hau Fuan” refleta tebes ba Prezidente Repúblika nia vizita iha rai barak ne’ebé mak funu beibeik, iha diskursu hotu-hotu sempre ko’alia nafatin oinsá mak respeitu dignidade umanu.

“Oinsá mak ita respeitu dignidade umanu, ema nia liberdade, ne’ebé muzika ida ne’e inspira mós ba jerasaun foun no ita hotu momentu ida ne’ebé sertu duni. Momentu ida ne’ebé ita selebra tinan ba dala-50 ita-nia Proklamasaun independénsia ne’ebé ita apresia ba Banku Nasional Timor-Leste (BNCTL) banku Mandiri, Aero Dili, Telkomce, ho Hotel Plaza. Úniku Aero Dili mak semo ho ita nia bandeira ne’ebé sempre orgullu ho Aero Dili,” Mariano Assanami Sabino Lopez hateten.

Vise-Primeiru-Ministru Timor-Leste ne’e fó apresiasaun kle’an ba família emprezariu Timoroan,  Raul Lemos ne’ebé halo ezersísiu prodús múzika ida ne’ebé mak relevante tebes sei viral no joven sira sei kanta iha ámbitu selabrasaun tinan-50 proklamasaun independénsia hodi halo afirmasaun ba estadu Timor-Leste.

“Ita halo kompromisu onra ba ita-nia rai  oinsá mak sai Timoroan ne’ebé útil ba  ita nia nasaun, oinsá mak sai Timoroan ne’ebé mak luta nafatin ba pás, estabilidade no luta nafatin para dignifika ita-nia umanidade. Luta nafatin ba valores ne’ebé mak ita ratifika tiha ona,” Asanami  Sabino Lopez hateten.

Planu Konvida Artista Timoroan ho Indonézia iha Kooperasaun Múzika

Prezidente Repúblika, José Ramos-Horta ho orgullu lansa múzika Tetun, “Tebe Hamutuk ho “O Hau Fuan” ne’ebé hananu husi Kris Dayanti-Amora Lemos ho artista joven Timoroan Zeferino Martins Soares no Deonizio de Jesus Ataide. Foto/Juvinal Cabral dos Santos

Iha lansamentu múzika Tetun “Tebe Hamutuk” ho “O Hau Fuan” ne’e Kris Dayanti, kompromete konvida artista hotu-hotu hosi área hotu-hotu, inklui sira husi Jakarta, atu grava iha Timor-Leste, kooperasaun entre nasaun sira la’ós de’it governu sira mak hala’o, maibé mós komunidade sira mak hala’o.

Kris Dayanti haktuir, maske lian Tetun ne’ebé defisil, maibé la sai bareira atu kontinua aprende liuhosi google no mós hamutuk ho Timoroan sira hodi bele kanta muzika ho diak.

 “Loron-loron ha’u obriga an aprende Tetun. Google sai hanesan tradutór lian internasionál ida. Ida-ne’e orgullu ida, ha’u kaben  besik tinan 15 susar mai ha’u atu aprende Tetun. Tanba ha’u-nia domisíliu ezije ha’u tenke serbisu iha Jakarta. Entaun, ida-ne’e bele sai tempu ida ne’ebé susar ba ha’u atu aprende, maibé hakarak atu aprende nafatin. Espera katak, uza knananuk sira maka dalan ida ne’ebé fasil atu aprende lian ida no ha’u-nia esperansa ba oin, klaru katak, kolaborasaun ida-ne’e sei loke odamatan, hanesan Vise-Primeiru-Ministru afirma antes ne’e, ba múzika Timor-Leste nian, hodi kolabora ho kantór sira husi mundu tomak,” Kris Dayanti esplika.

Nia dehan, nu’udar Timor-Leste nu’udar nasaun ida no nu’udar kolesaun ida hosi nasaun sira ne’ebé ko’alia lian portugés, potensiál ba kantór internasionál sira aumenta daudaun. Karik kantór barak iha Portugál mós iha interese atu aprende Tetun, hanesan ita hatene sira prepara hela estúdiu gravasaun ida ho ekipamentu ho padraun internasionál iha Dili.

“Ha’u sei konvida artista hotu hosi área hotu-hotu, inklui sira husi Jakarta, atu grava iha ne’e no ha’u mós sei konvida artista sira husi Jakarta atu koko estúdiu iha Dili. Hanesan ha’u temi ona, kooperasaun entre nasaun sira la’ós de’it governu sira mak hala’o, maibé mós komunidade sira mak hala’o. Ami iha kultura ne’ebé hanesan, no ami iha buat barak ne’ebé hanesan. Ita rua maka nasaun ne’ebé maka luta uitoan. Iha kultura ida ne’ebé ita tenke kontinua, no iha ideál sira ne’ebé ita tenke tane aas,” Kris Dayanti tenik.

KD haktuir Aman fundadór Estadu RDTL sira barak mós mensiona atu Amora Lemos tenke sai mós Timor-Leste nia oan no ne’e la iha dúvida. Tanba ne’e, Amora Lemos tenke orgullu hodi hananu knananuk Timor-Leste nian.

“Entaun, ha’u-nia ideál no esperansa ba futuru mak klaru, oinsá halibur no inspira joven sira iha Timor-Leste. Ita tenke hamoris estasaun rádiu sira iha Timor-Leste. Aleinde televizaun nasionál, ita mós tenke hakonu Timor-Leste ho knananuk sira. Ha’u hanoin sei iha oportunidade barak ba ita atu servisu hamutuk iha futuru,” Kris Dayanti tenik.

“Agradese ba Maromak, ami iha oportunidade iha loron hitu nia laran, ami bele foti filmajen iha Maubisse, no  iha tempu ne’ebá natureza no komunidade suporta tebes ami, maski udan-been, kalohan taka uituan, maibé ema hotu-hotu entuziasmu atu bele halibur, no produz video kliip  ida hanesan ne’e. Ema estranjeiru sira mós gosta haree vídeo kliip ne’e.”

Iha fatin hanesan Deonizio de Jesus Ataide hanesan artista Timoroan kontente tebes hetan oportunidade  kolabora ho Diva Pop Indonézia Kris Dayanti ho nia oan doben Amora Lemos.

“Orgullu,  artista Timoroan ida  kanta hamutuk ho artista famoza Kris Dayanti ne’ebé konsidera level as, maibé parte ida bele hatudu ona kultura no turizmu Timor-Leste nian ba mundu atu konhese di’ak liután,” Deonizio de Jesus Ataide hateten.

Muzika “Tebe Hamutuk” ho “O Hau Fuan”  automatika sei lansa mós iha plataforma mūzika dijitál hotu, inklui Spotify, Apple Music, YouTube Music, TikTok Music, no Langit Musik. Klip video ne’e sei transmite iha YouTube @krisdayanti_id, Raya Media & Entertainment no Raya Múzika.

Jornalista: Juvinal Cabral dos Santos