Hatutan.com, (29 Setembru 2025), Ainaro-Diva pop Indonézia, Krisdayanti ka konhesidu ho naran KD hamutuk ho oan feto Amora Lemos kolabora ho artista Timoroan, Deo Ataide no grupu dansa kulturál Lé-Zeaval, hahú foti filmajen ba múzika “Tebe-tebe” iha sitiu turistika Rabilau, Postu Administrativu Maubisse, Munisípiu Ainaro, Domingu (28/09/2025).  

Lee Mós: Raul Lemos-Krisdayanti Promove Turizmu Timor-Leste Liu Husi Múzika

Raul Lemos ho KD no oan doben sira partisipa iha ritu kulturál molok foti filmajen iha seitiu turistiku Rabilau, Maubisse. Foto/Juvinal Cabral dos Santos

Múzika Tetun rua; “tebe-tebe” ho pop mak espoza husi emprezariu Timoroan, Raul Lemos ho sira-nia oan feto Amora Lemos kolabora ho artista Timoroan, Deo Ataidi & Zeffsom Soares sei halo lansamentu iha fulan-Novembru, tinan ne’e, ba album espesiál promove turizmu Timor-Leste ba mundu.

Iha filmajen múzika rua ne’e, barak liu sei utiliza fatin tirusmu sira iha Timor-Leste, hanesan iha Kristu Liurai, área Branca, Tasi-Tolu, kampál misa papa João Paulo II ho kampál misa papa Francisco, inklui mós sei foti filmajen iha Ataúro.

Filmajen ba múzika rua iha lian Tetun ne’e, autora ho autor sira ne’ebé envolve iha filmajen, liuliu grupu dansa kulatura Lé-Zeaval sei hatais tais hodi dahur no tebe-tebe.

Iha serimonia foti filmajen iha Rabilau ne’e, Raul Lemos nu’udár inisiadór no kaben husi Diva Pop Indonézia Krisdayanti hateten, sira-nia parte haksolok tebes bele kontribui promove poténsia turizmu Timor-Leste liuhusi múzika.

Prezensa grupu boot ne’ebé envolve iha múzika “tebe-tebe” no múzika pop iha Rabilau simu ho kultura Maubisse nian, dadolin no dahur husi no  simu bua-malus husi lia nain Rabilau.

Emprezáriu Timor-oan Raul-Lemos hamutuk ho nia kaben Krisdayanti reprezenta ekipa simu bua-malus ne’e hanesan simbolu matak-malirin tuir kultura Maubisse nian. Lia-nain sira esplika bua-malus ne’e la’ós obriga tenke mama, maibé ne’e tradisaun ida simu vizitante tenke look.

“Agora kona-ba ita nia kultura hanesan ohin ne’e buat ida mama-malus ha’u mama to’o bei-beik ona, ha’u nia uma lisan inan nian iha Same, ha’u nia aman nian iha Liquiça ne’ebé ha’u toman no ba bei-beik ne’ebá mama malus ne’e toman ona mama tolan de’it, buat ida lisan ne’e ita tenke respeitu tanba ita moris mai ne’e husi lisan mak ita iha,” Raul Lemos hateten.

Iha foti filmajen ne’e Raul-Lemos hamutuk oan mane Kellen Alexander Lemos baku titir no KD no  oan doben Amora Lemos kolabora ho artista Timor-oan Ataide  mak kanta. Grupu dansa  Lé-Ziaval, inklui inan aman Lia-Nain sira husi Maubisse ne’ebé partisipa uza vestuariu tais Ainaro nian.

Na’in bá Raya Media and Entertainment no  Hatutan.com dehan, sira haksolok tebes ho inan-aman no joven sira nia tempu bele halibur hamutuk iha fatin sitiu turistiku Rabilau.

Raul Lemos espera  sira-nia prezensa bele halo filmajen ho di’ak tanba la’ós halo filmajen de’it maibé ho muzika Tetun rua.

“Muzika tetun rua ne’ebé kanta husi ha’u nia kaben ho ha’u nia oan muzika tebe-tebe ida no muzika ema dehan Pop ho Tetun, tanba ne’e mak ha’u haree Rabilau ne’e filmajen muzik tebe-tebe kultura ita hatais ita nia tais, hatudu ita nia identidade katak ami Timor ne’e ami nia kultura no hatais mak ne’e.”

Iha fatin hanesan lia-nain Domingos hateten sira kontente tebes tanba ekipa boot ida ne’e ho inisiativa rasik hodi promove nia turismu no identidade kultura Timor-Leste ba iha mundu.

“Ami kontente, hafurak tan ami nia turismu ne’e ba sira jerasaun foun no ba mundu tomak ne’e ami moós gosta filmajen ne’e mak los Rabilau ne’e tenke haburas tanba mai ho hatais kultura ne’e di’ak tebes,”  Domingos hateten.

Xefe Suku Maubisse Villa, Wilson Nivio Mendonça, hateten,  prezensa emprezáriu Timor-oan Raul-Lemos hamutuk ho nia kaben diva pop Indonézia Krisdayanti ka KD no ho oan doben Amora Lemos ne’ebé kolabora ho artista Timor-oan; Ataide ne’e inisiativa ida ne’ebé hanoin di’ak ba nia rai turismu Timor-Leste.

“Artista Krisdayanti ema ida koñesidu iha Indonésia liu-liu iha palku múzika nian, hanesan mós eis membru Parlamentu Indonézia nian, ami sente kontente tebe-tebes tanba bele hili Maubisse liu-liu sitiu turistiku Rabilau sai hanesan fatin ida ne’ebé  sira bele hlao vídeo klip ba iha  múzika”, Xefe Suku Maubisse Villa, Wilson Nivio Mendonça hateten.

Liuhusi vídeo klip múzika ne’e  parte importante ida promove turistiku Rabilau, intensaun ida ne’e prezensa hahu dezenvolve agora  liuhusi promosaun video ne’e  bele hatrai turista sira bele mai tan para haree paisagem furak iha Maubisse.

Tuir nian, vizita ida ne’e hanesan pontu importante ida hodi loke setór privadu sira para iha futuru servisu hamutuk ho governu, parte Ministeriu Turismu  mós  atu bele tau atensaun liu-liu ba iha fasilidade estrada, eletresidade, bee-moos ba fatin sira sitiu turistiku.

Autoridade lokal  husu nafatin ba governu atu investe maka’as ba setór turismu, tanba ne’e labele depende mina, tanba mina hahu la produtivu no kapasitasaun ema  para konvense setor privadu sira.

Jornalista: Juvinal Cabral dos Santos