Justisa & Krime
20 Outubru-ne’e, Tribunál Díli realiza julgamentu ba argiudu sira iha kazu Set-Top Box RTTL, E.P
Hatutan.com, (15 Outubru 2026), Díli— Tribunál Judisiál Primeira Instánsia Díli (TJPID) ajenda ona audénsia julgamentu ba arguidu na’in-rua ne’ebé komete kazu projetu instalasaun Set-Top Box (STB) Rádiu Televizaun Timor-Leste, Empreza Públika (RTTL,E.P).
Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, presta deklarasuan iha CAC hanesan arguido, Kuarta 04 Janeiru 2023. Foto/Dok. Hatutan.com
Tuir informasaun ne’ebé Hatutan.com rekolla husi ofisiál justisa iha Tribunál Judisiál Primeira Instánsia Díli, katak kazu projetu instalasaun Set-top box RTTL, E.P, ajenda ona ba loron 20 fulan-Outubru, tinan ne’e, ne’ebé konstitui arguidu-na’in-rua, no sasin kuaze na’in-hitu. Maibé to’o agora sasin balu, seidauk kumpri notifikasaun tribunál nian, makse tribunál ajenda ona hodi hahú audénsia julgamentu iha fulan-ne’e.
Hanesan notisia sira ne’ebé Hatutan.com públika antes ona iha tinan sira liubá katak kazu projetu instalasaun Set-top Box RTTL,E.P ne’e, Komisaun Anti Korrupsaun (CAC) konsege identifika prejuizu direta bá Estadu ho montante US$7,680.00 ne’ebé identifikadu liu hosi Set Top Box hamutuk-256 ne’ebé kompañia indikadu DILI ETERNAL INNOVATION INFORMATION, Lda, seidauk halo instalasaun, maibé prejuizu ne’e sei aumenta maka’ás bainhira kontinua halo inspesaun bá benefisiáriu hirak ne’ebé simu ona STB RTTL,E.P iha suku besik atus ida resin iha munisípiu lima, hanesan Díli, Aileu, Ermera, Liquiça no Bobonaro.
Lee Mós: Kazu Instalasaun Set-Top Box RTTL,E.P, CAC Notifika MAPKOMS Nia Oan-mane Hanesan Sasin
Benefisiáriu barak ba projetu instasaun STB RTTL,E.P maka seidauk halo instalasaun no benefisiáriu rasik maka halo instalasaun la’ós kompañia no prejuizu indireta seluk ne’ebé Estadu sofre hamutuk US$674,581.7. Prejuizu ida-ne’e hetan bainhira halo komparasaun entre estimasaun kustu ba instalasaun STB ne’ebé halo hosi RTTL.EP ho valór US$225.400 ho valór kontratu ba projetu ne’ebé maka asina husi Ministru asuntu Parlamentár no Komunikasaun Sosiál (MAPCOMS) altura ne’ebá ho kompañia DILI ETERNAL INNOVATION INFORMATION (DEII) Lda ho valór $899.981.70.
CAC, Kuarta, 12 Outubru 2022, halo buska no apreensaun (tau alzema/borgol), bá arguida Melánia da Silva Fernandes Capela nu’udár sosiu iha empreza DILI ETERNAL INNOVATION INFORMATION, Lda, ne’ebé tempu ne’ebá asume knaar hanesan Sekretária iha Gabinete Prezidente FFTL Francisco Martins da Costa Pereira Jerónimo, deskonfia envolve iha kazu projetu instalasaun Set-top Box RTTL,E.P. Foto/Dok. Hatutan.com
Projetu instalasaun Set-top Box/dexodificador RTTL,E.P ne’e ho nia kustu US$900,000.00, deskonfia arguidu antigu Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza DILI ETERNAL INNOVATION INFORMATION, Lda, nu’udár sósiu hosi arguida Melánia da Silva Fernandes Capela, ne’ebé tempu ne’ebá asume knaar Sekretária iha Gabinete Prezidente FFTL.
Lee Mós: CAC Sei Submete Kazu Set-top Box RTTL,E.P bá Ministériu Públiku
Bazeia bá prova investigasaun bá kazu projetu instalasaun Set-Top box RTTL,E.P, Komisaun Anti Korrupsaun (CAC, sigla portugés) konstitui ona eis MAPKOMS, Francisco Martins da Costa Pereira Jerónimo, hosi suspeitu bá arguido tuir baze legal ka Kódigu Prosesu Penál (KPP) artigu Artigu 91 (Notifikasaun), alínea 3 ne’ebé hateten, funsionáriu judisiál, ajente polisiál ka autoridade seluk ne’ebé lei fó kompeténsia maka halo notifikasaun tuir despaxu ka ho orden ofisioza hosi sekretaria judisiál (*)