Connect with us
Pakote Ahi

Nasionál

Notísia Investigativu Kazu Set-top Box RTTL,E.P Lori Hatutan.com Manan Prémiu Francisco Borja da Costa no Manan Mós Prémiu Bernardino Guterres

Published

on

Hatutan.com, (16 Outubru 2023), Balibo—Notísia investigativu kona-bá “Deskonfia, MAPKOMS nu’udár Prezidente FFTL fó Projetu iha RTTL bá Sekretaria FFTL”  lori Mídia Hatutan.com manan prémiu kategoria Francisco Borja da Costa hosi Konsellu Imprensa Timor-Leste (CI, sigla portugés).

Lee Mós : EDITORIÁL: Tinan Rua Hatutan.com, Serví Públiku ho Informasaun no Goza Independénsia

Prezidente Konsellu Imprensa Otelio Ote entrega prémiu bá fotógrafu Hatutan.com, Elio dos Santos da Costa. Foto/Tome da Silva

Hatutan.com ne’ebé foin eziste tinan-rua (2021-2023) no  bá prémiu Konsellu Imprensa nian tinan 2023 iha ámbitu komemorasaun dahuluk loron nasionál liberdade imprensa iha knua naran laek Balibo, Munisípiu Bobonaro, 16 fulan-Outubru ne’e, Hatutan.com simu prémiu rua ho kategoria rua; kompostu hosi prémiu kategoria Francisco Borja da Costa ho prémiu Bernardino Guterres.

Prémiu  Francisco Borja da Costa ne’e kada tinan Konsellu Imprensa atribui bá produtu Jornalístiku di’ak liu bá mídia eskrita (Jornál no Online).  Nune’e, Hatutan.com liu hosi nia ekipa ne’ebé lidera direta hosi jornalista no editor seniór Hatutan.com, Cipriano Kolo submete produtu Jornalístiku investigativu kona-bá kazu Ser-top Box Rádiu Televizaun Timor Leste, Empreza Publika (RTTL,E.P) ho nia edisaun bá notísia ne’e rasik  liu 60 hodi kompete iha prémiu refere.

Advertisement

Jornalista no fotógrafu  Hatutan.com, Elio dos Santos da Costa, mós submete nia produtu fotógrafu Jornalístiku hodi kompete iha prémiu Bernardino Guterres ne’ebé Konsellu Imprensa atribui bá kategoria foto Jornalístiku di’ak liu iha tinan 2023 nian.

Elio dos Santos da Costa submete nia fotógrafu Jornalístiku kona-bá Polísia Nasionál  Timor-Leste aperta hela manifestante ida nia kakorok hafoin Parlamentu Nasionál Kansela Sosa Karreta Foun, Reitór UNPAZ Organiza Estudante Ezije tan Alterasaun Lei Pensaun Vitalisia (LPV).

Prémiu ne’ebé jornalista no editor senior Cipriano Kolo  ho fotógrafu Elio dos Santos simu hosi Konsellu Imprensa mak hanesan trofeu, sertifikadu prémiu nian ho mós osan ho montante kada prémiu $1,500.00 nune’e prémiu rua ne’e ho total osan $3,000.00.

Sekretáriu Estadu Komunikasaun Sosiál (SEKOMS), Expedito Dias Ximenes, entrega prémiu bá jornalista no editór seniór Hatutan.com, Ciriano Kolo. Foto/Tome da Silva

Liuhosi desizaun juri no omologasaun bá desizaun juri nian hosi plenáriu Konsellu Imprensa Timor-Leste ne’ebé publika iha JORNÁL DA REPUBLICA, Kuarta-Feira, 4  Outubru  2023, Série I, N.° 37, jornalista Hatutan.com, Cipriano Kolo sai manan na’in bá prémiu Francisco Borja da Costa no Elio dos Santos da Costa, manan prémiu Bernardino Guterres ho jornalista  Constantino Xavio e Maia hosi Timor Post manan prémiu Adelino Gomes.

Bá prémiu Konsellu Imprensa ho kategoria Adelino Gomes bá reportajen Jornalístika ho lian Portugés di’ak-liu, tinan ne’e, mana hosi  jornalista Timor Post, Constantino Xavio e Maia.  Tanba hanesan manan na’in, jornalista Constantino Xavio e Maia, simu mós trofeu, sertifikadu manan nian ho osan $1,500.00.    

Membru planaria Konsellu Imprensa iha loron 29 fulan-Setembru 2023  aprova no omóloga desizaun juri sira-nian bá prémiu sira-ne’e mak, hanesan Otelio Ote (Prezidente), Benevides Correia Barros (membru), Francisco Belo Simões da Costa (membru), Amito Araújo (membru) ho Isabel Maria Fernandes de Jesus (membru).

Advertisement

Kompozisaun juri bá prémiu Konsellu Imprensa 2023 ne’ebé nomeia hosi desizaun plenáriu Konsellu Imprensa nian iha loron 13 fulan-Setembru 2023, mak hanesan  Benevides Correia Barros (prezidente juri/membru Konsellu Imprensa), Alberico da Costa Junior (membru juri), Elísio Pinto  (membru juri), Dominika Dwikori Sitaresmi (membru juri hosi akademista/Desente Komunikasaun Sosiál UNTL), Xisto Viana ( Sekretáriu ekipa juri no akademista hosi INL-UNTL).

Iha ámbitu serimónia loron nasionál liberdade imprensa, iha kalan atribuisaun prémiu Konsellu Imprensa,  Prezidente Konsellu Imprensa, Otélio Ote hateten, kada tinan CI prepara prémiu neen (6). Ida hosi prémiu neen ne’e maka prémiu bá instituisaun mídia, maibé tinan kotuk no iha tinan rua liubá laiha média ida mak konsege manán prémiu ida ne’e.

Provedór Direitu Umanu no Justisa (PDHJ), Virgílio da Silva Guterres, SEKOMS Expedito dias Ximenes ho prezidente juri prémiu Konsellu Imprensa, Benevides Correia Barros, haree hela fotografia ne’ebé lori forografu Elio dos Santos da Costa manan prémiu Bernadino Guterres. Foto/Tome da Silva

“Atu alerta bá ita katak, prémiu ida-ne’e nia valór aas tebes bá ita nia knaar loroloron nian. Tanba ne’e maka orgullu tebes bá sira ne’ebé hatene haknaar aan, hatene atu luta hodi hatuur produtu Jornalístiku ne’ebé di’ak no kontente bá ida-ne’ebé simu prémiu ida-ne’e,” Otélio hateten.

Nia dehan, bá sira ne’ebé mak kompete bá prémiu ida-ne’e, karik seidauk hetan, sei iha oportunidade ba iha tinan sira tuir-mai.

“Labele hanoin katak, prémiu ida-ne’e hanesan buat ida ne’ebé la vale. Maibé prémiu ida-ne’e hanesan istória ida bá ita nia moris, bá ita nia preforma bainhira ita moris hanesan jornalista,” nia subliña.

Ote konsidera prémiu sira ne’e tau valor aas bá ema indivíduu no valor aas ba instituisaun mídia ne’ebé jornalista ne’e serbisu bá. Tanba ne’e, Ote orgullu bá sira ne’ebé mak kompete no mós bá sira ne’ebé mak manán prémiu iha kalan ida-ne’e.

Advertisement

Prémiu Konsellu Imprensa bá tinan 2023 publika ofisiálmente iha loron 30 fulan-Maiu 2023 atu mídia nasionál hotu ne’ebé rejistu iha Konsellu Imprensa Timor-Leste bele submete sira-nia produtu Jornalístiku hodi kompete bá prémiu sira ho kategoria lima (5).

Kategoria prémiu lima Konsellu Imprensa 

  1. Prémiu Conselho de Imprensa

Prémiu ne’e oferese bá meiu komunikasaun sosiál ne’ebé mak trata ho di’ak-liu direitu báziku (bem-estar) traballadór jornalista  sira-nian, fó atensaun bá sira-nia dezenvolvimentu karreira profisionál, no asegura sira-nia independénsia no kredibilidade produsaun iha públiku. Premiu ne’e fó hanesna korajen ida hodi aumenta kualidade Jornalístiku no jestaun órgaun no meiu komunikasaun sosiál sira sai di’ak liu tan iha futuru.

  1. Prémiu Adelino Gomes

Prémiu ne’e oferese bá reportajen Jornalístika ho lian portugés di’ak-liu. Prémiu ne’e Konsellu Imprensa fó hodi rekoñese Jornalista Portugés Adelino Gomes nia kontribuisaun bá Timor-Leste nia ukun-aan iha períodu 1974-1976. Nia moris iha Marrazes, 109 Agusto 1944. Nia servisu bá RTP no iha períodu difisil liuhosi Revolusaun dos Cravos (revolusi bunga), nia kobre akontesimentu 11 fulan-Marsu 1975, inísiu guerra sivíl iha Angola no guerra sivíl iha Timor-Leste. Nia kobertura ne’e fó influensia bá Timor-Leste nia prosesu ukun rasik-aan.

  1. Prémiu Francisco Borja da Costa

Prémiu ida-ne’e fó bá reportajen jornalista bá asuntu interese umanu di’ak-liu bá kategoria mídia imprime (jornál) no online. Prémiu ne’e hanesan Francisco Borja da Costa, hodi fó rekoñesimentu bá nia produtu Jornalístiku no nia poezia sira ne’ebé fó ona inspirasaun bá juventude hodi partisipa iha luta bá libertasaun nasionál. Poeta no jornalista revolusionáriu  ne’e mate iha loron 7 fulan-Dezembru 1975 loron dahuluk invazaun Indonézia nian mai iha Díli, Timor-Leste.   

  1. Prémiu Greg Shackleton

Prémiu ne’e fó bá reportajen Jornalístiku bá asuntu interese umanu di’ak-liu bá kategoria eletróniku, rádiu no televizaun. Prémiu ne’e hanaran  Greg Shackleton atu fó rekoñesimentu bá nia kontribuisaun kobertura hosi Balibo, Bobonaro, ne’ebé fó influénsia bá Timor-Leste nia libertasaun nasionál. Hosi ninia reportajen dada mundu nia atensaun bá Timoroan sira-nia luta no hasa’e presaun mundu nian bá hapara violasaun direitu umanu  ne’ebé akontese hela. Nia nu’udár jornalista ida hosi jornalista Balibo Five na’in-lima ne’ebé mate iha loron 16 fulan-Outubru 1975 iha Balibo bainhira hala’o reportajen bá invazaun militár Indonézia   iha territóriu Timor-Leste.

  1. Prémiu Bernadino Guterres

Prémiu ne’e fó bá foto Jornalístiku di’ak-liu. Konsellu Imprensa eskolla naran Bernadino Guterres bá prémiu ne’e hodi fó rekoñesimentu bá ninia kontribuisaun iha tempu rezisténsia nu’udár jornalista Rádiu Matebian. Foto kona-bá asidente asasinatu ne’ebé hamate Bernadino Guterres ne’e dada presaun mundu nian bá violasaun direitu umanu ne’ebé akontese hela iha 1999. Iha pra no paska Referendum, Bernadino Guterres moris ha Viqueque, loron 26 fulan-Jullu 1974, membru RENETIL, jornalista Rádiu Matebian iha tempu rezisténsia. Polísia Indonézia sira oho nia iha área Kuluhun, Díli, iha loron 26 fulan-Agostu 1999, loron haat molok konsulta populár.

Jornalista : Rogério Pereira Cárceres

 

 

Advertisement

 

 

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Prezidente Repúblika Sei Asiste Asinatura Ofisializasaun TL bá OMK

Published

on

Hatutan.com, (24 Fevereiru 2024), Díli- Prezidente Repúblika (PR), José Ramos-Horta,  halo viajen bá Emiradu Arabes Unidus (EAU) hodi partisipa iha asinatura tratadu fornalizasaun Timor-Leste nian bá Organizasaun Mundiál Komérsiu (OMK) no kontinua vizita estadu dahuluk ba Laos hodi hametin liután kooperasaun bilaterál entre país amigu rua.

(more…)

Kontinua Le'e

Nasionál

PM Xanana La iha Informasaun kona-bá SEKOMS “Hatama” Funsionáriu Kazuál 109

Published

on

Hatutan.com, (22 Fevereiru 2024), Díli—Primeiru-Ministru (PM), Kay Rala Xanana Gusmão seidauk iha informasaun kona-bá Sekretaria Estadu Komunikasaun Sosiál (SEKOMS) “hatama” de’it funsionáriu kazuál 109 laliu hosi rekrutamentu normal tuir regra funsaun públiku nian.

(more…)

Kontinua Le'e

Nasionál

Repúblika Ejitu Hakarak Apoia Dezenvolve Timor-Leste iha Setór Importante Haat

Published

on

Hatutan.com, (21 Fevereiru 2024), Díli– Embaixadór Repúblika Ejitu rezidénsia iha Jakarta-Indonézia no akreditadu mós mai Timor-Leste, Yasser Elshemy, afirma Governu Ejitu nia  hakarak  apoia dezenvolve Timor-Leste iha  setór importante haat.

(more…)

Kontinua Le'e
Advertisement

Trending