Hatutan.com, (31 Maiu 2022), Díli—Prezidnete Republika (PR), José Manuel Ramos-Horta sei ko’alia ho instituisaun relevante sira hanesan Lorosa’e English Language Institute (LELI) no instituto Camões atu fornese formasaun lingua Ingleza no Portugés ba jornalista sira, hodi hasa’e liután koñesimentu linguistika.
Prezidente Timor Leste Press Union (TLPU), Cândido Alves ho ekipa hasoru malu ho Xefe Estadu Ramos-Horta, iha Palásiu Prezidensiál Bairru-Pité, Tersa (31/05/2022).Foto/Média PR.
“Liu hosi soru-mutu ho Prezidente Repúblika, lori organizasaun TLPU nia naran husu atu Xefe Estadu apoiu formasaun ba jornalista sira, liuliu iha área linguistika hanesan lian Portugés no Inglés, nune’e bele fasilita jornalista sira halo komunikasaun no hakerek ho di’ak. Prezidente Repúblika promete ona atu ko’alia ho LELI no Institutu Camões,” Prezidente Timor Leste Press Union (TLPU), Cândido Alves hateten, hafoin hasoru malu ho Xefe Estadu Ramos-Horta, iha Palásiu Prezidensiál Bairru-Pité, Tersa (31/05/2022).
Estrutura TLPU aprezenta mós ba Xefe Estadu kona-bá difikuldade no dezafiu sira ne’ebé organizasaun ne’e hasoru liuliu liga ho sede ba sekretariadu atu bele sai hanesan mahon ida ba jornalista sira hodi hala’o nia funsionamentu administrativa organizasaun nian hodi halo atendimentu ba membru sira.
Advertisement
Tuir planu, Prezidénsia Repúblika sei trata jornalista sira ne’ebé destaka iha Palásiu Prezidensiál ho dignu no sei prepara fatin própriu kompleta ho fasilidade hanesan komputadór, instalasaun Wi-Fi no sei prepara mós ai-han ruma tuir kondisaun ne’ebé iha.