Hatutan.com, (28 Dezembru 2022), Díli— Reuniaun Konsellu Ministru (KM) iha Kuarta (28/12/2022) halo aprovasaun ba projetu Dekretu-Lei, ne’ebé aprezenta hosi Ministru Defeza (MD), Filomeno da Paixão de Jesus.
Projetu Dekretu-Lei ne’e kona-bá Regulamentu Medalla Militár no Medalla Komemorativa Defeza no FALINTIL Forsa Defeza Timor Leste (F-FDTL) nian.
Lee Mós: Koñese Fasilidade Militár iha Komponente Navál F-FDTL
“Diploma ida-ne’e ho ninia objetivu atu kria no regula kondisaun atribuisaun ba modalidade medalla militár sira ne’ebé destina atu fó prémiu ba servisu ho valór aas tebetebes, ne’ebé hala’o ba FALINTIL– Forsa Defeza Timor-Leste (F-FDTL) no ba Nasaun, no mós halo distinsaun ba virtude importante ne’ebé hatudu iha servisu hosi militár sira F-FDTL nian,” Hatutan.com sita komunikadu.
Medalla militár ne’e bele mós atribui ba militár estranjeiru no sivíl nasionál ka estranjeiru, iha situasaun ne’ebé prevee iha regulamentu ida-ne’e.
Medalla militár ne’e inklui modalidade sira tuirmai ne’e: a) Valór militár; b) Krús Guerra; c) Servisu distintu sira; d) Méritu militár; e) F-FDTL; f) Komportamentu ezemplár; g) Komemorativa kampaña; no h) Komemorativa komisaun servisu espesiál sira.
Jornalista: Rogério Pereira Cárceres