Iha omilia ne’e, nia esplika Jesus mai iha mundu, atu kriatura sira bele hetan moris abundánsia. Nia moris hanesan ema, hetan terus no mate iha Kruz, no moris hias hosi mate. Bainhira hanesan sarani selebra missa, ne’e katak, fó hanoin kona-bá Jesus Nia terus, mate no moris hias.
Advertisement
Nu’udár ema sarani iha fiar bá Igreja Katólika, Padre Eko Aroon, husu ema hotu atu brani hodi hamriik, bá lia-loos, dala-barak ema tauk, atu fó sasin kona-bá lia-loos. Nu’udár sarani, ema ida-idak bele haree ninia moris hanesan viájen ida, hanesan peregrinu bá Aman-Maromak, oinsá ninia viájen depende bá ema ida-idak.
Missa agradesimentu bá komemorasaun tinan 47, trajédia Balivo 5, ne’ebé hala’o iha Igreja Parókia Santu António Balibo Vila, Munisipiu Bobonaro, Sábadu (15/10/2022). Foto Hatutan/Rogério Pereira Cárceres.
“Ita bele tuir dalan boot, ka dalan korta, depende bá ita. Maibé, bainhira ita mate, ita-nia etapa ikus ka, destinu ikus nian ita tama iha Maromak nia Reinu,” nia hateten.
Tanba ne’e, agradese bá Maromak no bá jornalista sira na’in-lima ne’ebé mai iha Timor-Leste ho objetivu di’ak, maibé sira hasoru trajédia no mate iha fatin no fakar sira rán iha TL, iha rai Balibo.
“Ita reza bá sira, nune’e sira bele hetan rahun di’ak Maromak Nian, iha reinu Lalehan. Ita mós reza bá maluk jornalista sira hotu ne’ebé servisu iha rai TL, nune’e sira bele brani atu hasoru dezafiu, hamriik metin bá lia-loos, no fó sasin bá lia-loos. Espíritu Santu sei akompaña sira, gia sira, iha sira-nia servisu, amen,” Padre Eko Aroon, harohan.
Jornalista internasionál na’in-lima hosi Televizaun Australianu ne’ebé mate iha Trajédia Balibo, iha Kinta, 13 Outubru 1975 mak hanesan, Greg Shackleton (29) no Tony Stewart (21), ne’ebé hamutuk ho Gary Cunningham (27) hosi Nova Zelándia, ne’ebé servisu iha Estasaun Televizaun Channel Seven iha Melbourne, Brian Peters (26) no Malcolm Rennie (29) hosi Inglaterra no servisu bá Estasaun Televizaun Channel Nine, ne’ebé ho sentru iha Sydney ne’e, hela iha Balibo hodi halo kobertura relasiona ho operasaun segredu Indonézia nian iha Timor Portugés.