Hatutan.com, (15 Outubru 2022), Díli—Conselho Imprensa (CI) Timor-Leste gasta orsamentu $39.200, hodi komemora tinan 47 trajédia istóriku Balibo V, iha Postu Administrativu Balibo, Munisípiu Bobonaro.

Diretór ezekutivu CI, Rigoberto Monteiro.

Orsamentu ida-ne’e, mai hosi CI rasik ho montante $32.000, UNESCO $4.800 ho Agiamondo, hamutuk $2.400.

Lee Mós: Trajédia Balibo Five iha Memoria

Diretór ezekutivu CI, Rigoberto Monteiro hateten, prezensa jornalista sira nian iha eventu komemorasaun tinan 47, Trajédia Balibo V, iha sekuénsia ida ne’ebé konsidera importante liu bá dezenvolvimentu média iha Timor-Leste.

Iha eventu istóriku ne’e partisipa direta hosi reprezentante média nasionál sira, jornalista estranjeiru balun no asosiasaun jornalista sira, no reprezentante rádiu komunidade hosi munisípiu.

“Agradese bá ita boot sira nia prezensa, tanba ita tenke hamutuk atu diskute duni asuntu balun ne’ebé ita hirak ne’e hasoru tinan bá tinan, iha tempu naruk nia laran, dezde CI hamri’ik, iha 2016,” Rigoberto Monteiro hateten durante intervensaun iha serimónia Fórum Nasionál Editoriál, iha Balibo Vila, Sidade da Liberdade, Sábadu (15/10/2022).

Fórum Nasional bá Editóriál ne’e, iha buat rua mak importante. Primeiru, atu fahe kona-bá saida mak média sira halo iha okaziaun lansamentu loron nasionál dahuluk bá liberdade imprensa ninian no komemorasaun bá trajédia Balivo V.

“Ita hahú dezde horseik, ohin, ita hahú ho forum nasionál editoriál ida. Forum nasionál iha Dili, ita halo de’it dala-ruma fulan-ida to’o fulan-tolu dala-ida. Kada tinan, ita planeia atu halo fórum nasionál ida hasoru malu hanesan ne’e, nune’e ita-boot sira bele fó hanoin, la’ós de’it bá CI, maibé mós fó hanoin bá governu, saida mak ita bele halo, atu hasoru ita-nia dezafiu no saida mak ita hetan ona durante ita-nia servisu sira iha tinan naruk nia laran, iha prosesu bá dezenvolvimentu nasionál,” Rigoberto Monteiro, hateten.

Rigoberto Monteiro agradese bá Centro Nacional Chega (CNC), UNESCO, Agiamondo, Prezidente Autoridade Bobonaro, Populasaun Balibo nian inklui jornalista sira hotu, tanba kolabora hodi partisipa ona iha eventu istóriku ida-ne’e.

Tuir sekuénsia programa ne’ebé Hatutan.com asesu bá iha eventu lansamentu loron nasionál Liberdade imprénsa no komemorasaun tinan 47, trajédia Balibo V, hosi 13 to’o 16 Outubru 2022 ne’e, mak hanesan, Limpéza Jerál, Lansamentu Feira Liberdade, programa kafé dadeer, mini audiénsia, Chega Tour, Komemorasaun Trajédia Balibo V, Programa Kafé Dadeer, Fórum Nasionál Editoriál.

Iha mós atividade diskusaun ho tema “Dezenvolvimentu iha Timor-Leste entre progresu no dezafiu, Talk Show, Lansamentu Primeira Pedra Monumentu da Liberdade, Lansamentu Loron Nasionál Liberdade Imprénsa, no ikus liu maka Seremónia Atribuisaun Prémiu Jornalístiku.

Jornalista: Rogério Pereira Cárceres