Hatutan.com, (06 Maiu 2022), Díli—Prezidente Eleitu, José Manuel Ramos-Horta, durante nia mandatu hanesan Prezidente Repúblika períodu 2022-2027, sei ko’alia ho Governu liuliu ministériu ne’ebé tutela bá asuntu komunikasaun sosiál atu bele ajuda mídia ho jornalista sira, liuliu mídia tradisionál ka mídia imprime sira.
Conselho de imprensa halo enkontru kortejia ho Prezidente Eleitu, José Ramos-Horta iha edífisiu Nobel Pás, Farol, Díli, Sesta (06/05/2022). Foto/Espesiál
Laureadu Nobel Pás, José Ramos-Horta hateten lia hirak-ne’e bainhira rona rekomendasaun husi Conselho de Imprensa Timor Leste iha enkontru ne’ebé hala’o iha Edifísiu Nobel da Pas nian iha Faról, Dili, Sesta (06/05/2022).
Liuhusi sorumutuk oras ida entre Conselho de Imprensa de Timor Leste ho Prezidente Eleitu, José Manuel Ramos-Horta ne’e, Conselho de Imprensa liuhusi nia prezidente Virgílio da Silva Guterres ho nia membru sira, inklui ezekutivu rekomenda bá Prezidente eleitu atu kontinua halo esforsu hodi tau matan bá kondisaun órgaun komunikasaun sosiál sira iha Timor Leste ho nia jornalista sira ne’ebé moris difisil tebetebes iha krize ekonomia durante ne’e, liuliu mídia imprime sira ne’ebé difisil liu iha serku dijitalizasaun ne’e.
Advertisement
Ramos-Horta hateten, dezde uluk kedas nia ko’alia beibeik ona atu Governu fó apoiu bá mídia sira iha Timor-Leste tanba nia hatene katak mídia ho nia jornalista sira moris difisil tebetebes. Aumenta tan, ho sosiedade Timor-Leste ne’ebé ábitu kultura lee mínimu tebetebes.
“Ha’u lahatene razaun fundamentu husi Prezidente Repúblika, Francisco Guterres “Lú Olo” veta tiha proposta husi Governu atu apoia mídia sira. Mas, ha’u dehan ita presiza duni fó apoia bá mídia sira, hanesan mós ho nasaun bara-barak iha Eropa no Amerika, inklui Austrália ho Reinu Unidu. Apoiu Estadu nian bá mídia la signifika mídia laiha ona independénsia editoriál, ne’e lae, Estadu la bele halo intervensaun bá liberdade imprensa no independénsia editoriál mídia sira-nian,” Ramos-Horta tenik.
Mekanizmu atu fó apoiu ne’e, tuir Ramos-Horta tenke haree mídia ne’ebé eziste ona durante tinan lima mai leten hodi reforsa diseminasaun informasaun pedagójika no sientífika. Atu nune’e, evita mídia mosu barabarak tanba Estadu fó subsídiu ka fó apoiu.
Conselho de Imprensa halo enkontru kortejia ho Prezidente Eleitu, José Ramos-Horta. Foto/Espesiál
Tuir Ramos-Horta, apoiu mídia imprime bele liuhusi subsídiu orsamentu no bele ajuda tan mós halo injesaun bá zero taxa bá sasán nesesidade báziku ne’ebé importa husi rai-li’ur mai. Ezemplu, hamoos taxa bá importasaun sura-tahan no fasilidade sira ne’ebé vital tebes bá impresaun jornál sira-nian.
Iha audiénsia ne’e, Conselho Imprensa partilla ho Prezidente Eleitu, José Ramos-Horta kona-bá novidade pozitivu mai Timor-Leste iha tinan ne’e hetan índise liberdade imprensa tuir publikasaun Reportajen sem Fronteira ka Reporters Without Borders (RSF) hatudu katak Timor-Leste iha aumentu duplu ka sa’e maka’as hosi 71 iha 2021 bá 17 iha 2022.
Durante audiénsia ho Ramos-Horta, informa mós desizaun Conselho Imprensa nian liuhusi plenáriu estraordináriu, Sesta ne’e, ne’ebé sei atribui prémiu Max Stahl ho kategoria dokumentáriu audio vizuál di’ak liu (news documentary).
“Prémiu Max Stahl ne’e atu fó imajen no rekoñesimentu bá kontribuisaun Saudozu Max Stahl nian mai luta libertasaun Timor Leste nian, hanesan mós prémiu sira seluk ne’ebé CI atribui ona iha tinan sira liubá no tinan sira tuir mai,” Virgílio Guterres hateten.
Durante ne’e Conselho de Imprensa atribui lima (5), kompostu husi:
Advertisement
Prémiu Greg Shackleton, kategoria Reportajen Jornalístika bá Asuntu Interese Umanu di’ak-liu ba mídia eletróniku rádiu no televizaun
Prémiu Francisco Borja da Costa, kategoria Reportajen Jornalístika bá Asuntu Interese Umanu di’ak-liu bá mídia imprime no online
Prémiu Adelino Gomes bá kategoria reportajen di’ak liu iha lian Portugés
Prémiu Conselho de Imprensa bá kategoria mídia ne’ebé fó tratamentu di’ak bá nia jornalista sira
Bá atribuisaun premiu sira-ne’e, Ramos-Horta apresia tebetebes no aseita ho inisiativa di’ak Conselho Imprensa nian ne’e. Nia mós husu atu CI la bele haluha mós kontribuisaun jornalista no ativista Jos Adijondro nian dezde prinsípiu luta Timor-Leste nian mai to’o timor ukun an.
Conselho de Imprensa halo enkontru kortejia ho Prezidente eleitu, José Ramos-Horta. Foto/Espesiál