Hatutan.com, (01 Abríl 2022), Dili-Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, sei ko’alia fali ho Ministru Asuntu Parlamentár no Komunikasaun Sosiál (MAPKOMS), Francisco da Costa Pereira Jerónimo, atu avansa fali ho projetu lei subsídiu ba órgaun komunikasaun sosiál sira  ne’ebé molok ne’e Prezidente Repúblika (PR), Francisco Guterres “Lú Olo” veta.  

Notísia iha Relasaun: Jornalista Tenke Promove Jornalizmu ba Dame

Sekretáriu Estadu Komunikasaun Sosiál (SEKOMS), Mericio Juvenal dos Reis “Akara”. Foto/Hatutan.com

Sekretáriu Estadu Merício Juvinal dos Reis “Akara” haktuir, iha 2021 nia aprezenta projetu lei ida ba iha Konsellu Ministru kona-bá atu apoia fundu ba mídia sira, hodi dezenvolve sira nia empreza mídia ne’e rasik. Projetu lei, konsege aprova hosi membru Governu sira iha reuniaun Konsellu Ministru. Maibé, bainhira lori bai ha Prezidente Repúblika (PR), Francisco Guterres “Lú Olo”, la halo aprovasaun ka veta tiha tuir kompeténsia Prezidente Repúblika nian.

“Situasaun mídia rai-laran, la hanesan ho nasaun seluk. Sé nasaun seluk, mídia na’in-sira ema riku, kompañia boboot, sira mak apoia, iha ne’e susar, entaun presiza Estadu no Governu hanoin. Ne’ebé ha’u fila mai, tempu ida, ha’u ko’alia ho ita-nia Primeiru0Ministru, nia konkorda katak, entaun presiza halo proposta lei ida, tanba bazeia ba ida-ne’e mak, ita fó asesu iha transferénsia públiku. Entaun, SEKOMS momentu ne’e prepara, lori ba Konsellu Ministru aprova, mais proposta lei ne’e, Prezidente Repúblika mak veta, entaun ita labele implementa,” Sekretáriu Estadu Merício Akara konfirma hodi responde  Xefe Redasaun Hatutan.com, Francisco Belo Simões da Costa nia sujestaun liuhusi enkontru ho Xefe Redasaun Órgaun Komunikasaun Sosiál sira ne’ebé hala’o iha sala enkontru Prezidénsia Konsellu Ministru (PCM) iha Palaçio do Governo, Dili, Sesta (01/04/2022).

Liuhusi enkontru apresiasaun Governu nian ba kontribuisaun órgaun komunikasaun sosiál sira  iha ámbitu eleisaun prezidensiál primeira volta ne’e, SEKOMS Marício Juvinal dos Reis “Akara” rekoñese mídia Timor Leste iha situasaun ida difisil tebes internu  infra-estrutura no finanseiru.

Husi ideia ida ne’e, Xefe Redasaun Hatutan.com, Francisco Belo Simões da Costa, propoin atu SEKOMS ka Governu bele kombina  Lei Komunikasaun Sosiál  artigu 6 kona-ba Apoiu Estadu nian ba área Komunikasaun Sosiál.

Artigu 6 Lei KOMSOS ne’e hateten, Estadu bele fó benefísiu sira ba entidade komunikasaun sosiál ne’ebé sai nudár apoiu diretu ka indiretu liuliu maka hanesan benefísiu fiskál no deskontu ba tarefa sira ne’ebé fó liuhosi rekizitu jerál no objetivu sira ne’ebé sei hakerek iha Lei.     

Merício “Akara” promete, sei ko’alia fila-fali ho MAPKOMS, Francisco da Costa Pereira Jerónimo, atu oinsá mak bele aprezenta fali lei ne’e ba PR “Lú Olo”, karik bele halo fali aprovasaun.

“Depois ha’u fó hanoin fali took ba señór ministru, keta señór ministru konkorda atu avansa fila-fali. Mas ha’u nia sujestaun mak, sé bele avansa fila-fali. “Mais intensaun ita kria lei ne’e, maka ida ne’e, tanba ha’u hatene didi’ak katak, ita nia infra-estrutura mídia, liu-liu finansa, ekipamentu ne’e, presiza tulun. La hatene to’o bainhira, mais mínimu agora to’o tinan lima hanesan ne’e, presiza fó apoia, para depois mídia sira bele utiliza hanesan kapitál ida dezenvolve di’ak liu, ba tinan lima mai, keta kompañia sira nia ekonomia di’ak liu, sira bele apoia tán, entaun bele,” Akara haktuir.

SEKOMS  iha mós meiu seluk, atu apoiu fundu ba mídia sira, liuhosi asosiasaun sira jornalista nian, hanesan TLPU ho AJTL, maibé presiza halo mós pedidu ruma, hodi bele tulun orsamentu ruma, ba programa kapasitasaun rekursu umanu.

Mídia Parseiru Governu

Governu liuhosi Sekretáriu Estadu Komunikasaun Sosiál (SEKOMS), Merício Juvinal dos Reis “Akara” husu ba média nasionál sira hotu tenke halo parseria ho Governu, hodi nune’e bele kontribui informasaun di’ak no saudavel ba sosiedade.

SEKOMS husu ne’e, bazeia ba pedidu hosi Primeiru-Ministru (PM), Taur Matan Ruak nian katak, mídia sira tenke sai parseiru di’ak ho Governu, hodi hatutan informasaun edukativa ba sidadaun sira, oinsá mak bele muda sira nia hanoin.

“Plataforma dijitál, Hatutan.com, Lafaek News, Tatoli, ho sira seluk, média konvensionál sira, liu-liu televizaun, rádiu, jornál, ho plataforma sira seluk. Agora ne’e, barak, depende de’it hakarak utiliza ida ne’ebé. Plataforma ne’e barak, entaun Primeiru-Ministru Taur Matan Ruak husu para ita sai parseiru di’ak,” Merício Juvinal dos Reis “Akara” hateten, durante sorumutuk ho Xefe Redasaun no jornalista sira.

Merício Akara konfirma katak, hanoin ne’ebé Governu hato’o ne’e, la’ós atu halo intervensaun ba independénsia redasaun sira mídia ida-idak nian, maibé Governu iha responsabilidade ba kolaborasaun.

“Entaun ita hotu lakohi katak, ema soe fali, issue ka venenu, ba sidadaun ida-idak ninia kakutak. Venenu ka issue ne’e maka lia-falsu (HOAX) ne’e, dezinformasaun ne’e, informasaun la loos, mais nia publika,” Merício Juvinal dos Reis “Akara” hateten tán.

Tuir Akara, Governu nia responsabilidade maka haree ba povu, no mídia sira nia responsabilidade maka, partisipa iha edukasaun sívika, mínimu ho karater sivilizasaun sidadaun ninian.

“Primeiru-Ministru nia hakarak ne’e, ita hanesan sidadaun Timor mak iha kna’ar ida-idak nian, mais ita bele kolabora fó susesu ba ita nia eleisaun ne’e ho informasaun ne’ebé mak loos, no kredivel, fó edukasaun sívika ba sira, vota tuir sira nia konsiénsia, no sira nia matenek,” Akara dehan.

Governante ne’e husu ba mídia sira atu labele uza de’it liafuan insulta malu ka selok-malu ka diskursu sira ne’ebé provokativu iha publikasaun informasaun sira, maibé tenke ho rasionál no obedese ba kódigu étika jornalístika.

“Ha’u hanoin, mídia iha papél importante halo jornalizmu ba pás iha situasaun sira tensaun polítika maka’as hanesan agora ne’e. ita fó informasaun ida saudavel no edukativu atu povu bele eskola ho livre,  povu hili ho rasionál, matenek no tuir sira nia vontade rasik. Mídia iha papél transmite informasaun edukativu hodi kontribui no sai autór ba ita-nia dezenvolvimentu nasaun nian,” Sekretáriu Estadu Merício Akara fó hanoin.

Jornalista: Rogério Pereira Cárceres