Hatutan.com, (19 Agostu 2025), Díli— Universidade Nasionál Timor-Lorosa’e (UNTL) husu Polísia Nasionál Timor-Leste ho Ministériu Públiku (MP) atu devolve  komputadór UNTL nian tanba sistema finansas sentrál  iha laran.

Lee Mós: Polísia Halo Buska no Apreensaun iha Gabinete Reitór no Pro-Reitór Sira UNTL

Autoridade Polísia halo buska no apreensaun iha Gabinete Reitór, Pro-Reitór no Departamentu Payroll UNTL, Kuarta (06/08/2025). Foto/Juvinal Cabral dos Santos

Reitór UNTL, João Martins Soares hafoin  reuniaun ho Primeiru-Ministru Kay Rala Xanana Gusmão  iha Palásiu Governu, Tersa (19/08/2925), hateten ba jornalista sira katak nia parte la satisfás ho  medida Polísia Nasionál Timor-Leste (PNTL) ne’ebé hala’o intervensaun iha kampus universidade nian no  konsidera aktu  ne’e hanesan demaziadu no la presiza.

Autoridade Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK), Kuarta 06 fulan-Agostu 2025, hale’u tuku  09:00 dadeer, halo buska no apreensaun ba Gabinete Reitór, Pro-Reitór ho dirijente sira Departamentu Payroll & Kontabilidade iha Universidade Nasionál Timor Lorosa’e (UNTL) bazeia ba mandadu Tribunál Judisiál Primeiru Instánsia Dili (TJPID) ho Númeru Úniku Krime (NUC) 01 86/25-PNSIK.

Molok ho buska no apreensaun ne’e, autoridade Polísia aprezenta  uluk mandadu husi Tribunál ba Reitór UNTL, João Soares Martins, relativa ho deskonfia ba indísiu krime falsifikasaun dokumentu no anotasaun téknika ne’ebé previstu husi artigu 303° husi kódigu penál Timor-Leste.

Reitór UNTL, João Martins Soares konsidera  prezensa kontinjente polísia ho arma kompletu fó impresaun hanesan UNTL ka nia aan hanesan terrorista.

 “Intervensaun hanesan ne’e la merese. Ami suspira tanba polísia mai ho forsa boot. Ha’u simu karta husi Komandante Jerál Polísia husu deskulpa. Ne’e buat di’ak, maibé ha’u apela atu situasaun hanesan ne’e la bele akontese tan, tanba sei lori trauma bá sosiedade hanesan tempu Indonézia. Ita tenke respeita direitu sidadaun iha nasaun livre,” João Soares Martins hateten.

Reitór UNTL fundamenta katak   to’o agora PNTL seidauk devolve sasán importante hanesan komputadór sira ne’ebé liga ho sistema finansas sentrál UNTL ho nune’e fó impaktu boot ba operasaun akadémika no administrativu.

Nia subliña katak UNTL prontu koopera ho prosesu legál no responsabiliza saida mak akontese, maibé nia konsidera maneira intervensaun polísia hanesan “deznesesáriu.”

Reitór  UNTL informa  PNTL mós   husu deskulpa bá UNTL, tanba rekoñese katak intervensaun ne’e la presiza ho forsa boot.

Iha Kurta loro-kraik,  (06/08/ 2025), órgaun Polísia  halo buska no apreensaun iha rezidénsia  adjuntu reitór UNTL ida nian iha área balun iha Dili laran no konsege rekolla dokumentu relevante sira, inklui  dokumentu karreta marka Ranger númeru matrikula A.16.2xx, motór rua  ho marka Genio númeru matrikula  Y.16.xx TL, Beat N.44.xx TL. 

Molok ne’e, iha buska no apreensaun iha arguido sira-nia eskritóriu servisu iha UNTL,  autoridade Polísia sira prende dokumentu relativa inklui prova osan balun.

Autoridade Polísia kontínua halo investigasaun, buska no apreensaun ba rezidénsia arguido sira seluk nian hodi rekolla prova relevante sira ho kazu ne’ebé deskonfia parte sira komete krime falsifikasaun dokumentu.

Lee Mós: Kazu UNTL, Polísia Kontínua Buska no Halo Apreensaun iha Arguido Na’in-Neen Nia Rezidénsia

Jornalista: Marcelino Tomae