Hatutan.com, (24 Maiu 2024), Aileu- Prezidente Repúblika (PR), José Ramos-Horta, promete harii no loke sentru formasaun komputadór ho lian Inglés no Portugés atu bele kapasita komunidade Fadabloco.

Lee Mós: Ramos-Horta Ezije Nasaun Dezenvolvidu Sira Apoiu Finanseiru Sustentável bá Fundu Mudansa Klimátika

PR José Ramos-Horta halo dialogu ho komunidade Suku Fadabloco, Munisípiu Aileu, Sesta (24/05/2024). Foto/Vito Salvadór

“Ha’u sei haree para loke fatin ida bá hanorin komputadór. Ita halo uma ida tau komputadór no iha sentru ne’e komunidade sira bele aprende lian Inglés no Portugés,” Prezidente Repúblika, José Ramos-Horta hateten iha diálogu komunitária ho komunidade Suku Fadabloco, Munisípiu Aileu, Sesta (24/05/2024).

Xefe Estadu sei apoiu mós ekipamentu desportu bá joven sira no haree mós posibilidade seluk ne’ebé bele kontribui bá dezenvolvimentu foin-sa’e sira nian.

Iha fatin hanesan, Xefe Suku Fadabloco, Lito da Costa hato’o agradese ho Prezidente Repúblika nia kompromisu atu apoiu komunidade sira iha Suka Fadabloco.

Nia afirma ba oin hanesan autoridade lokal hamutuk ho komunidade sira, liu-liu foin-sa’e sira no estudante sira atu halo levantamentu bá fatin hodi harii sentru treinamentu komputadór no lian Inglés inklui Portugés bá estudante, foin-sa’e no inan-aman sira hodi hasae kapasidade komunidade nian.

“Fatin ami iha ona, kondisaun mak seidauk di’ak, maibé ami sei lori proposta no pedidu ba Prezidente Repúblika nune’e bele realiza planu ne’ebé iha. Kursu komputadór, kursu lian Inglés no Portugés importante bá kapasitasaun rekursu umanu iha suku Fadabloco,” Lito da Costa hateten.

Nia haktuir foin daudauk komunidade liu-liu foin-sa’e no estudante sira husi suku Fadabloco bá kursu iha Aileu no blku bá  Díli maibé hasoru difikuldade tamba dok husi família no kustu vida karun no la kondís ho situasaun ekonomia família nian.

Ho kursu ne’ebé Xefe Estadu planeia atu loke iha suku Fadabloco bele kontribui bá hamenus sofrimentu ne’ebé komunidade iha tamba kustu da vida baratu no bele rezolve problema Edukasaun Non-Formal iha suku laram.

Xefe Suku ne’e hato’o agradesimentu bá Xefe Estadu ne’ebé ho laran hakarak vizita suku Fadabloco no promete ona atu bele apoiu atividade formasaun iha área linguístika no komputadór bá komunidade Fadabloco.

Suku Fadabloco iha aldeia haat mak hanesan Lequiça, Lilitei, Raifatu, Rileu, ho totál abitante  2726.

Jornalista : Vito Salvadór