Hatutan.com, (12 Janeiru 2024), Manufahi—Forum Organizasaun Naun Governamentál Timor Leste (FONGTIL) hamutuk ho Autoridade lokál Postu Administrativu Turiscai, la’o ain ba vizita no presta omenajen bá Saudozu Nicolau dos Reis Lobato nia fatin mate iha aldeia Fatusna Binani, Suku Mindelu.

Forum Organizasaun Naun Governamentál Timor Leste (FONGTIL) hamutuk ho Autoridade lokál Postu Administrativu Turiscai, la’o ain ba vizita no presta omenajen bá Saudozu Nicolau dos Reis Lobato nia fatin mate iha aldeia Fatusna Binani, Suku Mindelu, Kinta (11/01/2024). Foto: Tomé da Silva.

Diretór Ezekutivu FONGTIL, Valentim da Costa Pinto hateten vizita ida-ne’e hakarak promove fatin saudozu Nicolau Lobato nia fatin mate, tanba fatin ne’e sai mós fatin istóriku no bele promove sai  hanesan fatin turizmu.

Lee Mós: Estrada Sai Problema Prinsipál iha Turiscai

“Hanesan vizita istóriku ida ne’ebé mai ho karakterístika hakarak haforsa nasionalizmu atu ema hotu-hotu bele koñese. Futuru bele konvense ministériu, liu-liu Ministériu Turizmu Komérsiu ne’ebé bele promove fatin ida ne’e sai hanesan sítiu turizmu ne’ebé permite ema hotu-hotu bele mai vizita no koñese hodi hatene di’ak liu tán fatin istóriku ne’e,” Valentim da Costa Pinto hateten iha fatin mate Saudozu Nicolau Lobato.

Tinan ida-ne’e FONGTIL ho membru organizasaun rezisténsia, organizasaun relijiozu sira, tenta organiza tán diálogu ne’ebé tinan ida ne’e halo iha rejiaun rai klaran nian ne’ebé monu iha Postu administrativu Turiscai.

“Diálogu tinan ida-ne’e, iha prosesu tolu ne’ebé presiza konvida partisipante hotu-hotu la’o tuir, primeiru mak la’o ain iha fatin istóriku ida-ne’e, fatin mate saudozu Nicolau Lobato ninian. Konvida ema hotu-hotu bele hatene, haree no rona direta hosi sasin moris sira ne’ebé bele ko’alia buat ruma bá ne’ebé sai hanesan haforsa nasionalizmu konta bá oan no beioan sira,” nia esplika.

Alende ne’e sei ko’alia ho autoridade sira hodi bele rona direta sira nia lamentasaun ne’ebé akontese iha seitór hotu-hotu sei bele aprezenta di’ak liu iha loron ikus 13 janeiru ne’ebé halo diálogu ho governante sira, bele hato’o no bele rona direita saida mak sira bele halo iha ne’ebé sai hanesan prióridade kada ministériu ba tinan lima mai.

Forum Organizasaun Naun Governamentál Timor Leste (FONGTIL) hamutuk ho Autoridade lokál Postu Administrativu Turiscai, la’o ain ba vizita no presta omenajen bá Saudozu Nicolau dos Reis Lobato nia fatin mate iha aldeia Fatusna Binani, Suku Mindelu, Kinta (11/01/2024). Foto: Tomé da Silva.

Iha fatin hanesan, Diretór Asosiasaun HAK, Feliciano da Costa Araújo hateten, hanesan membru mós ba iha FONGTIL apresia programa ne’ebé iha, nune’e bá futuru Governu bele dezenvolve fatin ne’e sai hanesan fatin istóriku.

“Assosiasaun HAK haree mós hanesan justisa pasadu presiza tau atensaun ba ida-ne’e. To’o agora hanoin sosiadade Timor laran tomak hanesan buka hela no ezije. Membru Parlamentu Nasionál mós ezije to’o bainhira loos Governu Indonézia bele rekoñese no bele entrega liu-liu saudozu Nicolau Lobato ninia isin mate,” nia hateten.

Feliciano hatutan, saudozu Nicolau Lobato nia mate iha Timor maibé nia lakon to’o agora la hatene to’o ninia paradeiru ne’e iha ne’ebé, Asosiasaun HAK ezije nafatin bá assuntu ida-ne’e, atu iha komitmentu ida-ne’e, Governu tantu órgaun soberanu nian atu bele tau konsiderasaun oinsá bele halo diskusaun ida kle’an ho Governu Indonézia atu bele hatudu.

“To’o agora ne’e ita ukun an ona tinan 24, espera katak ho diálogu sira ne’ebé ami realiza iha Turiscai ne’e bele fanun nafatin nai ulun sira bele tau konsiderasaun,” nia hatuir.

Jornalista: Tome da Silva