Hatutan.com (24 Novembru 2023), Baucau—Ministeriu Saúde (MS) liu hosi programa servisu integradu saúde kontinua koordena ho liña sektorais iha sentru saúde sia (9)  iha munisipu Baucau.

Ministeriu Saúde (MS) liu hosi programa servisu integradu saúde kontinua koordena ho liña sektorais iha sentru saúde sia (9) iha munisipu Baucau, Kinta (23/11/2023). Foto: Leopoldina de Carvalho.

Reprezentante Ministériu Saúde, Paulina Pinto esplika, programa integradu saúde nu’udár programa prioridade MS nian, iha IX  Governu ne’ebé involve mós programa kona-bá moras hada’et no la hada’et, mál nutrisaun, saúde ba inan no oan, Tuberkuloeze (TB),  dengue no kauza asidente tráfiku ne’ebé involve mos liña sektorais hanesan Polísia Tránzitu, Diresaun Nasionál Transporte Terestre (DNTT) inklui autoridade lokál sira.

Lee Mós: MS Sensibiliza Autoridade Lokál Osso-Queli Kona-bá Moras Da’et no La Hada’et 

“Liña sektorál sira hala’o idak-idak nia papél, parte saúde ko’alia kona-bá moras hada’et no la hada’et, kampaña vasina, saúde inan ho oan, mál nutrisaun no moras sira seluk,” Paulina Pinto hateten iha Baucau, Kinta (23/11/2023).

Inspetór Asistente Postu Admistrativu Laga, Duarte Belo Ximenes. Foto: Leopoldina de Carvalho.

Iha biban ne’e, inspetór asistente postu admistrativu Laga, Duarte Belo Ximenes haktuir, durante ne’e iha liña koordenasaun di’ak ho sentru saúde sira iha área ne’e hodi fó atendimentu ne’ebé masímu bá komunidade.

“Komunidade nia konsiénsia mak sei menus tanba dala ruma ami halo sosializasaun, pasa revista, maibé komunidade barak la kompriende no la halo tuir. Ezemplu kiik hanesan haruka uza kapasete de’it ema la halo tuir,” Duarte Belo Ximenes hateten.

Alende ne’e, Administradór postu admistrativu Laga, Domingos Loiola Pereira apresia ho servisu integradu saúde ne’e tanba bele involve mós autoridade lokál sira atu bele habelar informasaun bá komunidade.

“Servisu ne’e importante tanba bainhira mudansa klimátika moras barak mak mosu. Ho servisu ida-ne’e bele fó hanoin bá autotidade lokál sira hodi kontinua fó hanoin bá komunidade atu bele prevene an iha kualkér situasaun,” Domingos Loiola Pereira hateten.

Programa servisu integradu saúde ne’e hala’o iha sentru saúde 9 iha munisipiu Baucau mak hanesan sentru saúde Osso-Queli, Bukoli, Tirilolo, Vemasse, Laga, Quelikai, Uailili, Baguia no Venilale.

Jornalista: Leopoldina de Carvalho