Hatutan.com, (21 Novembru 2023), Díli—Atuál Assesór Polítika Prezidénsia Repúblika, Tito Cristóvão da Costa “Lere Anan Timur” ho Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” reprezenta Estadu Timor-Leste (TL) partisipa iha serimónia komemorasaun loron Independénsia Guiné-Bissau bá dala-50, iha aldeia Istórika Lucadjol, Sidade Boé, Guiné-Bissau, foin lalais ne’e.

Mapa Rejiaun Guiné Bissau. Foto: Google.

Reprezentante na’in rua ne’e hetan delegasaun direta hosi Prezidente Repúblika, José Ramos-Horta, hodi hatán bá konvite hosi Governu Guiné-Bissau nian.

Lee Mós: Lere-Falur Vizita Ró Haksolok, Konstrusaun Atinje 80% no 2024 Haksolok Povu TL

“Ha’u ho Xefe Estadu Maior Jenerál, komandante Falur bá Guiné-Bissau. Delegasaun hosi Prezidente Repúblika hanesan mós Primeiru Ministru, ami bá partisipa serimónia tinan 50 Independénsia Guiné-Bissau nian. Hanesan mós Forsas Armadas Guiné-Bissau ninian. Ita bá Europa, bá Áfrika ne’e dook. Maibé, tanba ita nu’udár País ne’ebé faz parte CPLP, ita bá hanesan bá ita nia uma,” Lere Anan Timur, hateten hafoin fila hosi Guiné-Bissau, iha Aeroportu Internasionál Nicolau Lobaro, Comoro-Díli, Tersa (21/11/2023).

Lider na’in-rua nia prezensa iha Guiné-Bissau reprezenta duni Estadu TL no povu. Signifika sira bá hatudu mós TL nia solidariedade bá país irmaun ne’ebé mós uluk funu tinan 24, politikamente sira mós apoia TL.

Xefe Estadu Maior Jenerál F-FDTL, Tenente Jenerál Falur Rate Laek hatutan, durante estadia iha Guiné-Bissau, sira la ko’alia kona-bá kooperasaun ruma iha área téknika defeza no militár ninian, tanba iha delegasaun hosi rai barak tebtebes mak partisipa.

Komandante Falur dehan, iha futuru TL iha ámbitu Comunidade dos Países de Lingua Portuguêsa (CPLP) ninian, ne’ebé mak baibain membru Forsa Armada sira halo ezersísiu feline hamutuk, bele halo interkámbiu ruma no iha mós formasaun ruma.

Tuir planu, Prezidente Repúblika Guiné-Bissau mós sei partisipa no asiste Timor-Leste nia komemorasaun loron Proklamasaun Independénsia Unilaterál iha 28 Novembru 2023, bá dala-48.

Aniversáriu Independénsia país amigu Guiné-Bissau nian ne’e iha loron ne’ebé mak hanesan, selebra mós loron ezisténsia sira-nia Forsas Armadas nian, iha 24 Setembru 1973.

Jornalista: Rogério Pereira Cárceres