Hatutan.com, (01 Novembru 2025), Viqueque– Xefe Suku Afaloikai,  Cesario Nascimento Pires, hateten Governu tau ona prioridade bá estrada Suku Afaloikai no sei implementa iha tinan 2026.

Lee Mós: Xefe Suku Afaloikai Husu Populasaun Mantein Situasaun Hakametek iha Selebrasaun Loron Finadu

Kondisaun estrada Suku Afaloikai. Foto/Zita Menezes

“Estrada ne’e husi mandatu xefe suku uluk mós preokupa,  iha ha’u nia mandatu ida agora iha ona  lampu verde  katak iha tinan 2026 sira halo ona, ha’u rasik foin lalais iha loron 21 fulan-Outubru, ha’u hasoru ona Primeiru-Ministru Kay Rala Xanana Gusmao no mós Ministru Obra Publiku (MOP) Samuel Marcal, simu ona ha’u nian proposta no sira tau ona bá planu prioridade,” Xefe Suku Cesario Nascimento Pires bá Hatutan.com iha Uatulari Antigu, Sábadu (01/11/2025).

Autoridade Lokál fiar katak tinan 2026 karik laiha difikuldade ruma iha Governu sira bele implementa ona projetu bá estrada Uatulari.

Xefe Suku  ne’e afirma tinan komunidade sofre hela ho defikuldade tanba haree rasik estrada iha ne’e kuandu iha tempu udan karreta sa’e mai labele no estrada asesu ladi’ak.

“Ha’u ko’alia ona ho komunidade sira no kompania balu ita rame-rame ateru para depois udan ne’e ita uza lai,” nia tenik.

Iha sorin seluk reprezentante komunidade Manuel Alves, hateten preokupasaun komunidade Suku Afaloikai nian mak kona-bá estrada nune’e husu Governu atu tau atensaun hela bá estrada.

“Estrada sai preokupasaun ami nian durante tempu naruk ona, ne’ebé husu Governu bele ajuda tau matan bá ami nian estrada hadi’a lalais nune’e ami bele asesu,” Manuel Alves hateten.

Jornalista: Zita Menezes