Hatutan.com, (12 Fevereiru 2024), Díli—Tinan barak nia laran, pessoál saúde na’in-rua de’it mak hala’o atendimentu bá populasaun 6.000-resin iha suku Betano Bee-metan, Postu Administrativu Same, munisípiu Manufahi.

Postu saúde Bee-metan, Suku Betano, Postu Administrativu Same, Munisípiu Manufahi, Segunda (12/02/2024). Foto: Rogério Pereira Cárceres.

Suku Betano iha postu saúde rua mak hanesan postu saúde Betano Bee-metan ho médiku Jerál Dircia Albertina Dias Ximenes hamutuk ho parteira Manuela da Costa mak durante ne’e fó atendimentu saúde bá komunidade ne’ebé hetan apoiu hosi pessoál limpéza Gabriela da Costa.

Lee Mós: OMS Oferese Ai-moruk Item 121 bá Ministériu Saúde 

Postu Saúde ida seluk ne’ebé lokaliza iha área Ai-maten, emfermeiru Paulo Tilman ne’ebé idade avansadu ona ho ninia asistente ida mak hala’o atendimentu.

“Iha suku Betano populasaun kuaze 6.000-resin. Iha-ne’e postu saúde iha rua. Postu saúde ida mak ida ne’e, ida fali tama bá iha Betano. Iha-ne’e rekursu umanu menus no presiza tán médiku, tanba iha ne’e médiku ha’u mesak de’it,” Dircia Albertina Dias Ximenes hateten iha kna’ar fatin postu saúde Betano, Suku Betano, Postu Administrativu Same, Munisipiu Manufahi, Segunda (12/02/2024).

Médiku jerál, Dircia Albertina Dias Ximenes. Foto: Rogério Pereira Cárceres.

Médiku jerál destakada ne’e dehan, iha ne’e presiza tebtebes rekursu umanu liu-liu médiku, emfermeiru, nomós parteira nune’e bele kobre populasaun tomak iha suku laran ne’ebé ho nia área ne’ebé lu’an tebes.

Situasaun ne’e la difikulta serbisu ka atendimentu maibé nia dehan, tanba suku ne’e ninia área boot nune’e maka presiza tán pessoál saúde.

Nia fó ezemplu, dala-ruma inan partus iha liu área dook, nune’e tanba parteira ida de’it entaun dalaruma tenke refere bá Same ho ambulánsia.

Kona-bá ai-moruk, médiku jerál ne’e dehan, estoke sempre sufisiente, liu-liu ai-moruk sira esensial mak hanesan Paracetamol ho Oralit.

Kada loron, pessoál saúde sira atende pasiente depende bá moras ne’ebé komunidade hasoru. Iha Segunda ho Tersa rejista pasiente 30-resin, maibé Kuarta, Kinta no Sesta rejista pasiente to’o na’in 15.

Moras ne’ebé rejista aas liu maka moras fuan, tensaun no tensaun aas, estómagu, tanba udan ne’ebé tau la tuir ona ninia tempu, sira mós rejista pasiente ho moras denge barak.

Postu saúde Betano, Bee-metan kompletu tebes ho fasilidade mak hanesan, haris-fatin, assesu bee ho di’ak inklui naroman eletrisidade di’ak tebes.

Jornalista: Rogério Pereira Cárceres