Hatutan.com, (28 Agostu 2023), Díli—Atuál Sekretáriu Ezekutivu Comunidade dos Países da Língua Portuguesa (CPLP), Zacarias Albano da Costa, re-eleitu bá periódu tinan rua (2023-2025).

Atuál Sekretáriu Ezekutivu Comunidade dos Países da Língua Portuguesa (CPLP), Zacarias Albano da Costa, re-eleitu bá periódu tinan rua (2023-2025). Desizaun ne’e foti liu hosi Konferénsia Xefe Estadu no Xefe Governu CPLP nian bá dala XIV ne’ebé hala’o iha São Tomé e Príncipe, ne’ebé antes ne’e hetan ona aprovasaun hosi reuniaun Konsellu Ministru CPLP bá dala XXVIII iha loron 25 fulan Agostu 2023. Foto: MNEK.

Desizaun ne’e foti liu hosi Konferénsia Xefe Estadu no Xefe  Governu CPLP nian bá dala XIV ne’ebé hala’o iha São Tomé e Príncipe, ne’ebé antes ne’e hetan ona aprovasaun hosi reuniaun Konsellu Ministru CPLP bá dala XXVIII iha loron 25 fulan Agostu 2023.

Lee Mós: XIV Konferénsia CPLP Foka bá Sustentabilidade Juventude

Emviadu espesiál Prezidente Repúblika atuál Prezidente Parlamentu Nasionál, Maria Fernanda Lay informa, Xefe Estadu no Governu sira halo rekondusaun bá mandatu Sekretáriu Ezekutivu CPLP, Zacarias Albano da Costa, bá períodu tinan rua 2023-2025, tanba rekoñese esforsu ne’ebé nia halo durante iha mandatu dahuluk.

“Ohin ne’e eleitu ona no ofisializadu. Klaru katak, ne’e onra ida bá Timor-Leste, tanba Paízes membrus CPLP rekoñese esforsu ho traballu boot hosi Señór Doutór Zacarias Albano da Costa, ida-ne’e mak ita apoia rekondusaun hanesan Sekretáriu Ezekutivu bá prósimu anos,” Hatutan.com sita deklarasaun Maria Fernanda Lay iha komunikadu, Domingu (27/08/23).

Sekretáriu Ezekutivu CPLP, Zacarias Albano da Costa sente onradu tebes tanba nafatin hetan fi’ar hosi Estadu membru CPLP no mós Timor-Leste ne’ebé kontinua depozita konfiansa bá nia hodi lidera organizasaun ne’e bá tinan rua tán.

“Ha’u sente onradu tebes ohin bele hetan tán fali eleisaun bá rekondusaun nu’udár Sekretáriu Ezekutivu to’o simeira ne’ebé sei hala’o iha Guiné Bissau iha 2025-2027,” Zacarias Albano da Costa hateten iha komunikadu ne’e.

Konferénsia Xefe Estadu no Xefe Governu CPLP nian bá dala XIV ne’ebé hala’o iha São Tomé e Príncipe, 27 Agostu 2023. Foto: MNEK.

Zacarias Albano akresenta, objetivu prinsipál bá oin mak Prezidénsia São Tomense bá CPLP, tanba São Tomé e Príncipe mak lidera CPLP durante tinan rua ne’ebé mai ho lema katak, “Juventude sustentabilidade”.

“Tema ida importante teb-tebes, tanba ha’u hanoin barak halo, ita dehan bebeik, juventude mak futuru, mais iha CPLP nia laran joven sira tenki haree kedan oinsá mak CPLP haree bá sira-nia problemas, sira-nia aspirasoens, sira-nia mehi, espasu bá sira bele iha atu partisipa iha seitór hotu-hotu iha edukasaun, iha negósiu, iha polítika, nível sosiál no ekonómiku, ha’u hanoin ne’e mak objetivu prinsipál,” nia subliña.

Alende ne’e, Xefe Estadu no Governu CPLP sira mós halo aprovasaun bá deklarasaun finál São Tomé, rekondusaun bá mandatu nu’udár Sekretáriu Ezekutivu.

Aprovasaun kandidatura Paraguai nian bá observadór assosiadu nu’udár observadór assosiadu númeru 33 bá CPLP, tanba daudaun ne’e iha ona membru assosiadus 33, iha ne’ebé hamutuk nasaun 29 no mós organizasaun internasionál 4.

Iha biban ne’e kedan, Prezidente Repúblika Angola, João Lourenço, ofisiamente entre Prezidénsia Rotativa CPLP Protémpore bá Prezidente Repúblika São Tomé e Príncipe, Carlos Vila Nova, tanba São Tomé mak sei lidera CPLP bá tinan rua 2023-2025.

Delegasaun hosi Timor-Leste ne’ebé partisipa iha simeira Xefe Estadu no Governu CPLP bá dala XIV ne’e, Ministru Negósiu Estranjeiru no Kooperasaun (MNEK), Bendito dos Santos Freitas, Xefe Missaun Permanente Junta CPLP, Embaixadora Marina Ribeiro Alkatiri no seluk tán.

Jornalista: Vito Salvadór