Hatutan.com, (29 Dezembru 2025), Díli- Ministériu Administrasaun Estatál (MAE),  Segunda (20/12/2025),  aprezenta relatóriu avaliasaun kondisaun minimu husi munisípíu sira no munisípiu lima hetan valór di’ak liu  no munisípíu hitu hetan válor di’ak, nune’e Governu Sentrál  husu nafatin ba  munisípiu hotu presiza hadi’a servisu funsionamentu Governasaun nian.

Ministériu Administrasaun Estatál (MAE) aprezenta relatóriu avaliasaun kondisaun minimu husi munisípíu sira hodi prepara ba desentralizasaun. Foto/Zita Menezes

Ministru Administrasaun Estatál (MAE), Tomas do Rosário Cabral hateten, tuir lei Governu aprová rezolusaun ida atu kria podér lokal iha tinan 2027 no IX Governu tama kria serbisu munisipál sira sai  autoridade hotu  kedas nu’udár transizaun  atu prepara Governasaun.

“Ekipa avaliasaun kondisaun minimu ba tiha ona munisípiu sira halo tiha ona levantamentu, nia rezultdu mai aprezenta preleminariu ba Primeiru-Ministru Kay Rala Xanana Gusmão depois sei lori ba aprezenta iha Konsellu Ministru, tanba tuir lei tenke aprova ho rezolusaun Governu ida,” Ministru Tomas Cabral informa.

Nia afirma depois relatóriu ne’e aprova husi Governu sei lori ba fali Parlamentu Nasionál regula fali lei ida, se mak atu ba kaer podér lokál iha munisípiu ida-idak  ne’e sei desizaun husi Konsellu Ministru.

“Sé sira na’in-12 ba mós Orsamentu Jerál Estadu  tenke sa’e tanba lei orsamentál dehan katak 20% OJE tenke fó ba kraik, tanba ita haree kapasidade finanseiru, mais di’ak liu ita tenke fó, tanba sira mak hela ho populasaun iha kraik,” Ministru Tomas Cabral argumenta.

Governante ne’e esplika Munisípiu Díli haree iha populasaun maismenus 200,000-liu, nune’e  tenke rezolve mós kestaun Munisípiu Díli nian  lori ema fila Governu tenke kria mós kondisaun no organiza ema nia moris.

Iha aprezentasaun ne’e husu   mós atu halo levantamentu kona-bá Rejiaun Administrativu Espesiál Ambeno Oé-Cusse  (RAEAO) tanba Oé-cusse labele sees aan husi Governu lokál tanba sira mós autoridde ida.

Atauro de’it mak autoridade administrativu tanba lei hateten katak minimu atu sai Munisipíu ne’e eleitór  labele menus 50,000  no hetan fundu direita husi Governu sentrál.

Jornalista : Zita Menezes