Hatutan.com, (16 Janeiru 2026), Díli-Juiz titulár,  Argentino Nunes, haruka arguidu Reitór Universidade Nasionál Timor-Lorosa’e (UNTL) ho inisiál JM, vise-reitór ho dirijente na’in-haat seluk tan, fila ba uma hodi hein despaixu julgamentu interogatóriu dahluk  iha Sábadu aban (17/01/2026).

Lee Mós: PTR Afonso Carmona Respeita Dezisaun Tribunál Hasai Mandadu Buska no Detensaun Ba Reitór UNTL Cs

Juiz titulár, Argentino Nunes, haruka argiudu sira fila ba ida-idak nia uma hodi hein despaixu julgamentu interogatóriu dahuluk iha Sábadu, (17/01/2026). Foto/Juvinal Cabral dos Santos

Liuhosi julgamentu interrogatóriu dahuluk ba loron daruak nian iha Tribunál Judisial Primeiru Instánsia Dili (TJPID), Sesta (16/01/2026), Ministeriu Públiku ne’ebé reprezenta husi Prokuradór Matias Soares, promove ho krime abuzu poder, administrasaun danoza, pekulatu no falsifikasaun dokumentu ba arguidu sira reitór UNTL ho vise-reitór no dirijente na’in-haat seluk tan.

Arguidu sira ne’e mak  hanesan,  JM nu’udar Reitór UNTL, arguidu FQdC , TS atuál dekanu UNTL no arguidu MB nu’udar eis dekanu iha UNTL no mós arguida JMM ho LSdA.

Durante interogatóriu dahuluk ne’e arguidu, sira hili direitu ko’alia nune’e prosesu interogatóriu dahuluk ba arguidu la’o kleur.

Iha prosesu interogatóriu dahuluk ne’e iha alegasaun  Prokuradór Matias Soares solisita ba Tribunál atu aplika medida koasaun Proibisaun Auzénsia no Aprezentasaun Periodika ba arguidu retór UNTL ho inisiál JM inklui atuál dekanu na’in-rua FQdC no TS.

Enkuantu eis-dekanu ho inisiál MB no arguida ho inisiál JMM no LSdA,  Ministeriu Públiku husu ba Tribunál atu aplika medida koasaun aprezentasaun periodika no termu identidade rezisténsia (TIR).

Defeza husi Arguidu na’in sira solisita ba Tribanál atu aplika de’it medida koasaun TIR. Maibé, rona tiha parte hotu, Juiz turnu Argentino Nunes, iha alegsaun deside haruka argiudi sira fila ba idaidak nia uma tanba prazu ba detensaun arguidu sira remata ona.

Hafoin julgamentu interogatóriu dahuluk, Defeza Arguidu sira Advogadu privadu Câncio Freitas, hateten, iha alegasaun Defeza sira husu TIR tanba defeza konsidera Termu Identidade Rezisténsia ne’e medida ne’ebé kiik husi medida koasaun sira ne’ebé iha.

Nia esplika, iha alegsaun Ministeriu Públiku husu ba Tribunál atu aplika medida koasaun Proibisaun Auzénsia no medida koasaun Aprezentasaun Periodika.

“Ha’u husu TIR de’it maibé, Ministeriu Públiku Aprezenta  Periodika  hau admite tanba krime ne’ebé  Ministeriu Publiku promove mai Tribunál ne’e jerál de’it la justifika, iha arguidu sira deklarasaun mós laiha indisiu forte ba prejuizu ka prosesu ne’e la gasta osan,” Câncio Freitas hateten ba jornalista sira.

Juiz titulár  Argentino Nunes ensera interogatóriu dahuluk ba arguidu sira no haruka arguidu sira fila ba idak-idak nia uma hodi hein Tribunál deside  hasai despaixu ba interogatoriu ne’e iha Sabádu aban, (17/01/2026).

Jornalista: Juvinal Cabral dos Santos