Hatutan.com, (17 Maiu 2023), Díli- Partidu Sosialista de Timor (PST) promete  luta  bá agrikultór sira liuhosi fó subsídiu alimentár no komérsiu atu bele intensiva povu agrikultór sira bele hasae produsaun agríkola iha Timor-Leste

Lee Mós : PST Ukun Sei Fó Subsídiu Bá Agrikultór Sira

Partidu Sosialista de Timor (PST) nia misaun no vizaun maka sosialista, umanista, populár tuir lisan no kultura Timor-Leste nian.

Koordenadór PST Munisípiu Ermera, Agostinho de Jesus Madeira. Foto/Elio dos Santos da Costa

Koordenadór PST Munisípiu Ermera, Agostinho de Jesus Madeira, hateten PST iha programa prioridade lubuk ida bá povu bainhira hetan fiar hodi bá ukun.

PST sei luta bá repozisaun orden demokratiku Konstitusionál, defeza Konstituisaun Repúblika Demokrátika de Timor-Leste (RDTL) nu’udár baze bá respeita direitu sidadaun sira nian.

Agostinho de Jesus Madeira  hateten, PST sei fó prioridade bá setór agrikultura no sei fó subsídiu bá povu agrikultór sira  no harii fundu bá agrikultór atu intensiva povu agrikultór sira bele hasae produsaun agríkola iha Timor-Leste.

PST mai ho nia programa rasik ne’ebé prioridade liu mak estadu laiha rai no rai povu nian, tamba rai mak sai hanesan instrumentu atu bele dezenvolve setór produtivu sira.

“Setór produtivu ne’ebé mak PST sei tau prioridade mak setór Agrikultura ho dalan fó subsídiu bá agrikultór sira atu bele insentiva agrikultór sira hodi servisu no subsídiu ne’ebé PST planeia mak subsídiu alimentár no subsídiu bá Komérsiu,” Agostinho de Jesus Madeira iha debate públiku Partidu Polítiku ne’ebé organiza husi CNE iha salaun OKA, Surik Mas, Díli, Kuarta (17/05/2023).

Subsídiu alimentár sei fó bá agrikultór sira atu bele hakiak animál, kuda modo, atu nune’e, bele tulun povu agrikultór sira moris ho kbiit rasik.

Subsídiu bá Komérsiu ka indústria atu povu agrikultór sira bele iha kbiit atu iha indústria rasik hodi halo produsaun bá produtu sira ne’ebé sira rasik prodús no lori ba merkadu ka halo komersializasaun hodi hetan rendimentu ekonomia bá apoiu nesesidade família nian.

Iha Munisípiu Ermera,  PST sei fó subsídiu bá povu agrikultór sira atu hasae produsaun kafé, iha Maliana sei fó subsídiu atu povu agrikultór iha Maliana bele servisu badinas no hasae produsaun hare, no iha kada munisípiu sei fó subsídiu tuir potensialidade ne’ebé iha atu bele halo redusaun ba dependénsia sasán importasaun sira.

PST mós hanoin katak sei hari sentru formasaun iha munisípiu ida-idak atu bele kapasita agrikultór sira hodi hasae produsaun agríkola ne’ebé iha atu bele lori ba iha armazenamentu no transfere bá iha prosesamentu liuhosi indústria hodi bele lori bá merkadu nasional no rejionál sira.

“PST defende liu mak estadu laiha rai, atu nune’e, povu ne’e bele moris iha sira nia rai rasik, hodi tau atensaun ba iha setór produtivu sira iha area Agrikultura hanesan Horticultura, Pekuária no Peska,” nia subliña.

Tuir dadus ne’ebé PST iha hatudu katak povu Timor-Leste kuaze 66% husi populasaun mak moris ho vida agrikultór, tamba ne’e PST sei tau prioridade ba setór Agrikultura liuhosi orsamentu jerál estadu kada tinan hodi bele hasae produsaun ho halo Industrializasaun iha Timor-Leste.

Jornalista: Vito Salvadór