Hatutan.com, (06 Juñu 2024), Díli- Prokuradór Jerál  Repúblika (PGR, sigla portugés), Alfonso Lopes hateten Supremu Tribunál Justisa (STJ) sei rona testemuña husi suspeitu fujitivu Arnolfo Teves Jr molok foti desizaun.

Lee Mós: Fujitivu Arnolfo Teves Jr Hakerek Karta Espesiál ba ONU ho Papa Francisco

Prokuradór Jerál Repúblika (PGR, sigla portugés), Alfonso Lopes. Foto/Elio dos Santos da Costa.

“Kona-bá sidadaun fujitivu Filipinu Arnolfo Teves Jr agora ita sei iha produsaun bá prova, no agora hein rezultadu husi Tribunál Rekursu, tanba tuir lei Nú. 15/2011 nia prosedimentu mak ita tenke rekorre bá prazu ne’ebé iha no sei iha loron-15 atu Tribunál rona testemuña ne’ebé propoin husi parte suspeitu no Ministériu Públiku no ikus liu iha loron-25 para alegasaun no iha loron-10 para Tribunál Rekursu bele hasai desizaun,” PGR Alfonso Lopes informa  ba jornalista sira iha Palásiu Prezidensiál, Kinta (06/06/2024).

PGR informa mós katak Prezidente Repúblika nu’udár Xefe Estadu, altu majistradu no guardiaun ba estadu direitu demokratiku preokupa tebe-tebes kona-ba kazu fujitivu Arnolfo Teves Jr, maibé Xefe Estadu nafatin respeita servisu Tribunál ne’ebé nu’udár órgaun ida independente ne’ebé sei hala’o hela servisu dentru  legalidade.

Nia mós haktuir kona-ba pozisaun ne’ebé defende husi fujitivu Arnolfo Teves Jr submete ba STJ ne’e hanesan prinsípiu kontraditóriu no Tribunál konsidera mós.

“Tribunál sempre respeita prinsípiu kontraditóriu, ne’ebé tenke rona parte hotu, tantu husi arguido nian no mós Ministériu Públiku, no Ministériu Públiku atu defende ida ne’e mós tenke husu informasaun ba país ne’ebé husu estradisaun no iha loron-15 ne’e Tribunál Rekursu sei rona parte hotu-hotu tuir Tribunál nia kompeténsia,”  Alfonso Lopes tenek.

Bá kazu fuzitivu Arnolfo Teves Jr ne’e iha kanal rua, ida parte Judisiál no ida parte administrativu no kona-bá ida parte administrativu ne’e mak Governu deside tiha katak sei halo estradisaun, maibé  parte judisiál nia prosesu la’o hela no seidauk iha desizaun.

Jornalista: Vito Salvadór