Hatutan.com, (25 Dezembru 2025), Díli– Iha selebrasaun missa natal, 25 Dezembru 2025, iha Igreja Parokia Imaculada da Conceicaão, Katedral, Díli,  Arsebispu Metropolitana Dom Virgílio Cardeal do Carmo da Silva, SDB, fó sasin katak, Jesus Kristu Nia moris mak nu’udár sinal dame ba ema hotu.

Arsebispu Metropolitana Dom Virgílio Cardeal do Carmo da Silva, SDB

“Haksolok boot ita bele sei halibur hamutuk iha dader furak ida-ne’e, furak atu agradese ba Maromak ne’ebé hili atu sai hanesan ita, atu ita bele sai hanesan Maromak oan, ida-ne’e mak novidade boot liu hotu mai ita iha natal, nia hili sai hanesan ita, atu ita bele hanaran Maromak oan, momentu furak tebes ida bainhira Maromak tama iha ita ema nian istória, bainhira liafuan ne’ebé halo aan ba ema,” Dom Virgílio Cardeal hateten iha nia omilia.

Arsebispu Metropolitana Díli ne’e reafirma,  Maromak ko’alia mai ita ema Nia domin la’ós, liuhosi rai-lakan, ka  ahi-klobor hanesan Nia ko’alia iha antigu testamentu, maibé husi kosok oan ne’ebé kiikoan, Nia hakilar, Nia tanis iha animal nia han fatin.

“Loron ida ita haksolok labele sai fali loron laran susar nian, tanba moris mai ita loron ita Nai Jesus Kristu nian, tán ne’e ida-ne’e mak ita hanaran natal, Nai Jesus Nia loron moris, loron  ne’ebé boot liu loron hotu-hotu, loron ida ne’ebé ita hein Maromak Nia oan Nia loron moris ne’ebé mai atu hela ho ita,” Arsebispu Metropolitana esplika.

Maromak Nia oan Nia loron moris ne’e mós ita nian mós tanba ita mós sai Maromak oan, ema hotu ne’ebé simu nian no fiar iha Nia naran Nia fó kbiit Nia foti atu sai Maromak oan, ida-ne’e mak ksolok ne’ebé boot liu hotu, naroman boot ida mosu ona mai oan mane ida moris ona mai ita atu ita sai Maromak Nia oan sira.

Laiha buat ida boot liu ida-ne’e iha momentu ksokok ida-ne’e anju sira hanesan ita rona gloria ba maromak leten aas ba liu paz ba ema ne’ebé buka dame.

“Dalabarak dame mai maibé ita fila kotuk ita lakoi simu dame, tanba ne’e dalaruma ita selebra natal maibé haree ita tuda malu nafatin ita duni malu nafatin, tanba selebra natal ita taka hela odamatan ita nian fuan taka metin hela atu simu ksolok ida-ne’e,” tenik Dom Virgílo  Cardeal do Carmo da Silva, SDB.

Arsebispu Metropolitana Dom Virgílio Cardeal do Carmo da Silva hatutan Amu  Papa Leão XIV  katak dehan nafatin mai ita natal Nai Nian ne’e katak natal ida dame nian, Jesus mai,  tanbasa Maromak hadomi tebes mundu to’o haruka Nia oan mane mesak atu ema hotu bele fiar iha nian la mate maibé hetan moris rohan laek.

Dom Virgílio Cardeal husu, nu’udár sarani nu’udár Timoroan ne’ebé iha kultura, iha nian identidade rasik, buka tau iha foku, buat hirak ne’e atu la’o loos ita presiza saida, tenke tau ita nia foku ba buat ida sentru natal nian buat ida de’it kristu, ita bele hala’o buat hotu maibé sé laiha kristu ita nian natal ne’e folin laek.

Iha selebrasaun misa festa natal iha sidade Díli hetan partisipasaun maximu husi sarani katolika Timor-Leste no buat  hotu la’o di’ak tanba hetan seguransa maximu husi Polisia Nasionál Timor-Leste (PNTL)

Jornalista : Zita Menezes