Hatutan.com, (08 Janeiru 2026), Díli– Primeiru-Ministru (PM), Kay Rala Xanana Gusmão garante, funsionáriu iha instituisaun Estadu sira ne’ebé foin daudaun iha fulan-Dezembru tinan 2025 la simu sálariu décimo terceiro, sei simu fali iha fulan-Janeiru ne’e nian laran.

Lee Mós: FRETILIN Preokupa Funsionáriu Barak Halerik Ba Saláriu Décimo Terceiro

PM Xanana Gusmão. Foto/Marcelino Tomae

Xefe Governu hateten, ne’e la’ós primeira vez mak Governu  la selu iha fulan- Dezembru mais iha fulan-Janeiru Governu  sei  selu.

“Ne’ebé funsionáriu sira dehan ami saláriu laiha, devia agradese tanba, lae ba sosa tiha hotu tua, depois oan sira atu ba eskola osan laiha. Sei selu, ne’ebé husu ba funsionáriu sira ne’e dehan primeira vez mak akontese ne’e falta kalkulu, mais prontu sempre selu ne’e duni hotu-hotu hatene ona katak iha fula-Janeiru sei selu,” PM Xanana Gusmão informa ba jornalista sira hafoin enkontru semanál ho Prezidente Repúblika, José Ramos-Horta, iha Palasiu Prezidensiál, Kinta (08/01/2026).

PM Xanana hatutan tán katak “parese ohin, sé imi hakarak ba to’o iha Ministériu Finansa haree diretór hotu-hotu husi finansa husi Ministériu hotu no instituisaun selu-seluk iha ona Ministériu Finansa para atu loke free balance ne’ebé ba husu iha ne’ebá.”

Funsionáriu sira ne’ebé durante fulan-Dezembru to’o mai iha saláriu décimo terceiro mak hanesan funsionáriu sira husi instituisaun TIC Timor, Ministériu Komérsiu, Industria no Ambiente (MCIA),  Seguransa sivíl husi Ministériu Interiór nomós funsionariu sira husi instituisaun  indireta seluk tán.

Jornalista : Zita Menezes