Hatutan.com, (13 Dezembru 2022), Díli-Durante operasaun  Polísia Nasionál Timor-Leste (PNTL) bá hametin Lei Seguransa Rodoviariu nian iha área jurisdisaun Munisípiu Díli  konsege prende transporte hanesan motór ho karreta balun ne’ebé  komete infrasaun bainhira hala’o komboiu hodi festeja sira-nia nasaun favoritu ne’ebé manan iha jogu Kopa Mundiál Qatar 2022.

Lee Mós : Adeptu Portugál 38 Ne’ebé Kontra Regra Tránzitu, Selu Multa Kada Motór $120

PNTL Prende Motór. Foto/Dok.Hatutan.com

Hosi infratór sira-ne’e, PNTL ‘halibur’ koima ka osan ho montante $2,486 hodi kontribui bá kofre Estadu. Totál reseita ka osan hirak ne’ebé PNTL rekolla ne’e, mai hosi evidénsia motór no karreta hamutuk 108 ne’ebé prende durante semana ida nia laran, hahú hosi loron 03 to’o loron 09 fulan-Dezembru 2022.

“Totál koima ne’ebé mak ita PNTL  ‘halibur’ hosi adeptu ka fens sira ne’e nasaun sira jogu iha kopa mundiál  Qatar 2022 hamutuk $2,486. Maibé, infratór sira foin mak selu $1,799, sei falta $687,” Komandante Tránzitu Munisípiu Díli, Inspetór Domingos Sarmento Gama, informa bá jornalista sira iha kna’ar fatin, Tersa (13/12/2022).

Advertisement

Infrasaun ne’ebé sidadaun ka infratór sira komete mak hanesan, kontra ordém autoridade, la respeita sinais tránzitu, laiha asesóres ahi-oan veíkulu nian, uza motór-kareta kanu-resin, la uza kapasete, la lori dokumentus viátura nian, la monta espellu, la monta xapa matrikula,  no balun para iha zebra cross  nia-leten.

Iha mós evidénsia sira balu mak prende hosi motorista mikrolete ho angguna sira, tanba la uza unifirme motorista nian, balu ho transporte para iha ponte, kurva, kruzamentu, rai-lolon, depois balu tula pasajeiru liu kapasidade kareta nian.

Iha Lei kódigu estrada, iha artigu 162, alinea 2, hateten katak, durante loron 90 nia laran, sura hosi loron ne’ebé PNTL halo apreensaun, infratór ka motorizada ho kareta na’in sira tenke bá foti fila sira ninia transporte. Maibé, evidénsia hirak ne’e maka, ninia na’in sira la konsege selu hodi bá foti fila sira-nia transporte, maka haktuir bá lei kódigu estrada ida-ne’e, PNTL sei entrega hotu bá Diresaun Jerál Jestaun Patrimóniu Estadu (DJJPE), atu bele prosesa no deside tuir lei ne’ebé mak vigóra.

Sansaun selu multa ka koima ne’ebé PNTL aplika bá infratór hothotu uainhira komete iha infrasaun, maka sira ne’ebé uza motorizada ho kanu-resin, selu $120, xapa matrikula laiha $60, la uza kapasete $30, espellu laiha $45, transporte ne’ebé seidauk rejista iha DNTT sei selu $300.

“Tán ida-ne’e maka, oras ne’e motorizada barak mak rai hela iha arredóres komandu Munisípiu Dili nian, ne’ebé mak lubuk ida seidauk mai selu multa, tanba koima ne’ebé ami aplika, balu dehan kapasidade la to’o atu selu. Ita sei la tolera, atu kapasidade to’o ka la to’o, ninia koima maka nafatin, laiha mudansa,” Inspetór Polísia Domingos Sarmento Gama, hateten.

Advertisement

Jornalista: Rogério Pereira Cárceres