Hatutan.com, (08 Setembru 2026), Jakarta–Primeiru-Ministru (PM), Xanana Gusmão ho nia kometiva sei iha hela Jakarta-Indonézia tanba aviaun Citilink seidauk bele halo voo husi Aeroportu Internasionál Soekarno-Hatta, Tangerang-Jakarta mai Denpasar-Bali atu liu mai Díli.

PM Xanana Gusmão akompaña delegasaun iha negosiasaun ba fronteira maritima ronda dahaat iha Jakarta-Indonézia. Foto/Espesiál

Atrazu viajen kometiva PM Xanana nian  fila mai Díli tanba jestaun Aeroportu  Internasional Soekarno-Hatta taka voo lubuk ida, husi Jakarta mai Denpasar-Bali tanba efeitu husi erupsaun vulkániku foho anak Krakatau iha loron hirak tuituir malu ne’e.

Tuir ajenda PM Xanana nian to’o iha Timor-Leste iha Segunda (07/09/2026), maibé seidauk bele fila hikas mai Díli tanba daudaun ne’e aviaun labele bele semo kauza husi errupsaun sinzas vulkániku iha Java-Indonézia.

Iha Segunda-lorokraik, parta husi Média  Gabinete Primeiru-Ministru (PM) nian fó sai hikas informasaun iha grupu WhatsApp 𝐀𝐣𝐞𝐧𝐝𝐚 𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮, 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦𝐚̃𝐨 nian hanesan tuir mai ne’e, “Boa tarde kolega sira, informa de’it katak S.E. Primeiru-Ministru, Kay Rala Xanana Gusmão seidauk fila hikas mai Dili tanba daudaun ne’e aviaun labele semo kauza hosi errupsaun ahu vulkániku iha Java-Indonézia ne’ebé afeta to’o iha Jakarta inklui aeroportu Soekarno-Hatta.

Ida ne’e de’it mak informasaun ne’ebé ami hakarak partilla ba maluk jornalista sira, bainhira iha mudansa ruma ami sei atualiza imediatamente ba ita bo’ot sira. Ba atensaun no kolaborasaun ami hato’o obrigadu wain!

(Média-GPM)”

Informasaun ne’ebé iha katak kometiva PM Xanana nian  hamutuk ema na’in-sia (9)  to’o  tuku 10:45 dadeer-ne’e, Oras Timor Leste  (OTL), sei iha hela Jakarta hodi hein konfirmasaun husi parte Citilink atu bele halo voo husi Jakarta mai Denpasar-Bali.  

Tuir ajenda tentativa, posibilidade PM Xanana ho nia kometiva  halo voo sai husi Jakarta mai Denpasar-Bali, tuku 21:00 Oras Indonézia Osidentál (WIB, sigla Indonézia)  ho aviaun Citilink.

PM Xanana Gusmão halo viajen servisu  husi Díli ba Jakarta-Indonézia hodi partisipa iha negosiasaun formál ronda da-haat kona-bá delimitasaun fronteira marítima entre Timor-Leste no Indonézia husi loron 1 to’o  loron 3 fulan-Setembru 2026.

Iha loron sira tuir mai, Sesta (04/09/2026), PM Xanana halo enkontru  amizade ho eis-Prezidente Repúblika Indonézia Joko Widodo (Jokowi) iha Solo.

Iha loron 05 fulan-Setembru ne’e, PM Xanana Gusmão partisipa iha sesaun solene iha Universidade Hasanuddin (UNHAS) iha Makasar, Indonézia, hodi simu títulu akadémiku Doutor Honoris Causa.

Voo sira iha Aeroportu iha Jakarta Hahú Hikas Operasaun

Voo sira iha Aeroportu Halim Perdanakusuma iha Jakarta,  hahú fali operasaun iha Tersa (8/09/2026) tuku 00:00 Oras Indonézia Osidentál (WIB).

Anúnsiu ne’e  fó sai hosi Autoridade Aeroportu Soekarno-Hatta, ne’ebé haktuir ka espplla husi membru ida Autoridade Aeroportu Internasionál Soekarno-Hatta, liuhosi konta Instagram @otbansatu no hosi Ministériu Transporte Indonézia nian, @kemenhub51, iha Tersa-ne’e.

Hanesan relata ona antes ne’e, Aeroportu Halim Perdanakusuma, Jakarta prolonga fali operasaun voo  to’o Segunda (7/9/2026), hale’u tuku 23.59 WIB.

Jerente Jerál Operasaun Aeroportu Halim Perdanakusuma Koronel Pnb Ali Sudibyo konfirma estensaun ba taka operasaun sira Aeroportu Halim Perdanakusuma nian prolonga ona to’o tuku 23:59 WIB. (*)