Hatutan.com, (11 Novembru 2023), Díli-Subsídiu transporte kada fulan bá kada membru Parlamentu Nasionál (Deputadu) sira seidauk iha desizaun finál. Mezmu nune’e,  Prezidente Komisaun C PN bá asuntu Administrasaun Finansa Públiku, Cedelizia Faria dos Santos,  konsidera katak subsídiu transporte  bazeia duni bá estatutu no regalia Deputadu sira nian.

Lee Mós: Ramos-Horta Prefere Governu Fó Subsídiu Direta bá Agrikultór Sira

Informasaun ne’ebé Hatutan.com rekolla hosi fontes oioin katak iha polítika Orsamentu Jerál  Estadu (OJE) 2024 nian, Parlamentu Nasionál propoin orsamentu privative PN nian kontempla mós subsídiu transporte kada fulan bá kada deputadu sira $1600.

Prezidente Komisaun C PN ne’e klarifika katak foin daudaun iha jornada Orsamentu Jerál Estadu 2024 nian iha duni orsamentu privative bá PN no kontempla mós subsídiu transporte bá kada deputadu. Maske nune’e, Deputada Cedelizia Faria dos Santos, la informa valór fiksu   subsídiu transporte bá membru PN sira ne’e.

Deputada ne’e aprezenta polítika subsídiu bá transporte ne’e vinkula  tiha ona dezde  mandatu  VIII Governu  Konstitusionál bá servidór órgaun Estadu hotu-hotu atu veíkulu Estadu nian estasiona iha kada repartisaun Estadu nian. Nune’e, funsionáriu públiku, diretór jerál ka kargu xefia sira, inklui diretór nasionál no munisípiu sira la utiliza karreta Estadu nian bá uma tanba iha ona subsídiu transporte.

“Ida-ne’e mós sei aplika bá deputadu sira bainhira iha ona subsídiu bá transporte.  Katak transporte bá Deputadu sira uza bainhira mai PN mak uza no hala’o fiskalizasaun mak uza, liu ida-ne’e la uza transporte PN nian no transporte sira-ne’e estasiona iha arredores PN,”  Deputada Cedelizia Faria do Santos haktuir bá jornalista sira iha PN, Sesta (10/11/2023).

Prezidente Komisaun C PN,  Cedelizia Faria dos Santos mós haktuir, karik subsídiu transporte ne’e aban-bainrua aprová mak sei la sosa tán karreta no la uza tán karreta PN nian bá deputadu sira.

“Agora ha’u hanoin Parlamentu iha estatutu rasik fó dalan bá deputadu sira iha direitu bá transporte, sé karik ita-boot sira hatene hela orsida orsamentu ne’e sei mai fila-fali ho pakote sé karik orsida iha mós subsídiu bá transporte bá oin, deputadu sira sei la sosa karreta no sei la uza mós karreta. Katak  sei halo hanesan Governu nian hanesan mós diretór jerál  sira nian mós labele ona uza karreta no karreta fó fali hotu bá patrimóniu estadu,”  nia hateten.

“Estatutu deputadu sira nian katak direitu bá transporte, no mós hetan subsídiu ho maneira katak  ami bele  iha karreta rasik no bele mós iha direitu bá subsídiu, ha’u husu ita-boot sira bele bá loke estatutu deputadu sira hodi bele haree, no signifíka subsídiu transporte ne’e maka aprova duni sei la halo lelaun bá karreta sira ne’e no sei entrega fali bá patrimóniu estadu maka sei jere tanba dehan katak halo manutensaun no osan  konvustivél boot entaun jere rasik osan.”

Iha loron 21 fulan-Setembru 2021, Governu Anteriór ne’ebé lidera hosi Primeiru-Ministru (PM), Taur Matan Ruak aprova Projetu Dekretu-Lei Númeru 21/2021, 10 fulan-Novembru, kona-bá kria subsídiu mensal transporte bá servidor Estadu sira.

Subsídiu transporte ne’e bá titulár  sira iha kargu diresaun no kargu xefia sira, inklui funsionáriu administrasaun públiku direta no indireta.

Polítika ida-ne’e ho nia alvu atu hamenus despeza hosi atribuisaun veíkulu Estadu no promove rasionalizasaun  bá parke automovel públiku.

Montante mensál subsídiu transporte ho valor $25 bá Funsionáriu Públiku sira, Xefe Seksaun sira  no ekiparadu $50, Xefe Departamentu sira no ekiparadu $75, Diretór Nasionál, Diretór Munisipál  no ekiparadu $100 no Diretór Jerál sira no ekiparadu  $150.

 Jornalista Estajiária : Zita Menezes