Hatutan.com, (11 Marsu 2024), Díli–Ministériu Negósiu Estranjeiru Eestadus Unidus Amérika (EUA) nia Adjunta Asistente Sekretária (DAS) Melissa A. Brown, ne’ebé  lidera Gabinete Asuntu Sudeste Aziátiku no Gabinete Asuntu Marítima Sudeste Aziátiku, hala’o vizita loron tolu mai Timor-Leste.

Lee Mós: Ramos-Horta Partilla ho EUA Kona-bá Konflitu iha Myanmar

Melissa A. Brown. Foto/Espesiál

Durante ninia vizita, DAS Brown sei hala’o no envolve iha sorumutuk nivel-altu ho ofisiál prinsipál sira iha Governu. Komunikadu imprensa ne’ebé Hatutan.com asesu, Segunda (11/03/2024), relata Melissa A. Brown hasoru malu ona Primeiru Ministru Xanana Gusmão, Prezidente Ramos-Horta, Ministru Negósiu Estranjeiru no Kooperasaun Bendito Freitas, no Vise Ministra bá Asuntu ASEAN Milena Rangel.

DAS Brown lori Estadus Unidus Amérika nia naran kongratula  Timor-Leste bá susesu adezaun bá Organizasaun Mundiál bá Komérsiu (OMK) foin dadaluk ne’e.

Durante reuniaun sira ne’e, DAS Brown enfatiza kona-bá EUA kontinuasaun bá apoia Timor-Leste bá adezaun ASEAN, hametin liután relasaun bilateral, no esplora dalan foun bá kolaborasaun.

Impresaun vizita ida mak bainhira DAS Brown hasoru Primeiru-Ministru Xanana Gusmão hala’o diskusaun ne’ebé produtivu, troka perspetiva kona-áa Timor-Leste ninia prioridade bá dezenvolvimentu.

Reuniaun ne’e enfatiza Governu EUA nia kompromisu hodi apoia Timor-Leste ninia inisiativa dezenvolvimentu sira ho dalan adezaun bá ASEAN.

Durante reuniaun ho Prezidente Ramos-Horta, nia espresa gratidaun no rekoñese EUA nia kontribuisaun, sita kona-bá apoia ba Timor-Leste nia adezaun bá ASEAN, Millaun $484 ba Millennium Challenge Corporation compact, no hametin relasaun seguransa entre nasaun rua ne’e.

Melissa A. Brown serbí tiha ona nu’udár Adjunta Asistente Sekretária iha Gabinete Asuntu Ázia Leste no Pasífiku dezde tinan 2021. Nia nu’udar membru karreira ida bá Servisu Negósiu Estranjeiru Seniór, nia lidera polítika kona-bá Sudeste Aziátiku, superviziona Eskritóriu sira bá Sudeste Aziátiku Kontinentál no Marítima, no mós Eskritóriu bá Asuntu Multilaterál.

Hosi tinan 2019 – 2021, Melissa serbí ona nu’udár Enkarregada Negósiu interina, iha Estadus Unidus Amérika nia Misaun ba Asosiasaun Nasaun ba Sudeste Aziátiku (ASEAN) iha Jakarta, iha ne’ebá nia lidera ona expansaun maka’as bá EUA nia engajamentu ho ASEAN.

Antes ne’e, Melissa hala’o ona papél nu’udár Konselleira ba Asuntu Ekonómiku no Polítiku iha Embaixada EUA iha Singapura husi tinan 2016 to’o 2019, iha ne’ebé nia mós serbí nu’udár Vise-Xefe Misaun Interina bá tinan ida no superviziona ezekusaun simeira istórika EUA – DPRK iha Singapura.

Espesialista kona-bá Sudeste Aziátiku ho esperiénsia ne’ebé forte bá polítika komérsiu nian, foin daudauk Melissa dezignada bá Jakarta, Indonézia, nu’udár Xefe Unidade Investimentu no Komérsiu iha Embaixada EUA Jakarta iha Seksaun Ekonómiku nian. Iha Washington, nia mós destakada ba Gabinete Reprezentante ba Komérsiu EUA no serbí nu’udár Ministériu Negósiu Estranjeiru EUA nia Ofisiál ba Vietnam.

Antes ne’e ninia misaun diplomátika inklui iha: Port Luis, Mauritius, no Bangkok, Tailándia. Antes hala’o kna’ar hamutuk ho Servisu Negósiu Estranjeiru, Melissa hala’o kna’ar nu’udár asistente jurídika korporativa.

Nia graduada ida husi Universidade Georgetown nia Akademia Edmund A. Walsh bá Servisu Negósiu Estranjeiru. Melissa boot iha New Jersey no Jakarta, Indonézia. Nia ko’alia lian Bahasa Indonézia no Fransa no aprende mós lian Khmer (Kambódia) no dalen Hungária nian.

Jornalista: Vito Salvadór