Hatutan.com, (13 Marsu 2024), Díli– Prezidente Parlamentu Nasionál (PPN),  Maria Fernanda Lay ho Komisaun G Parlamentu Nasionál, Kuarta (13/03/2024), hala’o audiénsia ho eis-profesór kontratadu sira hodi buka solusaun bá problema sira ne’ebé  durante eis profesór kontratu sira enfrenta.

Lee Mós: Eis-Profesór Kontratadu Sira Husu PN Tau Matan bá Sira-Nia Problema

PPN Maria Fernanda Lau ho Komisaun G PN hasoru malu ho eis profesór kontratadu sira iha PN, Kuarta (13/03/2024). Foto/Zita Menezes

Iha enkontru entre ne’e, PPN Maria Fernanda Lay hato’o nia solidariedade bá eis-profesór kontratadu sira ne’ebé kontinua halo advokasia bá sira-nia direitu no PPN promete tempu fulan ida atu buka solusaun bá eis profesór kontratadu sira-ne’e nia problema.

PPN Maria Fernanda Lay mós husu bá eis-profesór kontratadu sira ne’e atu hapara ona sira nia manifestasaun ne’ebé sira sei halo nafatin to’o ohin loron hodi kumpre lei no orden sira ne’ebé vigora.

Portavoz eis-profesór kontratadu  sira nian, Agostinho Pinto  informa  PPN Maria Fernanda Lay la husu sira atu bá kompete bolsa kandidatu ne’e tanba sira hato’o ona sira nia  razaun fundaméntal saida mak  labele bá bolsu kandidatu ne’ebé mak Ministériu Edukasaun loke.

“Tanba  sé hatuur ona dekretu lei ne’e iha rua de’it ida bá ingresu espesiál sé karik nian la prienxe rekejitu ingresu espesiál nia tenke hetan fila-fali kontratu tempu determinadu bá profesór sira ne’ebé la prenxe rekejitu hodi hala’o funsaun administrativa iha eskola ne’e maka lei ne’e hateten, ne’ebé klau posizaun ami nian katak ami sei la partisipa iha bolsa kandidatu,” Nia hatutan.

Prezidente Komisaun G PN, Armando Lopes, agradese eis profesór kontratadu  sira ne’ebé mak   marka prezensa iha audiénsia ne’e.

“Iha audiénsia imi hotu hatene katak ita seidauk iha solusaun, maibé sei iha prosesu ida-ne’e mak ohin ko’alia iha audiénsia durante oras rua nian laran,” Deputadu Armando Lopes haktuir bá jornalista sira .

Nia haktuir preokupasaun eis-profesór kontratadu ne’ebé sira hato’o ne’e komisaun G sei enkamiña tuir prosesumentu ne’ebé iha no  aban-bainrua sei bolu Ministériu Edukasaun (ME) no Komisaun Funsaun Públiku (KFP) para bele halo tuir prosesu ne’ebé la’o.

“Buat ne’ebé ohin sira aprezenta bá ami ida-ne’e maka ami rejista para bele halo prosesu, maibé ami seidauk hatene katak rezultadu aban ne’e hanesan ita-boot sira nian hakarak ne’e seidauk, maibé ami sei luta nafatin bá ita boot-sira nia direitu,” Nia hateten.

 Jornalista Estajiária: Zita Menezes