Edukasaun

Ramos-Horta Ko’alia Kona-bá “Dezafiu Pás iha Mundu Kontemporáneu” iha BIISS

Published

2 years ago

18/12/2024

Hatutan.com, (18 Dezembru 2024), Díli- Prezidente Repúblika (PR), José Ramos-Horta sai oradór prinsipál iha Bangladesh Institute of International and Strategic Studies (BIISS) hodi destaka preokupasaun sira kona-bá “Dezafiu Pás iha Mundu Kontemporáneu” liga ho konflitu globál oioin, inklui funu Ukránia-Rúsia, krize sira iha Síria, Israel no Palestina inklui situasaun rejionál iha Myanmar.

Lee Mós: Vizita Dahuluk Ramos-Horta ba Bangladesh Asina MoU Rua

PR José Ramos-Horta sai oradór prinsipál iha Bangladesh Institute of International and Strategic Studies (BIISS) hodi destaka preokupasaun sira kona-bá “Dezafiu Pás iha Mundu Kontemporáneu”. Foto/Média GPR

Iha palestra ne’ebé halo iha sidade Dhaka, Tersa (17/12/2024), Prezidente Repúblika José Ramos-Horta ko’alia kona-bá konflitu globál oioin, inklui funu Ukránia-Rúsia, krize sira iha Síria, Israel no Palestina, no situasaun iha Myanmar.

Xefe Estadu mos ko’alia kona-ba krize Rohingya nian, nesesidade mos atu rezolve kestaun ida-ne’e hodi garante estabilidade rejionál.

Komunikadu imprensa ne’ebé Hatutan.com asesu relata katak Prezidente Repúblika José Ramos-Horta subliña kona-bá papél Konsellu Seguransa Nasoins Unidas nian no halo mos kritika ba lider mundiál sira tanba sira nia falta iha prevensaun konflitu.

Iha BIISS, Ramos-Horta destaka mós signifikadu hosi kooperasaun rejionál, hodi espresa otimizmu kona-ba adezaun antesipadu Timor-Leste nian ba iha Association of Southeast Asian Nation (ASEAN) iha tinan oin.

Prezidente Repúblika mós elojiu Xefe Konselleiru Governu Banglades nian (PM Interinu) Profesór Muhammad Yunus ba ninia esforsu globál hodi hamenus kiak liu hosi inisiativa mikro kréditu.

Xefe Estadu lembra uainhira nia konvida Profesór Yunus mai Timor-Leste iha 2004 hodi introdús mikro kréditu no marka inísiu ba programa sira iha Timor-Leste.

Ida ne’e reflete kona-ba Timor-Leste nia progresu dezde hahú independénsia iha 2002.

Esplika mos kona-ba Timor-Leste nia avansu signifikativu sira, inklui habelar kobertura eletrisidade besik 97% hosi total populasaun Timor nian no hasa’e esperansa moris hosi idade-60 mai kraik ba to’o idade-70 liu.

Durante nia vizita, iha agenda loro-kraik nian Prezidente Ramos-Horta mos halo audiénsia seminar ho estudante sira no lider juventude sira hodi subliña importánsia lideransa nian entre juventude sira hodi hasoru dezafiu doméstiku no internasionál atuál sira.

Hafoin ne’e Prezidente Horta halo mós aaudiénsia ho Estudante Timor-oan sira hamutuk nain-10, ne’ebé daudaun ne’e hala’o estudu universitáriu iha Bangladesh. Estudante sira kontente bele hasoru malu direta ho Prezidente Repúblika hanesan mos Lider Mundiál, hodi fahe sira nia esperiénsia no preokupasaun.

Ramos-Horta hasoru Mohamed Shahabuddin

Prezidente Repúblika José Ramos-Horta akompaña husi Ministru Negósiu Estranjeiru Bendito Freitas ho delegasaun hala’o sorumutuk ho Prezidente Bangladesh Mohammed Shahabuddin, iha Bangabhaban-Dhaka, iha Resesaun Loron Vitória Bangladesh nian ba dala-54.

Iha sira nia enkontru ne’e foka ba hasa’e relasaun bilaterál sira no esplora área kooperasaun potensiál sira hodi aselera dezenvolvimentu iha nasaun rua ne’e.

Iha Serimónia loron Vitória Bangladesh nian ne’e hahú ho toka inu Nasionál Timor-Leste nian “Pátria-Pátria” no tuir kedas ho inu Nasionál Bangladesh nian.

Prezidente Ramos-Horta marka prezensa nu’udar bainaka espesiál no partisipa iha serimónia tesi bolo iha resintu VVIP.

Resepsaun ne’e partisipa no halibur bainaka distintu oioin, Delegasaun husi Timor-Leste, Embaixadór sira, membru sira hosi konsellu asesór sira no komisáriu aas sira hosi nasaun oioin.

Jornalista: Vito Salvadór

Related Topics:Ramos-Horta Ko’alia Kona-bá “Dezafiu Pás iha Mundu Kontemporáneu” iha BIISS

Up Next

EBC Faról Hala’o Orientasaun Loron-Tolu Ba Estudante Foun 200-resin

Don't Miss

Komisaun G-PN Identifika Eskola Balu iha Munisípiu Menus Profesór

Click to comment

Edukasaun

Segunda, Timor-Leste hala’o ezame nasionál ba estudante finalista nivel sekundáriu

Published

4 days ago

17/10/2026

hatutan

Jornalista: Felix Fernandes

(more…)

Edukasaun

Kobransa Ilegál iha UNTL, Komisaun Instrusaun InvestigaDosente Na’in Rua

Published

6 days ago

15/10/2026

hatutan

Hatutan.com (15 Outubru 2026), Díli– Universidade Nasionál Timor-Lorosa’e (UNTL), liuhusi Komisaun Instrusaun, hala’o hela investigasaun ba dosente na’in rua iha Fakuldade Edukasaun no Humanidade, ne’ebé hetan alegasaun kona-ba kobransa ilegál ba estudante sira.

Pró-Reitor Asuntu Jurídiku, José Tomás Alves, ne’ebé nu’udar membru Komisaun Instrusaun, hatete katak kazu ne’e hahú bainhira estudante sira hato’o keixa ba estrutura kompetente iha UNTL. Depois, kazu ne’e refere ba Konsellu Disiplinár, ne’ebé kria Komisaun Instrusaun atu hala’o investigasaun.

José Tomás esplika katak Komisaun Instrusaun nomeia ona iha loron 17 Jullu 2026 no hahú servisu kedas. Tuir nia, suspensaun temporária ba dosente na’in rua ne’e importante atu evita interferénsia durante prosesu investigasaun no fó oportunidade ba estudante sira atu hato’o sira-nia deklarasaun ho liberdade.

“Nomeasaun husi Komisaun Instrusaun ne’e tun kedas iha loron 17 Jullu. Ami halo kedas servisu, tanba bainhira investigasaun la’o, profesór sira ne’e kontinua hala’o sira-nia atividade letiva, hanesan orientasaun no hanorin, ida-ne’e bele afeta estudante sira, tanba ne’e, Komisaun Instrusaun propoin ba Konsellu Disiplinár atu emite suspensaun ba dosente na’in rua,” José Tomás hatete iha Kampus Liceu, kuarta-feira, 14 Outubru 2026.

Nia hatutan, Konsellu Disiplinár emite karta suspensaun iha loron 8 Setembru 2026, ho prazu fulan ida, suspensaun ne’e atu para temporariamente atividade dosente sira ne’ebé hetan alegasaun viola sira-nia dever profisionál, no atu fasilita prosesu rona deklarasaun husi estudante sira.

“Karta suspensaun ne’e nia objetivu atu suspende temporariamente atividade profesór sira ne’ebé hetan alegasaun viola sira-nia dever, atu nune’e estudante sira bele ko’alia ho livre no fó oportunidade ba Komisaun Instrusaun atu rona sira-nia deklarasaun,” nia esplika.

Maski prazu suspensaun ne’e remata ona iha loron 8 Outubru 2026, ida-ne’e la signifika katak kazu ne’e rezolve ona. Tuir nia, prazu investigasaun bele estende se Komisaun Instrusaun konsidera katak kazu ne’e kompleksu no presiza tempu tan atu halibur evidénsia.

Nia hatete, komisaun sei kontinua rona testemuña no suspeitu sira, no halibur prova relevante sira atu bele konklui investigasaun ho kuidadu.

“Investigasaun ne’e sei kontinua, tanba ami presiza rona testemuña no suspeitu sira, no halibur prova sira. Hare’e ba komplesidade kazu ne’e, ami presiza tempu atu asegura katak prosesu investigasaun la’o ho di’ak,” nia afirma.

José Tomás hatete, depois Komisaun Instrusaun konklui relatóriu investigasaun, relatóriu ne’e sei submete ba autoridade kompetente iha UNTL, se hetan katak dosente sira viola duni sira-nia dever profisionál, Reitór sei foti desizaun tuir kompeténsia ne’ebé mak iha.

To’o agora, prosesu investigasaun sei kontinua, no alegasaun kona-ba kobransa ilegál ne’e sei presiza hetan konfirmasaun liuhusi rezultadu investigasaun.

Jornalista: Felix Fernandes