Hatutan.com, (11 Setembru 2026), Díli – Sekretáriu Jerál nu’udar mós Prezidente interinu partidu FRETILIN, Mari Alkatiri, klarifika katak FRETILIN la aprezenta nia kandidatu ba Prezidente Repúblika Períodu 2027-2032 tanba bazeia ba polítika no estratéjia partidu nian.

Sekretáriu Jerál nu’udar mós Prezidente interinu partidu FRETILIN, Mari Alkatiri halo konferénsia imprensa tinan 52 ezistensia FRETILIN, Sesta (11/09/2026). Foto/Hatutan.com

“Ema sira bele preokupa, ne’e polítika FRETILIN nian, estratéjia FRETILIN nian, sira komprende bainhira sira akompaña mekanizmu,” Mari Alkatiri hateten ba jornalista sira iha edifsiu eis titulár iha Farol, Díli, Sesta (11/09/2026).

Prezidente interinu partidu FRETILIN ne’e hateten kandidatu sé de’it iha liberdade atu kandidatu aan ba Prezidente Repúblika.

“Sira seluk iha figura nusá sira la tau sira nian,  CNRT nunka tau nia ema rasik, ema la preokupa, FRETILIN la tau preokupa, CNRT eleisaun ida ne’ebé mak CNRT apoiu ninia ema rasik, ne’e mak ha’u dehan agora satu kosong  to’o kongresu tán dua kosong,” Mari Alkatiri hateten.

Nia hatutan sé de’it mak atu  sai Prezidente Partidu  FRETILIN ka Sekretáriu Jerál presiza tinan-lima sai membru Komité Sentrál FRETILIN (CCF,sigla portugés)

“Saudozu Lú-Olo vive,  Lú-Olo prezente, ne’e mak polítika FRETILIN nian, laiha ema ida troka, sé troka nia troka  ha’u hotu dala ida, to’o iha kongreseu ha’u kontinua, kongresu mai sei define ninian lideransa,” Mari Alkatiri afirma.

Tinan 52 Partidu FRETILIN

Sekretáriu Jerál Partidu FRETILIN, Mari Alkatiri hateten iha selebrasaun tinan 52 ezisténsia    partidu FRETILINrekoñese Timor-Leste sei iha ki’ak barak tanba laiha unidade husi lidér sira.

Mari Alkatiri haktuir ohin loron marka partidu FRETILIN  atu organiza aan para atu responde ba povu nia ansidade hakarak atu koré aan husi dezafiu no dominasaun husi liur. Nune’e mak iha loron  11 Setembru 1974 moris  Frente Revolusionariu Timor-Leste Indepedente (FRETILIN), frente ne’e ninia karatér la’ós partidu asosiasaun nia karatér hanesan organizasaun ne’ebé bele halibur ema hotu ne’ebé hakarak indepedénsia tanba ne’e mak frente ne’e moris. 

 “Ohin, tinan 52 liu ona, sé mak ukun rasik rekoñese katak ki’ak sei barak, rekoñese ki’ak mais dalabarak la esplika tanba saida ki’ak iha, primeiru tanba laiha unidade. Ita nasionalista, ita patriota tomak bele ida-idak ho nia organizasaun no partidu, maibé iha kauza ida-ne’e tenke iha unidade ne’e mak FRETILIN nia desizaun iha politika agora,” Mari Alkatiri hateten. 

Nia hatután maské Timor-Leste indepedénsia tiha ona, maibé joven Timoroan barak mak sai imigrante ba iha nasaun seluk hodi buka moris tanba Governu laiha kapasidade atu halo Timor-Leste sai jardin ba ema hotu.

“Ha’u  ko’alia ne’e  nu’udár Sekretáriu Jerál partidu  FRETILIN, nu’udár fundadór, nu’udár mós Prezidente Interinu partidu FRETILIN nian.  Loron ohin, Tinan 52 FRETILIN, ha’u hakarak reafirma fali posizaun uluk nu’udár fundadór hakarak Timor-Leste sei sai jardin ida ba Timoroan hotu,” Mari Alkatiri tenik. (*)