Hatutan.com, (17 Abríl 2022), Díli—Loron ohin, tinan 22 liubá, 17 Abríl 1999, ema kuaze na’in-150 ne’ebé evakua husi Igreja Liquiça mai buka protesaun  iha rezidensiá matebian Manuel Carrascalão nian iha Díli hetan atake ho brutalizmu husi membru milisia Besi Merah Putih (BMP) no Aitarak.

Masakre iha rezidénsia Manuel Carrascalão iha Dili, 17 Abríl 1999. Foto/Do. Família Carrascalão

Istória Pasadu tuir Relatóriu Chega!,ne’ebé publika iha Pajina Facebook Centro Nacional Chega – CNC katak, hafoin akontesimentu masakre iha Igreja Liquiça, ema barak mak halai mai Díli no evakua iha Manuel Carrascalão nia uma (tempu ne’ebá Manuel Carrascalão sei moris).

Membru husi milisia BMP no Aitarak, hamutuk ho militár Indonézia oho maizumenus ema na’in 19, bainhira sira halo atake ba uma Manuel Carrascalão no dala ida tan, atake ne’e hatudu sinál katak, militár Indonézia no milisia sira servisu hamutuk duni.

Atake akontese hafoin manifestasaun boot ida ne’ebé partisipa husi ema kuaze 5.000 husi Forsa Kombatente Integrasaun (Pasukan Pejuang Integrasi) iha Edifísiu Governadór nia oin iha Kapitál Díli. Durante manifestasaun boot ne’e, lider pro-integrasaun sira provoka ema atu kaer no oho sira ne’ebé la apoia integrasaun ba Indonézia.

Manifestasaun ne’e partisipa husi autoridade seniór governu nian, inklui Governadór Provínsia Timor-timur (Timtim), Abílio Soares, Administradór (Bupati) Díli – Domingos Soares, Komandante Korem Timtim, Koronel Tono Suratman, Adjuntu Operasaun Xefe Estadu Maiór Ezérsitu Maiór Jenerál Kiki Syahnarki no Ofisiál Altu Forsa Armada na’in haat seluk tan.

Hafoin manifestasaun ne’e remata, lider milisia ho inisiál M76 lidera grupu boot ida hodi halo karavana hale’u Dili. Sira halo atake ba alvu balun iha dalan ibun molok to’o ba iha Manuel Carrascalão nia uma.

Ema kuaze 150 mak buka protesaun no hela iha ne’ebá, hafoin sira halai husi atake oi-oin hanesan Masakre iha Igreja Liquiça.

Durante atake ne’e, milisia Aitarak no BMP oho mós Manuel Carrascalão nia oan mane ne’ebé adolexente hela – Manuelito. Ema seluk ne’ebé sira oho ho katana no tudik mak hanesan: Eduardo de Jesus, Alberto dos Santos, Antonio da Silva Soares, Januario Pereira, Raul dos Santos Cancela, João dos Santos, Crisanto dos Santos, Rafael da Silva, Afonso Ribeiro, dan César dos Santos. Balun ne’ebé hetan kanek todan mak Augustinho Beito X. Lay no sira seluk tan.

Ema balun esforsu atu haksoit liu moru iha uma ne’e, maibé la konsege tanba uma ne’e serku ona husi ema armadu sira.

Testemuña barak mak konfirma katak, membru forsa Indonézia ho roupa sivíl husi Koramil iha Maubara mós envolve iha atake ne’e. Entretantu Ofisiál Altu Militár Indonézia ba Timor-Leste Koronél Tono Suratman lakohi foti medida ruma bainhira Manuel Carrascalão husu nia atu hapara atake ne’e.

Masakre iha Uma Manuel Carrascalão la’ós úniku insidente ho ema mate iha Díli, iha loron 17 fulan-Abríl 1999, maibé iha akontesimentu seluk iha loron hanesan membru militár Indonézia no milisia sira oho mós Manuel Pinto, hanesan membru klandestina ida ne’ebé foin to’o iha Terminal Becora, husi Baucau. Manuel Pinto hetan kanek todan no lori ba Klínika Motael, no iha ne’ebá mak nia hakotu iis.

Jornalista: Rogério Cárceres