Hatutan.com, (10 Setembru 2022), Díli—Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio akompaña hosi ekipa responsável Deklarasaun Rendimentu, Bens no Interese Antonino Alves no Espesialista Anti-Korrupsaun (EAK) partilla koñesimentu tékniku kona-bá priensimentu deklarasaun rikusoin iha sistema plataforma online nian ba estrutura Komandu Jerál Polísia Nasionál Timor Leste (PNTL) ho membru investigadór sira iha salaun PNTL Caicoli, Díli, Sesta (09/09/2022).

Komisáriu Adjuntu CAC ba Asuntu Prevensaun no Sensibilizasaun, Luis de Oliveira Sampaio akompaña hosi ekipa responsável Deklarasaun Rendimentu, Bens no Interese Antonino Alves no Espesialista Anti-Korrupsaun (EAK) partilla koñesimentu tékniku kona-bá priensimentu deklarasaun rikusoin iha sistema plataforma online nian ba estrutura Komandu Jerál PNTL ho membru investigadór sira iha salaun PNTL Caicoli, Díli, Sesta (09/09/2022). Foto/CAC.

Atividade ne’e realiza bazeia ba pedidu Komandu Jerál PNTL nian ne’ebé husu Komisaun hodi esplika ho komprensivu liu-tán prosesu priensimentu deklarasaun rikusoin liu hosi Plataforma online ba estrutura PNTL nian ne’ebé sujeita ba rejime DRBI nian, liu-liu hasa’e sira nia koñesimentu tékniku ba sistema ida ne’e hodi deklara sira nia rikusoin mai iha CAC.

Lee Mós: Lei MPCC Obriga Ajente Públiku Deklara Rikusoin

Komisáriu Adjuntu Sampaio hato’o liafuan badak kona-bá polítika Estadu nian ba hamosu Lei MPCC, prtikularmente iha rejime Reklarasaun Rendimentu, Bens no interese (DRBI) ninian.

Adjuntu Sampio ba estrutura PNTL nian hateten, lei nú. 7/2020-MPCC, partikularmente iha rejimentu deklarasaun rikusoin nian hatuur vizaun estratéziku Estadu nian ne’ebé refleta ba aspirasaun no mehi boot povu nian ba moris di’ak, no refleta mós vizaun Estadu nian ba politika prevensaun krime korrupsaun iha TL.

Estadu hamosu Lei MPCC hatudu sentidu boot Estadu nian kona-bá oinsá proteze nia sidadaun sira ne’ebé haknaar-an iha instituisaun Estadu atu la monu ba tentasaun sira krime korrupsaun nian no lei ida ne’e partikularmente iha rejime deklarasaun rikusoin nian fó énfaze ba medida prevensaun, enkuantu medida represivu nu’udár opsaun últimu.

“Lei ne’e reprezenta hanoin boot sira Estadu nian katak, rekursu sira Estadu aloka ba servisu sira represivu, ita hanoin de’it hatama ema ba kadeia, tanba de’it neglizénsia ka auzénsia koñesimentu no ida ne’e mós Estadu lakon rekursu barak ba ema sira ne’e, tanba Estadu tenke finansia sira nia vida durante iha prizaun. Ida-ne’e halo Estadu lakon dobru, no Estadu hakarak muda ita nia pensamentu, ita konsentra ba medida sira prevensaun no medida represivu nu’udár opsaun últimu,” Hatutan.com sita deklarasaun Adjuntu Sampaio iha komunikadu.

Estadu introdús lei MPCC nu’udár instrumentu estratéjiku no poderozu tebes, ne’ebé bele prevene no kombate korrupsaun nu’udár evolusaun ne’ebé akontese iha nasaun sira seluk.

Tuir relatóriu Banku mundiál nia relata katak, iha nasaun 160 resin mak opta ona Sistema ida-ne’e no lori susesu boot ba prevene no kombate korrupsaun iha sira nia rain.

Estudu sira iha rai seluk mós hatudu katak, rejime deklarasaun rikusoin ne’e nu’udár mós intrumentu estratéziku ida promove transaparánsia públiku no konfiansa públiku nian ba ajente públiku sira Estadu nian no mós promove integridade instituisaun Estadu.

Jornalista: Cipriano Colo