Hatutan.com, (03 Dezembru 2021), Dili—Árbitu ne’ebé lidera jogu entre Aitana FC ho Lalenok United FC, la hatudu nia konsisténsia iha desizaun, ikus-mai ekipa rua tenke hatudu jogu ‘Kasar’ iha kampu laran.

Árbitu ne’ebé lidera jogu entre Aitana FC ho Lalenok United FC, la hatudu nia konsisténsia iha desizaun, ikus-mai ekipa rua tenke hatudu jogu ‘Kasar’ iha kampu laran. Foto/Hatutan.com.

Ekipa rua iha vontade as atu respeita regra no esportibilidade hodi hakruk ba regra fair play, maibé Árbitu la obedese ba regulamentu no disiplina jogu, ikus mai jogadór sira fóti desizaun joga ho emósaun hodi hurlele malu iha kampu laran to’o balun sofre aleiza.

Notísia iha Relasaun:Assalam FC Haksoit Sai Hosi Zona Me’an Hafoin Manan DIT FC 3:1

Treinadór Aitana FC Octavio da Costa agradese ba jogu ohin maske ekipa derrota no promete sei hadi’a iha jogu sira tuir mai.

Árbitu nia lideransa iha jogu ohin adeptus no ema hotu akompaña tanba ne’e lakohi komenta, maibé husu atu Árbitu halo konfirmasaun ba malu molok fóti desizaun, se la’e sira kontra ona regulamentu Árbitu nian.

“Sira presija hadi’a sira nia kritériu. Ami husu sira atensaun ho regra hodi hadi’a tan sira nia kapasidade,” Octavio da Costa, lamenta.

Nune’e mós Treinadór Lalenok United FC agradese ba jogadór sira ohin servisu makas ikus mai rekolla pontu tolu.

Kona-ba Árbitu, nia lakohi fó komentáriu tanba insidente sira ne’ebé akontese bei-beik ona no nunka iha mudansa.

“Uluk kedan ami nia ekipa sofre tanba de’it Árbitu nia failansu hanesan mós ohin se Árbitu di’ak karik ha’u nia jogadór no ekipa adversáriu nia jogadór balun bele hetan kartaun me’an,” Gaspar Amaral, lamenta.

Árbitu ohin la firme ho nia desizaun nune’e hamosu dezintendimentu balun iha kampu laran no ba oin presija hadi’a.

Ekipa Aitana FC ho Lalenok United FC. Foto/Hatutan.com.

Iha jogu Aitana FC hetan uluk oportunidade hodi halo ameasa ba nia adversáriu Lalenok United FC, maibé sei falla tanba baliza adversáriu sei antesipa ho di’ak.

Ekipa rua hatudu balansu iha jogu hodi nafatin mantein ida-idak nia ritmu. Lalenok United FC hetan oportunidade liu hosi jogadór estranjeiru Italo Pementel (28), maibé sei falla tanba baliza sei antesipa ho di’ak.

Ekipa Lalenok United FC la hatudu sira nia ofensidade hodi halo atake ba ekipa Aitana FC, nune’e fó oportunidade ba adversáriu halo atake no domina liu iha bola klaran, hodi lansa atake liu hosi avansadu Edit Savio (9) no Miguel Ximenes (19) maibé tanba falla iha komunikasaun, nune’e labele atu aproveita oportunidade hodi halo golu.

Aitana FC sei nafatin lidera ball posesion maski dalaruma lakon kontrolu no Lalenok United FC aproveita hodi halo atake. Ekipa rua iha balansu ba jogu maibé nafatin halo esforsu atu buka oportunidade hodi lidera uluk.

Aitana FC nafatin halo atake ba ekipa adversáriu liu hosi kombinasaun jogadór sira iha liña médiu no avansadu.

Iha minutu 37, jogadór Aitana FC Miguel Araújo simu kartaun kinur hafóin halo falta hasoru jogadór Lalenok United FC Abrão Mendonca (31).

Liu hosi oportunidade ne’e, koLalenok United FC la lakon oportunidade liu hosi bola falta sira sempre halo ameasa.

Jogadór Aitana FC sempre komete erru iha área grandeal oin ne’ebé halo ekipa adversáriu sempre hetan oportunidade no jogadór estranjeiru Italo Pimentel (28) ne’ebé ezekuta bola falta hirak ne’e sempre fó ameasa ba baliza Aitana FC.

Tama ba minutu 45 Lalenok United FC hetan oportunidade osan mean bainhira jogadór Aitana FC Angelo Fernandes (8) halo falta iha área grandeal oin bainhira salva bola ho liman.

Italo Pimentel (28) ne’ebé ezekuta bola falta ne’e susesu hatama golu hafóin baliza Aitana FC Yusak Redjauw (30) la konsege antesipa bola nune’e bola liu hosi nia ain okos no tama ba rede laran.

Ho golu ne’e, ekipa Lalenok United FC lidera kedan ho skore 1:0. Jogu primeira parte remata ho vitória ba Lalenok United FC.

Tama ba segunda parte, Aitana FC hola kedan inisiativa hodi halo atake ba Lalenok United FC ho intensaun atu duni atrazu ne’ebé iha no halo impata ba jogu hodi buka oportunidade ba rekolla vitória.

Ekipa rua iha espiritu as atu kontinua hatudu jogu ho fair play, maibé iha insidente balun ne’ebé Árbitu laiha korajen atu fóti desizaun ho los ikus mai tensi jogu sa’e no jogadór sira hahu halo jogu ‘Kasar’ nune’e impaktu ba inspiritu Fair Play.

Lalenok United FC halo subtituisaun ba nia jogadór hodi hatama Osorio Gusmão (6) no hasai Melchior  Ribeiro (29) iha minutu 65.

Ekipa Aitana FC ho Lalenok United FC. Foto/Hatutan.com.

Hafóin subtituisaun ne’e, ekipa rua nafatin hatudu jogu hodi mantein ritmu maibé nafatin mósu insidente jogadór sira hatudu jogu makas ba malu hodi hapara jogu kuaze minutu rua nia laran tanba de’it Árbitu inkonsistente ho nia desizaun ne’ebé iha tendensia halis ba ekipa ida.

Tama ba minutu 70 jogadór hosi Lalenok United FC Italo Pemental (28) no jogadór hosi Aitana FC Francelino Belo (22) simu kartaun kinur hafóin halo falta ba malu.

Aitana FC halo substituisaun ba nia jogadór hafóin Francelino Belo (22) sofre aleiza no hatama Emeliano Parade (5) iha minutu 78.

Liu de’it minutu ida Aitana FC kontinua halo substituisaun hodi hasai Miguel Araujo (11) no hatama Frachyasma Kefy.

Jogafór Aitana FC Emilisno Parada ne’ebé fóin tama tenke simu kartaun kinur hafóin halo falta hasoru jogadór adversáriu iha minutu 80.

Hafóin falta ne’e, Parte adversáriu Lalenok United FC kontinua halo substituisaun hodi hasai Danielson Araujo (26) no hatama Patrick Berko (25).

Jogadór ekipa rua nafatin hatudu jogu brutu ou ‘Kasar’ ba malu hodi hamósu kartaun kinur tanba inkonsisténsia hosi Árbitu nia desizaun balun antes ne’e.

Jogadór avansadu Aitana FC Edit Savio (9) ho jogadór Lalenok United FC Abrão Mendonca (31) obrigadu tenke simu kartaun kinur tanba halo asaun fiziku ba malu. Situasaun ne’e obriga ofisiál Aitana FC balun mós simu kartaun me’an no obrigadu tenke husik bens.

Udan obriga ekipa rua tenke joga iha bee laran no jogadór sira halo esfórsu hodi suta bola as tanba pasajen bola badak la konsege tamba bola mout iha bee leten no kuaze la la’o tuir objetivu.

Situasaun ne’e obriga Aitana FC kontinua halo substituisaun ba jogadór hodi hasai kapitaun ekipa Miguel Ximenes (19) no hatama Rivaldo Correia (12) iha minutu 89.

Tama ba minutu ikus, Lalenok United FC halo substituisaun hodi hasai Italo Pimentel (28) no hatama Delcio Pereira (17).

To’o jogu remata, ekipa rua mantein skore iha tabela no Aitana FC tenke fila ho liman mamuk enkuantu Lalenok United FC fila ho vitória.

Jornalista: Vito Salvadór