Hatutan.com, (03 Dezembru 2021), Dili—As Ponta Leste FC ho AD SLB Laulara FC iha ambisaun atu konkista vitória hodi asegura pozisaun iha tabela klasifikadaun provizóriu jornada dahaat, Liga Futeból Timor Leste (LFTL).

Treinadór As Ponta Leste, Francisco Araújo. Foto/Hatutan.com.

Ekipa rua sei joga iha loron Domingu (05/12/2021) iha estádiu munisipál Dili, tuku 16:00 otl.

Notísia iha Relasaun:Assalam FC Haksoit Sai Hosi Zona Me’an Hafoin Manan DIT FC 3:1

Treinadór As Ponta Leste, Francisco Araújo hateten, ekipa ne’e iha kultura futeból ida di’ak liu iha ball posesion, tanba ne’e sei halo esforsu atu asegura ekipa adversáriu nia jogu iha liña klaran.

Advertisement

“AD SLB Laulara FC sempre hala’o jogu iha klaran no halo atake liu hosi avansadu sira iha liña estremu, direita, nune’e mós ho esquerda. Tanba ne’e, ha’u prepara ona ekipa atu asegura no importante loos ami tenke manán iha jogu médiu,” Francisco Araújo  hateten liu hosi konferénsia imprensa ne’ebé hala’o iha sede LFTL Bairro dos Grilhos, Dili, Sesta (03/12/21).

Treinadór foin sa’e ne’e sei motiva jogadór-sira atu halo esforsu no servisu makás atu bele rekolla rezultadu ida di’ak ba ekipa.

“Iha kampu laran jogadór sira esforsu no hosi kampu ninin ha’u mós sei nafatin fó motivasaun máximu ba jogadór sira  ho orientasaun téknika sira ne’ebé iha,” Francisco Araújo, hatutan.

Treinadór AD SLB Laulara FC, Efrem Jerónimo. Foto/Hatutan.com.

Nune’e mós treinadór AD SLB Laulara FC, Efrem Jerónimo hateten, AD SLB Laulara FC iha preparasaun ida di’ak, tuir kondisaun jogadór ne’ebé ekipa iha tanba As Ponta Leste FC la’ós ekipa kiik no sira mós iha kualidade hanesan ho ekipa primeira divizaun seluk.

“Ami sei la halo mudansa ba plantel íntimu ne’ebé iha, maibé bele iha mudansa ruma iha jogu nia laran konforme kondisaun jogadór sira nian,” Efren Jerónimo, hateten.

Eis jogadór, ekipa Makikit Laulara ne’e hatutan, ekipa hotu-hotu iha ambisaun atu manán maibé iha jogu  minute 90  mak sei determina. AD SLB Laulara FC nafatin halo esforsu tuir matéria jogadór.

Advertisement

“Jogadór sira sei joga tuir esperiénsia ne’ebé sira iha no importante fó vitória ba ekipa ho skill ne’ebé iha,” Efrem Jerónimo, akresenta.

Atu fó hanoin hikas katak, As Ponta Leste FC oras-ne’e okupa segunda klasifikasaun provizóriu iha tabela klasifikasaun ho pontus neen hosi jogu rua ne’ebé sira enfrenta, enkuantu AD SLB Laulara FC rekolla ona pontu lima hosi jogu no okupa terseira klasifikasaun provizíriu iha tabela klasifikasaun LFTL.

Jornalista: Rogério Cárceres

Advertisement