Hatutan.com, (19 Maiu 2022), Díli—Prezidente Repúblika (PR), Francisco Guterres Lú Olo, sei kondekora Prezidente Repúblika Portugueza, Marcelo Rebelo de Sousa, no Governadór-jerál Australia, David John Hurley, ho grau Grande-Colar.

Prezidente Repúblika Portugueza, Marcelo Rebelo de Sousa, no Governadór-jerál Australia, David John Hurley. Foto/Repro.

“Serimónia kondekorasaun ba Prezidente Repúblika, Marcelo Rebelo de Sousa, no Governadór-jerál David John Hurley sei hala’o, ohin,  iha Palásiu Prezidensiál Nicolau Lobato,” Hatutan.com sita komunikadu hodi Prezidénsia Repúblika.

Prezidente Repúblika Portugueza, Marcelo Rebelo de Sousa, nu’udár sidadaun mundu nian ne’ebé defende valores universais hanesan pás, liberdade no autodeterminasaun povu, liberdade espresaun, fraternidade entre povu husi nasaun oioin, no valores seluk ne’ebé sai komun ba timoroan sira.

Iha Dekretu Prezidente Repúblika númeru 28/2022, 18 maiu, hateten “Iha tinan-20 Restaurasaun Independénsia domin ne’ebé Prezidente Marcelo Rebelo de Sousa sente ba Timor-Leste no husi Povu timorense halo há’u pessoalmente sente domin husi timoroan ba Portugal, ba portugés no Língua Portugeza.

Governadór-jerál Austrália nu’udár belun boot Timor-Leste nian.  Ligasaun atuál Governadór-Jerál Austrália ho Timor-Leste hahú tiha ona molok Restaurasaun Independénsia.

David Hurley komanda Primeira Brigada iha 1999 no 2000 iha Darwin, apoiu operasaun lidera husi Australia iha Timor-Leste durante período ne’e.

Iha Dekretu Prezidente Repúblika númeru 29/2022, 18 maiu, hateten: “David Hurley, Governadór-jeral Australia, desde 2019, kontinua guia nia komportamentu atu hasa’e sentidu Estadu ne’ebé karateriza, hametin relasaun amizade entre Estadu no Povu Timor-Leste no Australia. Agora mak to’o ona momentu katak Repúblika Demokrátika de Timor-Leste no Povu Timorense rekoñese, ho gratidaun, papel ne’ebé dezenvolve husi David Hurley.

Ordem Timor-Leste kria husi Dekretu-Lei númeru 20/2009, 6 maiu, ho objetivu atu rekoñese no agradese nasionais no estranjeirus, tanba sira-nia komportamentu ou aktu ne’ebé sira pratika, iha kontributu signifikativu ba benefísiu país, timoroan ou umanidade.

Ordem Timor-Leste iha grau haat, ida mak Grande-colar. Grande-colar atribui eskluzivamente atu agrasia Xefe Estadu husi paízes soberanus.

Jornalista: Vito Salvadór