Hatutan.com, (31 Maiu 2022), Díli-Polisia Nasionál Timor-Leste (PNTL) Munisípiu Ermera, Tersa (31/05/2022), iha kalan fahe rua, kaptura no detein ona autór na’in-tolu ho inisiál ZS (67), ADZ (54), no LDC (27), iha Aldeia Sakoko, Suku Ponilala, Postu Administrativu Ermera, Munisípiu Ermera.

Foto/Ilustrasaun

Xefe Suku Ponilala, Amaro Silvério dos Santos, informa katak, iha Segunda (30/05/2022), tuku 22:liu, vítima sai hosi nia uma iha Aldeia Eroho, la’o kuaze kilómetru ida, bá iha suspeita ADZ nia uma, iha Aldeia Sakoko, Suku Ponilala, hodi obriga atu halo relasaun seksuál. Maibé, tanba suspeita ADZ rejeita ka lakohi, ikus mai mosu dezentendimentu fízika entre vítima ho suspeita, to’o uza kro’at (katana) hodi taa vítima to’o iis kotu. 

“Matebian ida vítima ne’e, sai hosi nia uma iha Aldeia Eroho, kala besik kilómetru ida, bá buka fali señora ka suspeita ne’e, iha ninia uma iha Aldeia Sakoko. Depois kala obriga dehan atu halo relasaun seksuál no akontese diskusaun to’o baku malu, ne’e maka señora ne’e baku nia mate ne’e. Señora ne’e mak taa duni, nia uza katana,” Xefe Suku Ponilala, Amaro Silvério dos Santos, informa ba Hatutan.com, iha via telefónika.

Ho akontesimentu ida ne’e, Portavós Komandu Jerál PNTL, Superintendente Xefe Polísia, Armando Monteiro, hateten, Komandu PNTL Munisípiu Ermera, liuhosi Eskuadra Ermera Vila, halo ona atendimentu ba kazu ne’e, no mós kaptura kedan ona autór sira hamutuk na’in-tolu.    

Advertisement

“Hosi akontesimentu ida ne’e, ita-nia komandu PNTL Ermera, hola medida polisiál ona, no halo kapturasaun bá suspeitu na’in-tolu ne’ebé mak sai autór prinsipál bá kazu asaltu no omisídiu ida ne’e,” Armando Monteiro informa.

Matebian nia isin mate, parte ekipa Saúde hamutuk ho PNTL Munisípiu Ermera, halo kedan prosesu evakuasaun, no transporta mai Ospitál Nasionál Guido Valadares (HNGV), Bidau, Dili, hodi submeter bá autópsia.

Suspeitu na’in-tolu ne’e, kontinua submete bá prosesu investigasaun durante oras 72 nia laran, no bainhira finalidade hosi investigasaun ida ne’e, liuhosi Servisu Investigasaun Kriminál, komandu PNTL Munisípiu Ermera, sei aprezenta bá Tribunál Distritál  Díli (TDD).

“Motivu hosi kazu asaltu no omisídiu agravadu iha Ponilala, Ermera, tanba mosu dezentendimentu komunikasaun liuhosi telefone. Hosi ida ne’e, parte rua la satisfás, no hasoru malu, hodi espresa sira nia emosaun id- ne’e, to’o’ ikus, rezulta vítima lakon vida,” hateten komandante Armando.

Jornalista: Rogério Pereira Cárceres

Advertisement