Hatutan.com (30 Maiu 2021), Díli—Tribunál Distritál Dili (TDD) iha Segunda 30 fulan ne’e liu hosi leitura sentensa ne’ebé lee sai hosi juiza koletiva Ana Paula Fonseca, Maria Solana, Zulmira Auxiliadora kondena membru Polísia Nasionál Timor-Leste (PNTL), arguidu Mariano de Jesus ho pena prizaun efetivu tinan 25.

Kondenasaun ne’e tanba utiliza pistola hodi hamate Mateus de Deus, Camilo da Conceição de Deus no hakanek lezadu Januário Pereira iha Lahane Oriental iha tinan 2021.

Lee Mós:Tribunál Halo Alterasaun Naun Substansiál ba Omesídiu Lahane

Razaun Tribunál kondena arguidu ho pena refere, tanba konsidera faktus hotu ne’ebé konsta iha akuzasaun provadu hotu bazeia ba konviksaun arguidu ne’ebé konfesa totalmente, katak loos duni momentu ne’ebá nia utiliza pistola hodi tiru mate vitima Mateus de Deus, Camilo da Conceição de Deus no hakanek lezadu Januário Pereira iha Lahane Oriental.

Hafoin desizaun, Advogadu privadu Câncio Freitas konsidera desizaun Tribunál la harea ba sirkuntánsia atenuante ne’ebé iha liu-liu ba arguidu nia konviksaun ba faktus no arepende ba krime ne’ebé nia halo.

“Tuir loloos krime ne’e bele hatun ba prizaun tinan 15 ka 17, maibé Tribunál deside pena prizaun tinan 25 ba ha’u nia kliente hodi la haree ba sirkunstánsia hotu ne’ebé iha. Tanba ne’e iha prazu loron 15 nia laran ha’u sei halo rekursu,”Advogadu privadu Cânsio Freitas ba Hatutan.com via whatshap, Segunda (30/05/2022).

Antes ne’e, iha audiénsia julgamentu ne’ebé hala’o ona iha loron 10 fulan ne’e ho númeru kriminál 0173/21.PCCC, arguidu konfesa totalmente katak nia utiliza duni pistola ne’ebé PNTL atribui ba nia hodi tiru no hamate vitima Mateus de Deus, Camilo da Conceição de Deus no hakanek lezadu Januário Pereira.

Tuir akuzasaun hosi MP katak arguidu servisu nu’udár Polísia Nasionál Timor-Leste (PNTL), kolokadu iha Komandu Polísia Munisipiu Dili, nomeadamente iha Eskuadra Na’in-Feto, no relativa ho servisu ne’e PNTL atribui Pistola ida ho marka Glock 19, númeru serial FHX 093.

Maibé iha loron 05 fulan Juñu tinan-2021 haleu tuku 02:00 madrugada, arguidu ba iha vitima Mateus de Deus ho Camilo da Conceição de Deus nia uma ne’ebé lokaliza iha aldeia Ainitas Hun, suku Lahane Oriental, Postu Administrativu Vera Cruz, hodi bolu vitima Camilo de Deus nia naran ho lian makas, tanba ne’e vitima Camilo de Deus hamutuk Equilides de Jesus sai hosi uma laran hodi ba hasoru arguidu.

Bainhira vitima Camilo de Deus ho Equilides de Jesus sai hosi uma laran, arguidu hateten ba vitima Camilo de Deus katak “ita bo’ot ba sa’e kareta, Maibé vitima Camilio de Deus responde “hau la ba!! tanba ó hatais sivil hela no kuandu ó la uja farda PNTL hau sei la ba sae kareta.

Maibé arguidu kontinua obriga vitima Camilo hodi ba sa’e kareta, Maibé vitima lakoi ho nune’e arguidu konsege dudu vitima Camilo de Deus nia hirus matan no vitima Camilo mos halo reazen hodi dudu hasoru arguidu, ho situasaun ne’e halo arguidu nervozu no losu pistola iha kanotak hodi direta tiru ba vitima Camilo de Deus nia kabun parte los hodi halo vitima monu kedan ba rai.

Rona kilat tarutu vitima Mateus de Deus halai sai ba liur hodi hakilar arguidu dehan Mariano, Maibé arguidu kontinua halo reazen hodi tiru kona iha vitima Mateus de Deus nia hirus matan halo vitima monu ba rai.

Situasaun ne’e, akontese mos ba lezadu Januário Pereira, kuandu rona kilat tarutu lezadu sai kedan hosi uma laran ba liur no momentu ne’eba lezadu hare vitima Mateus de Deus monu hela iha rai ho ran nakonu no arguidu kaer hela Pistola iha liman halo lezadu tauk no tenta hodi halai tama fali ba uma laran, Maibé arguidu tiru lezadu hosi kotuk no kilat musan kona iha lezadu nia ain parte karuk halo lezadu monu hela iha odamatan oin.

Bainhira vitima Camilio de Deus, Mateus de Deus monutun ba rai ho ran ne’ebé nakonu inklui lezadu Januário Pereira, arguidu halai ses kedan hosi fatin akontesimentu.

Hosi akontesimentu ne’e rezulta Camilio de Deus, Mateus de Deus mate fatin no lezadu Januário Pereira kanek todan.

Tuir relatóriu teste balistika ba Pistola Glock 19 ho númeru serial FHX 093, ne’ebé mak fó sai hosi Labertóriu Polísia Sientifika (LPC) hatudu katak pistola musan sira halo mate vitima Mateus de Deus ho Camilo de Deus no halo kanek lezadu Januário Pereira ne’e, mai hosi Pistola ho maraka Glock 19 ho númeru serial FHX O93 ne’ebé tiru sai hosi arguidu, tanba ne’e MP akuza arguidu ba pratika krime omesidiu agravadu dala rua no tentativu omesidiu ne’ebé previstu iha artigu138 hosi kodigu penal TL.

Audiénsia julgamentu prezide hosi juiza koletiva Ana Paula Fonseca, Maria Solana, Zulmira Auxiliadora, MP reprezenta hosi prokuradór Jacinto Babo, arguidu hetan asisténsia legál hosi Advogadu Privadu Câncio Freitas.

Jornalista: Carmelita Isaac