Hatutan.com, (08 Jullu 2022), Díli-Tribunál Distritál Díli (TDD), Sesta (08/07/2022), kontinua hala’o julgamentu bá krime espozisaun ka abandonu ne’ebé deskonfia involve arguida ho inisiál JS tanba soe nia oan rasik hafoin partu.

Foto/Repro

Iha audiénsia julgamentu arguida konfesa faktu, maibé la’ós atu soe nia oan, tanba iha momentu ne’ebá nia bá hili ai no derrepente kanotak moras tanba ne’e arguida partu hela iha ai-laran, maibé hafoin partu arguida husik hela bebé no fila bá uma foti ropa no bainhira fila fali bá fatin komunidade sira foti ona nia oan.

Hafoin rona arguida Tribunál adia hikas julgamentu bá loron seluk hodi kontinua rona sasin sira.

Tuir akuzasaun husi MP katak iha loron 09 fulan-Outubru 2018, hale’u tuku 15:00 Otl iha área balun ne’ebé pertense bá Munisípiu Liquiça, arguida ho kondisaun gravida no bainhira arguida mesak de’it iha uma derrepente kanotak moras ne’ebé ikus mai partidu bebé ida, maibé arguida falun bebé ne’e ho neras hodi lao subar iha ai-laran fuik hodi latan hela bebé ne’e no lori rai inklui ai-tahan taka hela no arguida husik hela hodi fila bá uma.

Advertisement

Momentu ne’ebá sasin Valentino Pires Ribeiro Soares, hili ai-maran no rona bebé tanis tanba ne’e nia hakbesik bá hodi haree no konsege hasees rai no ai-tahan iha bebé nia isin lolon no sasin halai fila bá uma hodi bolu família  ajuda no ikus mai konsege salva bebé ho sexu feto ida.

MP akuza arguida bá pratika krime espozisaun ka abandonu ne’ebé previstu iha artigu 143 husi kódigu penal Timor-Leste.

Audiénsia julgamentu prezide husi juis koletivu, Alvaro Maria Freitas, José Gonçalves, Argentino Nunes, MP reprezenta hosi Prokuradór Jacinto Babo no arguida hetan asisténsia legál hosi advogadu privadu Tomázia Umbelina Magno ho Xisto Pedroso.

Jornalista : Carmelita Isaac

Advertisement