Hatutan.com, (05 Agostu 2022), Díli—Hahú hosi Janeiru to’o Juñu tinan ne’e, Konfederasaun Sindikatu Timor Leste (KSTL) rejista kazu ka keixa ne’ebé akontese entre traballadór ho empregadór hamutuk 110.

Traballadór sira komemora loron mundiál traballadór nian, 01 fulan-Maiu 2022. Foto/Hatutan.com

Hosi númeru kazu ne’e, iha kazu tolu mak seidauk rezolve tanba sei iha faze negosiasaun entre traballadór no empregadór.

Lee Mós: May Day, Traballadór Sira Husu Governu Hasa’e Saláriu Mínimu Bá $200

“Tinan kotuk ami rejista kazu 400-resin, maibé iha tinan ne’e tún ba 110 no iha kazu tolu mak sei iha hela faze negosiasaun. Kazu lima seluk iha konsellu arbitrajen do trabalho iha SEFOPE nia okos, maibé relasiona ho krime foin maka ida-ne’e no ohin halo julgamentu,” Prezidente KSTL, Almério Vila Nova hateten hafoin akompaña kliente iha TDD, Sesta (05/08/2022).

Advertisement

Hosi kazu hirak ne’e, barak liu ho tipu hapara servisu, problema saláriu, subsídiu seguransa sosiál, kondisaun sevisu hanesan servisu liu oras, tratamentu no aplika regra la tuir kontratu ne’ebé maioria akontese iha loja, armajén, seguransa, hotelatoria, konstrusaun no seluktán.

Mekanizmu ne’ebé durante ne’e KSTL uza hodi solusiona keixa ne’ebé iha maka liu hosi dalan tolu, liu hosi faze negosiasaun bi partida ne’ebé entre parte rua sindikatu reprezenta traballadór hasoru-malu ho empregadór hodi deside.

Bainhira laiha solusaun, parte rua bele halo rekursu ba parte mediasaun tripartida ne’ebé involve SEFOPE maibé bainhira la konsege iha solusaun mak prosesu tuir mai halo rekursu ba konsellu arbitrajen do trabalho ne’ebé konsidera hanesan semi Tribunál.

Maibé la taka dalan bainhira parte sira hakarak direitamente ba Tribunál Distritál Díli (TDD), nune’e la liu hosi konsellu arbitrajen, tanba iha desizaun konsellu arbitrajen mós sei haruka mai TDD hodi halo omologasaun.

Jornalista: Carmelita Isaac

Advertisement