Hatutan.com, (05 Agostu 2022), Díli—Durante férias judisiáriu ne’ebé hahú iha loron 01 fulan Agosto to’o 16 fulan Setembru, Tribunál Distritál Díli (TDD) kontinua hala’o julgamentu ba kazu urjente ho tipu primeiru interrogatóriu, julgamentu sumáriu, providénsia cautelar ne’ebé liga ho prosesu sivíl.

Tanba ne’e, hahú iha loron 01 fulan ne’e, TDD atende ona kazu urjente tolu ne’ebé kompostu hosi kazu krime rua no providénsia kautelár ida, liu hosi primeiru interrogatóriu no julgamentu sumáriu.

Lee Mós: Menus Rekursu Umanu ho Sala Julgamentu Difikulta Serbisu TDD

“Ami responde de’it ba kazu hirak ne’ebé urjente, hanesan primeiru interrogatóriu, julgamentu sumáriu, arguidu hirak ne’ebé detidu inklui kondenadu ne’ebé atu hetan liberdade kondisionál, indultu no ba kazu hirak ne’ebé ninia prova atu lakon. Tanba ne’e, juiz sira mai hodi prodús prova ida ka rua nune’e labele lakon, tanba tuir regra ne’ebé iha katak, durante loron 30 tenki iha produsaun prova kontinua,” Juiz administradór Afonso Carmona hateten ba Hatutan.com iha knaar fatin TDD, Sesta (05/08/2022).

TDD Presiza aselera julgamentu liu-liu prosesu sumáriu no primeiru interrogatóriu ne’ebé involve juiz singulár inklui kolektivu, antes termina ninia prazu oras 72.

Tanba ne’e, maski iha hela férias judisiáriu maibé juiz ne’ebé kona turnu tenki tama nune’e bele rezolve. Kona-bá juiz hirak ne’ebé foti lisensa annual, sira labele atende tanba sira mós presiza goja direitu lisensa annuál nian.

Relasiona ho kazu krime ne’ebé akontese, maka kada fulan TDD simu akuzasaun hamutuk atus ida resin hosi Ministériu Públiku (MP), nune’e TDD iha dever atu finaliza kazu hirak ne’e, tanba bainhira la aselera maka kazu pendente sei sa’e.

Maski nune’e, servisu ne’ebé presiza ema hotu hala’o no kontribui maka oinsa atu redús ema ne’ebé viola ema seluk nia direitu.

Tanba, hirak ne’ebé vitima komprende ona ho nune’e lori ba Tribunál, maibé autór sira seidauk iha konsiénsia atu muda sira nia hahalok hodi la involve a’an iha kazu krime.

Desizaun hosi TDD ba kualkér kazu, iha motivasaun rua mak hanesan, primeiru prevensaun jerál liu hosi kondenasaun atu publiku hatene katak, hahalok ne’e la di’ak, segundu hahalok ne’e labele repete tán iha futuru.

Jornalista: Carmelita Isaac