Hatutan.com, (08 Setembru 2022), Díli– Ministériu Públiku (MP) liuhosi Prokuradór  Domingos Barreto,  alega arguidu sira ne’ebé asalta membru F-FDTL iha insidente Bidau Akadiru-hun, prizaun preventiva  tanba iha faktu ne’ebé komprovadu. Maske, durante primeiru interrogatóriu ne’e, arguidu sira nega katak, sira la envolve iha kazu konfrontu tuda-malu ne’e.

Lee Mós : Suspeitu Sira Asalta Membru F-FDTL Submete bá Primeiru Interrogatóriu

Suspeitu sira asalta membru F-FDTL Primeiru Sarjentu Joanico Baptista Carvalho (Apeku) iha área Akadiru-hun, submete bá primeiru interrogatóriu judisiál iha Tribunal Distritál Díli (TDD), Kinta (08/09/2022). Foto/Helio dos Santos da Costa

MP husu bá tribunál, atu aplika medida koasaun prizaun preventiva ba arguidu na’in-haat, atu asegura no antesipa sira labele halai, maibé oinsá mak bele iha kolaborasaun nafatin ho autoridade judisiál sira, tanba arguidu sira nia kazu ne’e, iha nesesidade no interese atu kontinua ho prosesu investigasaun.

MP argumenta mós katak bainhira tribunál la aplika medida ne’ebé todan, hodi husik de’it arguidu sira lívre iha li’ur, oportunidade ba sira bele halai lakon, inklui halakon mós faktu ka evidénsia sira, no bele mós halo fali senáriu ne’ebé foun seluk, ligadu ho krime anterior.

Maske MP alega medida prizaun preventiva bá arguidu sira, maibé parte defeza liuhosi Advogadu Sergio Lobo Junior ho Marino da Cuz de Jesus,  husu bá Tribunál atu aplika de’it medida koasaun Termu Identidade Rezidénsia (TIR) no aprezentasaun periódika ba arguidu sira.

Tribunál Distritál Dili (TDD), Kinta (08/09/2022), hala’o prosesu primeiru interrogatóriu judisiál bá arguidu na’in-haat ho inisiál CXS, PPdC, CCdC no DdS, tanba envolve iha atake hasoru membru FALINTIL-Forsa Defeza Timor-Leste (F-FDTL), Primeiru Sarjentu Joanico Baptista Carvalho (Apiku) iha área Bidau Akadiru-hun, Díli, Segunda (05/09/2022).

Iha prosesu primeiru interrogatóriu judisiál ne’e, Ministériu Públiku (PM) promove arguidu sira ho krime Perturbasaun Orden Públika, Ofensa Korporál Gráve,  Obstrusaun bá Autoridade no Dano ho Violensia, ne’ebé mak previstu iha lei kódigu penál Timor-Leste.

PNTL iha Tersa 06 Setembru 2022, detein autór na’in-haat iha sela detensaun Kuartél Jerál PNTL Caicoli, tanba deskonfia involve iha kazu asalta ka baku membru F-FDTL ida iha área Bidau Akadiru-hun, Postu Administrativu Cristo Rei, Munisipiu Díli, Segunda (05/09/2022).Foto/PNTL

Hafoin rona tiha parte rua ninia pozisaun, tribunál muda fali tempu audensia primeiru interrogatóriu nian  bá iha tuku 17:00 Otl, hodi foti desizaun entre medida koasaun TIR ka Prizaun Preventiva.

Insidente konfrontu tuda-malu ne’e envolve juventude sira ne’ebé deskonfia hosi Grupu Arte-Marsiál (GAM), Persaudaraan Setia Hati Terate (PSHT) ho Grupu Arte Rituál (GAR), Sete-Sete (77).

Rezultadu hosi kazu ne’e, rezulta Primeiru Sarjentu, Joanico Baptista Carvalho (Apiku), hetan kanek iha parte ulun, tanba tuda ho fatuk hosi grupu juventude balu.

Hafoin insidente ne’e, iha kalan ne’e kedan, ekipa konjunta sira kompostu hosi Servisu Nasional Intelijénsia (SNI), Polísia Nasional Timor-Leste (PNTL), liuhosi Servisu Informasaun Polísia (SIP) iha nasionál, F-FDTL liuhosi Servisu Sekreta Militár (J2), simu orden hodi buka tuir autór sira, no konsege kaptura no detein autór sira iha sela detensaun durante oras 72.

Jornalista: Rogério Pereira Cárceres