Hatutan.com, (24 Setembru 2022), Díli-Polisia Nasionál Timor-Leste (PNTL), liuhosi Komandu Munisípiu Díli, Sesta kalan (23/09/2022), detein membru arte-marsiál hosi Persaudaraan Setia Hati Terate (PSHT) na’in-26 iha área Becora nian tanba perturba ka  viola kompromisu (regra) kona-bá utilizasaun atributu arte-marsiál ho arte-rirtuál iha fatin públiku.

Lee Mós : Kazu Mate iha Sela Detensaun, Komandu PNTL Konklui Investigasaun bá Membru Na’in-sia

PNTL detein membru PSHT na’in-26 tanba viola kompromisu. Foto/PNTL

Iha loron 07 fulan-Setembru 2022, lider grupu arte-marsiál (GAM), kompostu hosi PSHT, Ikatan Keluarga Silat Pemuda Timor Leste (IKSPTL) Kera Sakti ho Kmanek Oan Rai Klaran (KORK), no Grupu Arte-Rituál (GAR), Sete-Sete (77), halo ona deklarasaun konjunta ida no kompromisu bá públiku katak, hahú hosi loron ne’ebá, bandu kedan membru sira ida-idak nian atu  hatais atributu arte-marsiál no rituál iha kualkér fatin, bainhira seidauk iha autorizasaun ruma hosi Governu.

Deklarasaun konjunta ida-ne’e, relasiona ho kazu konfrontu tuda-malu ne’ebé deskonfia envolve hosi membru sira PSHT ho Sete-Sete nian iha área Bidau Akadiru-hun, Dili, iha loron 05 fulan-Setembru 2022 ne’ebé rezulta mós membru FALINTIL-Forsa Defeza Timor-Leste (F-FDTL) ida hosi Komponente Navál, Primeiru Sarjentu, Joanico Baptista Carvalho,  kanek.

Advertisement

Deklarasaun konjunta ne’ebé lider GAM ho GAR sira ne’e, sai hanesan kompromisu ida, hodi evita mosu tán kazu konfrontu entre sira-nia membru sira atu bele kontribui de’it bá pás ho estabilidade nasionál.  

Komandu PNTL Munisipiu Díli, Superintendente Xefe Henrique da Costa, esplika, objetivu hosi atividade operasaun patrulla ho karreta inklui la’o-ain tuir kada bairru iha tempu kalan, hodi prevene krime sira ne’ebé perturba orden públika inklui garante seguru bá komunidade sira iha Díli hanesan kapitál nasaun Timor-Leste.

Atividade operasaun ne’e, envolve hosi Eskuadra PNTL hotu mak hanesan, Dom Aleixo, Cristo-Rei, Na’in-Feto, Vera-Cruz no Metinaro, hodi halo operasaun rutina la’o-ain tama sai bairru iha área risku sira ne’ebé sempre akontese problema.

“Iha operasaun ne’e ita konsege asegura joven na’in-26 hosi PSHT, iha área Aimuti-hun, Suku Becora, Postu-Administrativu Cristo-rei, tanba viola kompromisu hosi lider arte-marsiál sira,” sita komunikadu imprensa ne’ebé Hatutan.com asesu, Sábadu (24/09/2022).

PNTL halo detensaun bá membru PSHT na’in-26 ne’e, tanba halibur malu hodi hala’o atividade treinamentu iha fatin nakukun ne’ebé bele mosu provokasaun hodi kauza bá perturbasaun orden públika.

Advertisement

“Bazeia bá Rezolusaun Governu ho númeru 01/MI-MD/IX/2022, ita intensifika volume atividade patrullamentu la’o ain iha tempu kalan ne’e haree mós bá movimentu joven sira ne’ebé halo agrupamentu hemu -anu iha dalan públiku sira, ita foti medida prevensaun hodi evita hahalok sira ne’e bele fó perturba orden públika,” Henrique da Costa, afirma.

Xefe Aldeia Bekusi Kraik, Alicia Moniz Amaral. Foto/PNTL

Iha fatin hanesan, Xefe Aldeia Bekusi Kraik, Alicia Moniz Amaral, dehan, kona-bá atividade treinu hosi membru PSHT sira, nia parte laiha koñesimentu no tuir nian, atividade ne’e bele provoka situasaun la di’ak iha bairru laran.

Xefe aldeia ne’e, haktuir, antes ne’e parte autoridade sira, realiza ona enkontru ida ho Governu liuhosi Sekretária Estadu Juventude no Desportu (SEJD), Komisaun Reguladora Artes Marsiais (KRAM), esplika tuir regra katak, bainhira Grupu Arte-Marsiál ruma atu halo atividade treinu tenke iha uluk koordenasaun bá autoridade lokál.

La’os ne’e de’it, KRAM mós husu atu kontrola GAM sira, katak, bainhira atu identifika sentru formasaun hodi treina iha Suku no Aldeia, presiza halo pedidu bá Xefe Suku sira maka autoriza kona-bá fatin halo treinu nian, nune’e mós atu identifika reinadór arte- marsiál ne’ebé atu fó treinu tenke kábe bá polísia nia servisu.

“Agora sira treina ida ne’e kategoria hanesan ilegál tanba halibur malu iha uma leet laiha koñesimentu hosi Xefi Suku no OPS (Ofisial Polísia Suku). Depois treina iha dalan ninin no ahi taka nakukun hotu kedas ne’e bele provoka fali situasaun la di’ak tanba daudaun festa ida besik hela iha ne’e, entaun ho movimentu bá mai ne’e provokadór ruma iha bele sadik malu no problema bele mosu,” Xefe Aldeia ne’e hateten.

Autoridade  komunitáriu ne’e haree katak, oras ne’e daudaun, komunidade sira sente sei trauma hela ho akontesimentu kazu konfrontu sira tuda-malu nian iha semana kotuk, ho nune’e, husu bá lidera GAM ho GAR sira katak, bainhira atu halo atividade treinu ruma, bele husu autorizasaun iha polísia, no indika fatin públiku ne’ebé dook hosi komunidade sira nia uma.

Advertisement

Xefe Aldeia Alicia, husu mós ba KRAM no Sub-Komisaun sira ne’ebé estabelese ona inklui lider Arte-Marsiál atu kontinua halo sosializasaun bá membru sira hodi halo tuir kompromisu ne’ebé maka fó sai ona bá públiku iha semana kotuk bá.

Antes ne’e Sekretáriu Jerál PSHT, Pedro Aparício, hateten estrutura PSHT hatún ona diretiva bá nia membru tomak hodi labele uza atributu arte-marsiál iha bairu-laran tanba ne’e estrutura hotu to’o membru sira presiza kumpre no tau konsiderasaun.

Jornalista: Rogério Pereira Cárceres

Advertisement