Hatutan.com, (04 Outubru 2022), Díli—Komisáriu Comissão Anti-Corrupção (CAC) Sérgio Hornai ho Komisáriu Adjuntu Prevensaun no Sensibilizasaun Luis Sampaio akompaña hosi estrutura Espesialista Anti-Corrupção (EAK) ofisialmente husik ekipa peskizadór na’in 32 ba terrenu hodi hahú realiza peskiza persepsaun públika korrupsaun tinan 2022 iha munisipiu 12 inklui RAEOA.

Komisáriu Comissão Anti-Corrupção (CAC) Sérgio Hornai ho Komisáriu Adjuntu Prevensaun no Sensibilizasaun Luis Sampaio akompaña hosi estrutura Espesialista Anti-Corrupção (EAK) ofisialmente husik ekipa peskizadór na’in 32 ba terrenu hodi hahú realiza peskiza persepsaun públika korrupsaun tinan 2022 iha munisipiu 12 inklui RAEOA, Segunda-Feira (03/10/2022).

Ekipa peskizadór na’in 32 ne’e kompostu hosi Espesialista Anti-Korrupsaun (EAK) na’in 15 no hetan apoiu hosi estudante universitáriu na’in 17 hosi UNTL, UNPAZ no IOB.

Lee Mós: 2022, CAC Hetan Delegasaun Kompeténsia Halo Investigasaun Ba Kazu 76

Antes ekipa tun hala’o peskiza ida-ne’e iha terrenu, iha oportunidade ohin no aban hetan mós formasaun introdusaun báziku iha asuntu korrupsaun nian no formasaun sientífiku no tékniku iha metodolojia peskiza nian hosi péritu sira rai laran.

Programa peskiza persepsaun públika ba asuntu korrupsaun ne’e ho objetivu prinsipál atu buka no deskobre loloos públiku en jerál nia koñesimentu kona-bá hahalok korrupsaun ho nia kauza no efeitu sira ba Estadu no Povu nia destinu moris, oinsá sukat públiku ninia koñesimentu ba prevene no kombate hahalok korrupsaun iha TL.

Importánsia hosi peskiza ida-ne’e mós atu buka, deskobre no rekolla informasaun no dadús sira hodi tulun liu-tán Estadu hatuur no projeta nia planu, polítika ba prevensaun no eradikasaun krime korrupsaun ba interese no prosperiedade povu nian.

Komisáriu Sérgio Hornai ko’alia ba ekipa peskizadór sira ne’ebé simu responsabilidade perante peskiza ida-ne’e, partikularmente ba Universitáriu sira atu hala’o peskiza ida-ne’e ho responsável, garante peskiza ida sientífiku hodi tulun Komisaun iha misaun prevensaun kriminalidade korrupsaun.

Komisáriu Sérgio husu ekipa peskizadór sira atu rekolla informasaun no dadus sira objetivamente, bazeia ba faktus iha terrenu, nune’e mós rekolla dadus sira ho detallu no akurasia ba fontes informadór xave sira.

“Husu ba kolega sira atu labele foti dadus ne’ebé fiktif, tenke foti dadus ho loloos,” Hatutan.com sita deklarasaun Komisáriu Sérgio iha komunikadu, Segunda-Feira (03/10/2022).

Peskiza persepsaun públika ba asuntu korrupsaun ida-ne’e nu’udár programa Komisaun nian iha Unidade Estudu Avaliasaun Rísku (UEAR) iha Diresaun Prevensaun no Sensibilizasaun (DPS) nian ne’ebé realiza kada tinan lima dala ida.

Programa peskiza ida-ne’e realiza uluk ona iha tinan 2013 iha Komisáriu CAC Adérito Soares nia mandatu, no tuir planu peskiza ida-ne’e realiza fila-fali iha tinan 2020, maibé ho situasaun kruél Covid-19 nian,  Komisaun adianta mai iha tinan 2022.

Jornalista: Elio dos Santos da Costa